१ तिमोथि 6 - आठपहरियाकामारा लोङ्सा साल्लाह 1 सोब्बे कामाराचिङा उन्चि डाङ्बाचिलोङ्सा सोब्बे रिङ्ङि आड्डिक् मान् चोक्मा कोन्युक्॥ हिट्नुङ् एरोक् साङा चा माङ्हाङ्ङाना उनिङ् हिट्नुङ् आन्याँ हिसिक्मा फाट्टुर लाब्मा उहिडुन्ना॥ 2 कामाराचिगा उन्चि बिस्वासि डाङ्बाचि उयुङ्ग्वा भोने हिट्नागाँ उन्चि आप्पे बिस्वासि भुम्भु-झान्झाचि डोक् उमिट्टुङ् मान् चोक्मा ओनाडुन्चा॥ हिट्डे चोक्माना साट्टोङि हिट्नागाँगा आझा जोम् सेवा चोक्मा कोन्युक्, पोङ्भोने हिट्नागाँ ओचोगुना सेवाङाना फाइदाम्बाक् उन्चिङा माया ओचोगुना बिस्वासि डाङ्बाङा डोक् टुबुटु॥ नागा रिङ्चि डोक् चोक्मा लोङ्सा हिसिक्टुचि हिट्नुङ् आँट् पिडुचि॥ माङ्जोना हिसिक्मा लोक् माक्फेन्सुबेन् बारे 3 कोइङा माङ्जोना रिङ् हिसिक्टुचिचि भोने, हिट्नुङ् हिट्ना आनि टाङ्बा येसु खिरिस्टङाना छेम्बाना हिसिक्माङि हिट्नुङ् माङ्हाङ् भाक्ति चोक्माना चोलाङाना हिसिक्माङि टेन्निना, 4 हिट्नाम्बाक् आड्डिक् ठेलोक् चोक्ना हिट्नुङ् पाक्चा ठाहा काटोग्निबा लियुक्॥ हिट्नाँ खेडोक्गा रिङ्पान्ङि निङ्ग्वा चोगुङ् बादबिबाद चोक्युङ् रिङ् रिङ्ङाना उटुप् बारेङि खेमाभुङ्मा होट्टुगा॥ नाड्डेगा रिङ्ङाम्बाक् रेक् काप्मा, साम्माना रिङ्, लोमाजामा हिट्नुङ् ओचाफेन्ना साङ्का, 5 हिट्नुङ् याप्मिचिगा माझाङि खेमाबुङ्मा एडोक् होट्टुटु॥ हिट्नागाँगा उन्चि ठोना मासाइसे हिट्नुङ् छेम्बाना रिङ् ओनाडुएसुए, हिट्नुङ् माङ्हाङ्ङाना बारेङि हिसिक्माम्बाक् ओफाबा कामाँ चोक्माना ओचेट्नुना लाम्बो नुङ् हिट्नागाँ उमिट्टुगा॥ 6 टरो भाक्तिङाना चोलाङि लिमा हिट्नुङ् आनिलोक् लिसागा रिङ्ङि चाप् टाप्मा डोक् ठेना फाइदा ए॥ 7 आनि पोङ्सिनाँ ना नाराङि पाक्चा टाट्नेयाट्निम् हिट्नुङ् सियुङ् नाहिलाम्मा पाक्चा खाप्मा हिनिम्ना॥ 8 हिट्डेउङ् चामा-ठुङ्मा हिट्नुङ् वाप्मा लोङ्सा टोगुम्मे भोने हिट्टेप्माङि डोक् हारका लिसिटि॥ 9 टरो कोइङा वागाठागा लिमा एरोक् निङ्ग्वा पिडुटु भोने, निङ्ग्वा छिक्माङि हिट्नुङ् वारिक्ङि ठायुक्, हिट्नुङ् जोम् मुरखा रिङ्चि हिट्नुङ् याङ्छामा आपिना निङ्ग्वाङा जाखाम् चोक्माना हिट्नुङ् फ्याङ् मेग्माना रिङ् टाडुटु॥ 10 पोङ्भोने माक्फेन्सुबेन्ङि माया चोक्माम्बाक् सोब्बे पारिक्ङागा ओचाफेन्ना निङ्ग्वाङाना लाम्बो लियुक्॥ आम्टेप्मा याप्मिचिङा ओफाबा कामाँ चोक्माङि एरोक् निङ्ग्वा उपिडुङ् बिस्वास चा ओनाडुएसुए, हिट्नुङ् कोइ याप्मिचिङा उन्चि निङ्ग्वा छुरिङा फाडि गाड्डे आड्डिक् याङ्छामाङा ओफाडुएसुए॥ पावालङा तिमोथि छेक् छेक् चोगुना 11 टरो खान् माङ्हाङ्ङाना याप्मि, नाड्डेगा सोब्बे रिङ् खान्ङा नाडु, हिट्नुङ् माङ्हाङ् ओटोकानाङि पाक् नुना हिट्ना चोक्मा, भाक्ति चोक्मा, बिस्वासिलो लिमा, माया चोक्मा, धैइरेताङि लोक् मेयोक् लिमा कानिङ्ग्वा पिडु॥ 12 खान्ङा बिस्वास आचोगुना रिङ्ङि ओचेट्नुलोक् पिन्डा, हिट्नुङ् खोना बेला चा लाट्निना चोला लाबुयाक्टु, माङ्हाङ्ङा ना लोङ्सा डोक् खान् माछेम्डाना॥ खान्ङा जोम् याप्मिचि माझाङि काबिस्वासङाना नुना साँचि आपिडुएसुचिगा डागा॥ 13 सोब्बे थोक्लोङ्सा चोला कापिबा माङ्हाङ् हिट्नुङ् पान्तियास पिलातास सोरि आङालोङ्सा साँचि कापिबा छेम्बाना रिङ् काचेक् खिरिस्ट येसु ओटोकानाङि, आङा खान् आग्याँ पिनाँ, 14 आनि टाङ्बा येसु खिरिस्ट मिटाङे सोम्मा खान्ङा ना माङ्हाङ्ङाना आग्याँ नुलोक् हिट्नुङ् फाट्टुर माले मान् चोगु॥ 15 हिट्नुङ् उन्ङा डोक् खिरिस्ट आप्पे ओबेलाङि फेरि पाङ्सुटु॥ माङ्हाङ् उनिङ् टो-टो चोक्मा नुना ए हिट्नुङ् उन्ङा एडोक् सोब्बे उठुङ्ङि सासान् चोगुटु, उन् हाङ्चिङाना चा हाङ्बा हिट्नुङ् टाङ्बाचिङाना चा टाङ्बा ए॥ 16 उन् एडोक् खोना बेला चा सिनिना हिट्नुङ् उन् व्हाङ्ङि युङ्ना, उन् सोरि साक्चा खाप्मा उहिनिना॥ उन् साङा चा खोना बेला चा उनिसुन्गेट्टुन्ना हिट्नुङ् निमा चा उहिडुन्ना॥ उनिङ् टो-टो उलियाक् हिट्नुङ् उन्ङाना बोल् सोरोक् उलियाक्॥ आमेन्॥ 17 ना नाराङिगा वागाठेगालोङ्सा ठेलोक् ओचोक्नि नुङ् आग्याँ पिडुचि, हिट्नुङ् लाट्युजाना माक्फेन्सुबेन्ङि माखाक्, टरो आनि मोज्मोज्जा चोक्मा लोङ्सा सोब्बे थोक् जोम् आपिना माङ्हाङ्ङि उन्चि आसा उयुङ्सु नुङ् लोडुचि॥ 18 हिट्नागाँ आरु नुलोक् ओमेट्टुच्याक्, हिट्नुङ् नुगा टोॽवाचि जोम् ओचोगुवाक्, हिट्नुङ् याप्मिचि खेरोक् पिमा हिट्नुङ् हाम्माजामाङि उन्चि निङ्ग्वा उपिडुवाक् नुङ् लोडुचि॥ 19 नाड्डेउङ् हिट्नागाँ हान्डेङ् टोग्ना चोलाङि चाहाबा लिना आप्पे लोङ्सा बोलियो जाग् चोक्मा माक्फेन्सुबेन् उछुम्सुवाक्, हिट्डेउङ् हिट्नागाँ हिट्ना छेम्बाना चोला टोक्मा उहिडुटु॥ 20 तिमोथि, खान् काजिम्माङि मापिडाना रिङ् ओचेट्नुलोक् पुयु॥ बिथाँङिगा हिट्नुङ् मुरखा रिङ्पान् हिट्नुङ् छेम्बाना हिसिक्मा बिरोधङि ओकोबागा याप्मिचिगा रिङ् नाडु॥ हिट्नागाँ उन्चि हिसिक्माम्बाक् “ठोना” नुङ् ओमाट्टुना हिट्नाम्बाक् छेम्बाना माखाक्॥ 21 आम्टेप्मा याप्मिचि हिट्नागा मुरखा रिङ्ङि लाहाब् उलिसाउङ् बिस्वासलाम्मा डोक् ओनोक्टा ओखाडे॥ खानि सोब्बेङि माङ्हाङ्ङाना मायादाया उलियाक्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.