१ तिमोथि 5 - आठपहरियालाङ्मेप्माचि, एल्डारचि लोङ्सा साल्लाह 1 पासिङ् लिसाना याप्मि खेमालाप्टुन्, टरो आप्पे पाबा गाड्डे डोक् मान् चोगुङ् साल्लाह पिडु॥ खान् नुङ्ना ओखाट्टिउगा लोङ्सा आप्पे कान्झाचि गाड्डे डोक् चाट्ला मेट्टुचि॥ 2 मासिङ् उलिसागा मेन्झेमाचि आप्पे मामा गाड्डे डोक् हिट्नुङ् कायेप्माचि आड्डिक् चोखो निङ्ग्वाङि आप्पे झान्झाचि गाड्डे डोक् चाट्ला मेट्टुचि॥ 3 साक्चा पुसिङा ओवानिगा लाङ्मेप्माचि लोङ्सा मान् चोगुचि हिट्नुङ् घुवार फाडुचि॥ 4 लाङ्मेप्माङाना आप्पे उइछाचि हिट्नुङ् ओयाङ्मेन्चि उयुङ्ग्वा भोने, हिट्नागाँ पाइले उन्चि आप्पे पाङ्ठाङ्ङिगा याप्मिचि उपुयुचिउङ् उन्चिङा चोक्माना टोॽवा पुरो चोक्माना रिङ् सिकाँ उलियाक्, हिट्नुङ् नाड्डे ओचोगुङ् उन्चि मामा-पाबाङा उन्चि लोङ्सा ओचोगुना गुन् उहुङुवाक्॥ पोङ्भोने नाड्डेना रिङ् माङ्हाङ् ओनाजारङि नुना लियुक्॥ 5 साक्चा कापुबा ओवानिगा लाङ्मेप्माङा उन्ङाना ओआसाम्बाक् माङ्हाङ्ङि युङ्सुटु, हिट्नुङ् लेन्सेन् माङ्हाङ्ङि बिन्टि ठाङ्सुटु हिट्नुङ् माङ्हाङ् घुवार नाक्टुटु॥ 6 टरो लाङ्मेप्मा मोज्मोज्जा एडोक् चोक्युक् भोने, उन् हिङा चा सियाना याप्मि डोक् लियुक्॥ 7 नागा रिङ् बिस्वासिचि आग्याँ पिडुचि, हिट्डेउङ् साङा चा पारचिन्दा फाट्टुर लाब्मा उहिडुन्चिन्गा॥ 8 टरो कोइङा आप्पे ओनातेदारचि हिट्नुङ् हिट्नि चा आप्पे ओपाङ्ठाङ्ङिगा याप्मिचि नुलोक् पुयुन्चिन्गा भोने, हिट्ना छेम्बाना बिस्वासि माखाक्, हिट्नुङ् हिट्ना याप्मि बिस्वास काचोक्निबा नुङ्ना चा ओचाफेन्ना लियुक्॥ 9 साठि बारखा नुङ्ना उठुङ् टासुना लाङ्मेप्मा एडोक् लाङ्मेप्माङाना निङ् छेप्मानाङि उनिङ् छेप्टुबिडु॥ हिट्नाम्बाक् ठिबाङ् एडोक् येम्बिछालोक् भ्या लिसाना लिमा कोन्युक्॥ 10 हिट्नुङ् हिट्नाम्बाक् ओचेट्नु टोॽवा चोगुङ् उनिङ् मुक्टाना, नाड्डेडोक् आप्पे उइछाचि ओचेट्नुलोक् पुयुचिगा, ओटागा याप्मिचि ओचेट्नुलोक् काचोक्बा, माङ्हाङ् ओयाप्मिचिगा लाङ् वासिडुबिडुचिउङ् सेवा काचोक्बा, हिट्नुङ् याङ्छामाङि ओठायागा लोङ्सा घुवार काफाबा, हिट्नुङ् सोब्बे पारागा नुना टोॽवाङि एडोक् निङ्गुवा कापिबा मेन्झेमा लिमा कोन्युक्॥ 11 टरो कायेप्मा लाङ्मेप्माचि ओवाहेट् भोने लाङ्मेप्मा नुङ् निङ् छेप्टुन्बिडुन्चिन्, पोङ्भोने हिट्नागा खिरिस्टङि भाक्टि चोक्मा ओसाट्टोङि जोम् उन्चि निङ्ग्वा छोम्बोक् लियुकाट्युङ् फेरि भ्या लिमालोङ्सा निङ्ग्वा ओचोगुटु॥ 12 पोङ्भोने हिट्नागाँ पाइले ओचोगुना चामारसिङा ओएगुनाँ हिट्नागा फाट्टुरङि ओठायुक्॥ 13 हिट्नुङ् चा हिट्नागाँगा उन्चि निङ् छेप्टुमे भोने कायेप्मा लाङ्मेप्माचि पाक्चा टोॽवा चोक्मा कोन्नि नुङ् सिकाँ उलियुक् हिट्नुङ् आरु याप्मिचिगा पाङ्-पाङ्ङि ओवायुजायुक्॥ आल्छे लिमा एडोक् माखाक् हिट्नागा नानाभाँटि रिङ् ओमाट्टुगा उलियुक् हिट्नुङ् आरु याप्मिचि बाम्माना टोॽवा काचोक्बा उलियुक्, हिट्नुङ् चेक्मा डोक् लिनिगा रिङ् ओचेक्युक्॥ 14 नाड्डेउङ् कायेप्मा लाङ्लेप्माचि भ्या उलियाक्, उन्चि छालेट्चि उलियाक्, आप्पे उन्चि पाङ्ठाङ् ओचोगुजो नुङ् साल्लाह पिडुचि॥ हिट्नुङ् साट्टुरचि आनि बिरोधङि पाक्चा चेक्मा उहिनिगा॥ 15 आङा ना रिङ् लोनाँनि पोङ्भोने आम्टेप्मा लाङ्मेप्माचिम्बाक् पाइले डोक् सैतानलेङ् ओनोक्टा ओखाडाइसे॥ 16 हिट्नुङ् बिस्वासि मेन्झेमाङाना ओपाङ्ठाङ्ङि आम्टेप्मा लाङ्मेप्माचि ओवाहेट् भोने उन्ङा डोक् हिट्नागा लाङ्मेप्माचि पुमाचि कोन्युक्, हिट्नुङ् माङ्पाङ्ङा ना भार फोक्मा कोन्निना, हिट्डेउङ् माङ्पाङ्ङाम्बाक् छेम्बा डोक् चाहाब्ङि उलिसागा लाङ्मेप्माचि घुवार फामा उहिडुचिचि॥ 17 माङ्पाङ्ङिगा ओठेडोङ्चि नुलोक् आगुवाइ काचोक्चि मान् लोक् उयुसिचिलोक् निमेक् पिमाचि नुगा उलियुक्, मुलिगारि माङ्हाङ् रिङ् पारचार काचोक्चि हिट्नुङ् सिकाँ चोक्मा निङ्ग्वा कापिबाचिङा टोक्मा डोक् कोन्युक्॥ 18 पोङ्भोने धारमाछाप्लाङि नाड्डे छेप्टेसे, “दाइ चोगुम्नाँ गोरुङाना ओयासिङि मोहोला मेट्नेनुम्,” हिट्नुङ् “लेक् काफाबाङा चा उनिम्याक् टोक्मा नुना लियुक्॥” 19 इप्पाङ् सुम्बाङ् साँचि माले सोम्मा एल्डारङाना बिरुद्दाङि फाट्टुर ओलाबुना रिङ् खेम्मा चा खेम्सुन्॥ 20 पाप काचोक् एल्डारचि सोब्बे सोरि राट्टुचि, हिट्डेउङ् आरु एल्डारचि चा उकिट्युक्॥ 21 माङ्हाङ् हिट्नुङ् खिरिस्ट येसु हिट्नुङ् सेग्बालाक् माङ्हाङ् रिङ् काउग्बाचि साँचि युङ्सुङुङ् आङा खान् ना आग्याँ पिनाँ, खोनालेङ् चा मिकेङ्ङे आङा लोनागा नागा रिङ्चि पालान् चोगु॥ 22 माङ्पाङ्ङिना ओठेडोङ् सेक्मा लोङ्सा हिट्नाङाना निङ्ग्वा मिछिक्ङे एला एला चोक्नेन्॥ आरु याप्मिचिगा पापङि खान् लाहाब् लिनेन्॥ आप्पेलोङ्सा सेङ्सेङ् युङ्सु॥ 23 काफोक् टुगाउङ् काइले-काइले कायेम् टुगानाँ पाइले गाड्डे चुवा एडोक् ठुङुन्॥ हिट्ना ओसाट्टोङि सिडा लोङ्सा चिप्चिप् आङ्गुरङाना युमालिङ् चा ठुङु॥ 24 कोइ-कोइ याप्मिचिगा पापउम् टे पारचिन्दा ठेट्युक्, हिड्डेउङ् हिट्नागाँ एला डोक् न्याए ओटोगुटु, टरो आरु आम्टेप्मा याप्मिचिगा पापउम्बाक् हान्डेङ् एडोक् ठेट्युक्॥ 25 हिट्नाडे डोक् आम्टेप्मा ओचेट्नुगा टोॽवाचिम्बाक् पारचिन्दा ओठेट्युक्, हिट्डेउङ् याप्मिचिङा एला डोक् ठाहा ओटोगुटु, हिट्नुङ् चा सोगोप् ओचेट्नुगा टोॽवाचि चोक्बालाक् चा ठोप्मा उहिनिगा॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.