१ तिमोथि 4 - आठपहरियामाङ्जोगा रिङ् काहिसिक्बाचि 1 हाट्ले सेङ्सेङ्ना हाङ्साङा पारचिन्दा माट्टुटु, हान्डेङ् टाना बेला आम्टेप्मा याप्मिचिङा छेम्बाना हिसिक्मा बिस्वास चोक्मा ओनाडुटु॥ हिट्नागाँ काटेप्बा रिमेट्चिङा हिट्नुङ् टोंडेबाचिङा ओमाट्टुना माङ्जोगा हिसिक्माङि उन्चि निङ्ग्वा उपिडुटु॥ 2 नाड्डेगा हिसिक्मा माङ्जो काचोक्बा हिट्नुङ् उन्चि निङ्ग्वा माक्ना लिसागा याप्मिचिलाम्मा डोक् लियुक्, हिट्नुङ् हिट्नागाँगा मिप्माना बोल् जाखाम् लिसाइसे॥ 3 हिट्नागा भ्याबारि चोक्मा लिनिना पिक्सा ओमाट्टुगा, हिट्नुङ् आम्टेप्मा चामा-ठुङ्मागा थोक्चि चामा लिनिगा पिक्सा चा याप्मिचि ओलोडुचिगा॥ टरो बिस्वास काचोक्बाचि लोक् छेम्बाना रिङ् कानिबाचिङा पोए-पोए ओठाङ्सुङ् हिट्नागा चामा लियुक्, पोङ्भोने नागा थोक्चि माङ्हाङ्ङा डोक् चोगुगा॥ 4 माङ्हाङ्ङा चोगुगा सोब्बे थोक्चि नुगा, हिट्नुङ् पोए-पोए ठाङ्सुम्मुङ् सोब्बे थोक्चि चामा लियुक्॥ खोना थोक् चा इन्कार चोक्मा कोन्निना॥ 5 पोङ्भोने माङ्हाङ्ङाना रिङ् हिट्नुङ् बिन्टिङा डोक् सोब्बे चामा-ठुङ्मागा थोक् सेङ्सेङ् लियुक्॥ 6 खान्ङा नागा रिङ्चि बिस्वासिचि आहिसिक्टुचे भोने खान् खिरिस्ट येसुङाना नुना सेवा काचोक्बा आलियुक्॥ खान्ङा पालान् आचोगुना बिस्वास लोक् नुना हिसिक्माङि डोक् खान् आपोए नुङ् ना रिङ्ङा डोक् मानिमेट्युक्॥ 7 बिथाँङिगा माङ्हाङ् मालेगा रिङ्ङि हिट्नुङ् खेडोक्गा छिॽवा मुन्डुम्चिङि निङ्ग्वा पिडुन्॥ नाङाना ओसाट्टोङि माङ्हाङ्ङि भाक्ति ठाङ्मा आप्पेलोङ्सा तालिम पिडु॥ 8 कोइ-कोइङा ओमाट्टुगा, “कासारत चोक्युङ् ओयेम् तालिम पिडुटु भोने ओचेट्नुना डोक् लियुक्, टरो माङ्हाङ्ङि भाक्ति ठाङ्मा तालिम पिडुटु भोने सोब्बे रिङ् ओचेट्नुना लियुक्॥ पोङ्भोने ना रिङ्ङाउम्बाक् याप्मि नाराङि वाना बेला हिट्नुङ् हान्डेङ्ना चोलाङि फाइदा लोङ्सा चा चामारसिङा चोगुटु॥” 9 ना रिङ् छेम्बा डोक् हिट्नुङ् सोब्बेङा बिस्वास चोक्मा कोन्युक्॥ 10 हिड्डेउङ् आन्याँ आसाम्बाक् उहिङ्ग्वाट् माङ्हाङ्ङि युङ्सुएसुम्मे हिट्नुङ् आनि आड्डिक् निङ्ग्वा पिडुमुङ् टोॽवा चोगुम्टुम्मा॥ उन् सोब्बे याप्मिचिगा काहिङ्मेप्बा डाङ्बा, हिट्नुङ् मुलि गारिम्बाक् उन्ङि बिस्वास काचोक्बाचिगा काहिङ्मेप्बा डाङ्बा ए॥ 11 नागा टोगा रिङ्चि डोक् हिसुक्टुचि हिट्नुङ् नागा रिङ् चोक्मा लोङ्सा आग्याँ पिडुचि॥ 12 खोनाङा चा खान् ठाङ्बेन् नुङ् मालोनिजान्याक्, टरो बिस्वासिचि माझाङि चेक्माजामा, नुना चाट्ला चोक्मा, माया चोक्मा, बिस्वासङि हिट्नुङ् सेङ्सेङ् वामाना रिङ्ङि नामुना लिसा॥ 13 आङा मिआप्मे सोम्मा धारमाछाप्ला पोढाँ चोगुङ् याप्मिचि खेम्मेट्टुचि, पारचार चोक्मा हिट्नुङ् हिसिक्माङि कानिङ्ग्वा पिडु॥ 14 खान्ङा आटोगुना बारदान खेडोक्ना पिक्सा मिट्टुन्, ना बारदान काचाहारि-कुन्डालङिगा ओठेडोङ्चिङा उन्चि मुक् खान्ङि उयुङ्सुनाँ माङ्हाङ् रिङ् कामाप्बालाम्मा आटोगुना डाना॥ 15 नागा रिङ्चि नुलोक् चोगु हिट्नुङ् सोब्बे कानिङ्ग्वा हिट्नि डोक् पिडुयाक्टु॥ हिट्डेउङ् खान्ङा ओचोगुना पारगाति सोब्बेङा उनिसुटु॥ 16 हिट्नुङ् खान्ङाना आप्पे बारेङि हिट्नुङ् आहिसिक्टुचिगा रिङ् बारेङि ओचाप्पाङ् लिसा॥ नागा रिङ् चोक्मा काइले चा नाडुन्॥ नाड्डे आचोगे भोने माङ्हाङ्ङा खान् आप्पेलोङ्सा हिट्नुङ् खान्ङा आमाट्टुगा रिङ् काखेम्बाचि चा हिङुचिचि॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.