१ तिमोथि 3 - आठपहरियामाङ्पाङ्ङिना ओठेडोङ्चि 1 ना माप्बालाक् रिङ् छेम्बा डोक्, “कोइ याप्मिङा माङ्पाङ्ङिना ओठेडोङ्ङाना टोॽवा चोक्माना निङ्ग्वा चोगुटु भोने, हिट्नाङा नुना टोॽवा चोक्माना डोक् निङ्ग्वा चोगुटु॥” 2 हिट्डेउङ् माङ्पाङ्ङिना ओठेडोङ्म्बाक् फाट्टुर मालेना लिमा कोन्युक्॥ उन्ङाना ठिबाङ् एडोक् ओटालिमाङ् लिमा कोन्युक्, काबुङि कायुङ्बा, सोब्बेङा मान् ओचोगुना, याप्मिचि ओटानाँ स्वागाट् काचोक्बा, सिकाँ चोक्मा काहिबा, 3 टेडुना माखाक्, खेमाबुङ्मा चोक्ना माखाक् टरो टोङ्ना, ओचाट्ला नुना लिसाना हिट्नुङ् ओफाबाङाना एडोक् टोम्जिरिॽवा लिमा लिनिना॥ 4 उन् ओपाङ्ठाङ् ओचेट्नुलोक् चालाँ काचोक्बा लिमा कोन्युक्, उइछाचि सोब्बे रिङ्ङि उन् मान् काचोक्चि हिट्नुङ् आग्याँकारि लिमा सिकाँ ओचोगुचियाक्॥ 5 खोना चा याप्मिङा आप्पे ओपाङ्ठाङ् नुलोक् खोड्डे पारिक् टोङ्माना हिट्ना निसुन्ना भोने, हिट्नाँ खोड्डे पारिक् माङ्हाङ्ङाना माङ्पाङ्ङिगा याप्मिचि टोङ्मा हिडुचिचिगा टे? 6 माङ्पाङ्ङिना ओठेडोङ् लोप्मो बिस्वास चोगुना लिमा लिनिना॥ हिट्डे लिसे भोने हिट्ना घामान्डि लियुक् हिट्नुङ् सैतानङा टोक्माना दान्डाङि ठायुक्॥ 7 उन्बाक् बिस्वास ओचोगुन्गेट्टुन्गा याप्मिचिङा चा नुना याप्मि नुङ् मिसेन् उनिसुना लिमा कोन्युक्, हिट्नुङ् एरोक् याप्मिचिङा उन् ओलोडुजोन्ना हिट्नुङ् सैतानङाना वारिक्ङि ठानिना॥ माङ्पाङ्ङि घुवार काफाबाचि 8 नाड्डेडोक् माङ्पाङ्ङिना डिकानचि मान् चोक्मा उनुगा हिट्नुङ् इमान्दारि लिमा कोन्युक्॥ हिट्नागा आड्डिक् टेडुबा हिट्नुङ् ओचाफेन्लोक् ओफाबा कामाँ चोक्मा निङ्ग्वा काचोक्बा लिमा लिनिना॥ 9 हिट्नागा पारकाट् लिसाना बिस्वासङाना बारेङिना छेम्बाना खाबोर चोखो मिप्माना बोल्ङा बिस्वास ओचोगुयाक्टुगा लिमाचि ओकोन्युक्॥ 10 पाइले हिट्नागाँगा निङ्ग्वा छिक्मा कोन्युक् हिट्नुङ् हिट्नागाँङि पाक्चा फाट्टुर टोक्नेएट्निना रिङ्ङाना पारमान् लिसे भोने, हिट्नागाँ डिकानङाना सेवा चोक्मा उहिडुटु॥ 11 हिट्डेडोक् हिट्नागाँगा उन्चि टालिमाङ्चि सोब्बेङा मान् ओचोगुना, आरुङागा बारेङि ओचाफेन्लोक् रिङ्पान् चोक्माना ओसाट्टोङि निङ्ग्वा काबुङि कायुङ्बा हिट्नुङ् सोब्बे थोक्ङि बिस्वासिलो लिमा कोन्युक्॥ 12 माङ्पाङ्ङिगा डिकानचिगा ठिबाङ् एडोक् टालिमाङ् लिमा कोन्युक्॥ हिट्नागा उन्चि छाचि लोक् उन्चि पाङ्ठाङ् ओचेट्नुलोक् टोङ्मा काहिबा लिमा कोन्युक्॥ 13 डिकानचिङा ओचेट्नुलोक् टोॽवा ओचोगुए भोने, हिट्नागाँ मान् इज्जात ओटोगुटु हिट्नुङ् खिरिस्ट येसुङि ओचोगुना बिस्वास आरुलोङ्सा मिकिट्ने माप्मा उहिडुटु॥ ठेना राहास्येङाना रिङ् 14 आङा खान्ङि एला डोक् आप्माना निङ्ग्वा चोगुङ् चा, नागा रिङ्चि खान्लाउङ्सा छेप्टुएट्टुङ्॥ 15 नाड्डेउङ् चा आङा खान्ङि आप्मा आबेला लिसाङे भोने, माङ्हाङ्ङाना ओयाप्मिचिङि आनि चाल चालान् खोड्डे पारिक् लिमा कोन्युक्ना हिट्ना खान्ङा ठाहा टोक्मा कोन्युक्॥ माङ्हाङ्ङाना ओयाप्मिचिउम्बाक् उहिङ्गुवाट् माङ्हाङ्ङाना माङ्पाङ् हिट्नुङ् ना छेम्बाना रिङ्ङाना ठोक्ला हिट्नुङ् ओजाग् ए॥ 16 आन्याँ साङ्का मिचोक्ङे ना राहास्ये आड्डिक् माङ्ठेना नुङ् बिस्वास चोगुम्टुम्मा– खिरिस्ट आप्पे याप्मिङाना येम्ङि ठेट्टे, हिट्नुङ् सेङ्सेङ्ना हाङ्साङा उन् धारमोति याप्मि नुङ् पारमान् चोगुए॥ माङ्हाङ् रिङ् काउग्बाचिङा उनिसुए, हिट्नुङ् ओचेलाचिङा छोङ्बा छोङ्बाचिङि पारचार ओचोगुए॥ नाराङिगा याप्मिचिङा उन् बिस्वास ओचोगुए, हिट्नुङ् माङ्हाङ्ङा उन् माहिमाङि टोनालोग्लेङ् फोगुवाट्टुए॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.