१ तिमोथि 2 - आठपहरियाबिन्टि चोक्माना बारे 1 हाट्ले आङा खानि लोनाँनि, सोब्बे नुङ्ना पाइले ख्वाप्पा याप्मिचि लोङ्सा बिन्टि चोगानुम्॥ हिट्नागा लोङ्सा माङ्हाङ्ङि याप्मिचि लोङ्सा घुवार नाक्टाबिडानुम्चिम्, आरुलोङ्सा आन्तार बिन्टि ठाङ्सानुम् हिट्नुङ् हिट्नागा लोङ्सा पोए-पोए ठाङ्सानुम्॥ 2 हिट्नुङ् हाङ्बाचि लोक् आरु सोब्बे सासाक्चि लोङ्सा बिन्टि ठाङ्सानुम्, हिट्डेउङ् आनि ढुक्का हिट्नुङ् हाङ्हाङ् लिसिउङ् सोब्बे बेला माङ्हाङ्ङि भाक्टि ठाक्सा लोक् सेङ्सेङ् लिसिउङ् हिङ्मा हिडिटि॥ 3 नाड्डेगा बिन्टि सोब्बे लोङ्सा ठाङ्मा आनि काहिङ्मेप्बा डाङ्बा माङ्हाङ्ङाना ओनाजारङि नुना हिट्नुङ् उनिङ्ग्वा टायुक्॥ 4 सोब्बे याप्मिचिङा मुक्टि ओटोगु हिट्नुङ् हिट्नागाँ छेम्बाना रिङ् बुजा ओचोगु नुङ् उनिङ्ग्वाङि युङ्ग्वा॥ 5 माङ्हाङ्उम् ठिबाङ् एना हिट्नुङ् माङ्हाङ् लोक् याप्मिचि माझाङि काटोङ्बा चा ठिबाङ् एना, हिट्ना याप्मिम्बाक् खिरिस्ट येसु ए॥ 6 ख्वाप्पा याप्मिचि छुट्कारा पिमा उन् भोक् लिसे॥ ना खाबोर डोक् माङ्हाङ्ङा नाराङिगा याप्मिचि ठिक्का बेलाङि डोक् पिडुचे॥ 7 हिट्ना उदेसेङि डोक् माङ्हाङ्ङा आङा पारचार काचोक्बा हिट्नुङ् मुलिचेला लिमा, पानिछोङ्बाचि लोङ्सा बिस्वास बारे हिट्नुङ् छेम्बाना खाबोर बारेङि हिसिक्मा उन्ङा याङ्सेगे॥ (आङा छेम्बा माट्टुटुङ्, टेप्निङ्ना॥) 8 हिट्नुङ् साब्बे डेन्ङि येम्बेछाचिङा उन्चि रेक् उचिमुङ् हिट्नुङ् खेमाबुङ्मा मिचोक्ङे सेङ्सेङ्ना उन्चि मुक्चि ओफोगुङ् माङ्हाङ्ङि बिन्टि ओठाङ्सुवाक् नुङ् आनिङ्ग्वाङि युङ्ग्वा॥ 9 हिट्डेडोक् मेन्झेमाचिङा चा ओचेट्नुलोक् उन्चि ओखान्डुना हिट्नुङ् मोम्मासिमा लिनिना पाराना लोट्लिङ् ओवाडुवाक्॥ हिट्नुङ् नाक्काल झाक्काल चोक्सा फ्याक् उखिक्टुङ्, साम्याङ् ओवाडुङ्, माहाङ्गो गारगाहाना आथाबा ओफाङ्-ओफाङ् लोट्लिङ् वाप्माङि एरोक् निङ्ग्वा उपिडुङ् आरु ओबान्डुन्चिन्चा॥ 10 टरो माङ्हाङ्ङाना सेवा काचोक् मेन्झेमाचिङा आप्पेलोङ्सा खान्डुना ओचेट्नुना टोॽवा एरोक् ओचोगुवाक्॥ 11 मेन्झेमाचिङा स्वाग् हिट्नुङ् आड्डिक् रिङ् काखेम्बा उलियुङ् सिकाँ लिमा कोन्युक्॥ 12 मेन्झेमाचिङा येम्बेछाचि उहिसिक्टुचिगा हिट्नुङ् येम्बेछाचि उछिक्ङि चोक्मालोङ्सा आनुमोति आङा पिनिङ्चिङ्गा॥ हिट्नागा स्वाक् युङ्मा कोन्युक्॥ 13 पोङ्भोने पाइलेम्बाक् माङ्हाङ्ङा हाब्बा माखाक् आदाम चोगुए॥ 14 हिट्नुङ् मेन्झेमाम्बाक् सैतानङा टेप्टुए हिट्नुङ् कायाङ्छाबा लिसे, आदाम माखाक्॥ 15 टरो मेन्झेमा सोरोक् लाच्छिन्ङि, बिस्वासङि, माया चोक्माङि, हिट्नुङ् सेङ्सेङ्ङि युङे भोने छाडाङ्मा लिना बेला उन् हिङ्युक्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.