१ तिमोथि 1 - आठपहरिया1-2 बिस्वासङि आप्पे आइछा गाड्डेना तिमोथि, आनि काहिङ्मेप्बा डाङ्बा माङ्हाङ् हिट्नुङ् आसा युङ्सुम्ना खिरिस्ट येसुङाना आग्याँ गाड्डे आङा खिरिस्ट येसुङाना मुलिचेला पावाललाम्मा ना चिट्ठि खान् लोङ्सा छेप्टुएट्टुङ्॥ आनि माङ्हाङ् पाबा हिट्नुङ् आनि टाङ्बा खिरिस्ट येसुङाना मायादाया, लुक्माटुक्मा लोक् हाङ्हाङ् खान्ङि उलियाक्॥ माङ्जोना हिसिक्मालाम्मा ओछेक्छेक् चोगानि 3 आङा माकेडोनिया खाडाङ्ना बेला खान् आनुरोध चोक्ना गाड्डे डोक् एफिसास खालाङ्गाङि डोक् युङा, हिट्नुङ् माङ्जोगा रिङ् काहिसिक्बाचि हिट्नाडे चोक्नेनिन् नुङ् आग्याँ पिडुचि, 4 हिट्नुङ् हिट्नागाँ माङ्जोगा छिॽवाक् मुन्डुम्ङि हिट्नुङ् टुबाठेबाचिगा छोप्निना बाङ्सावालिलेङ् निङ्ग्वा उपिडुन्चा॥ नाड्डेगा रिङ्ङा माङ्हाङ्ङाना योजाना माखाक् खेमाबुङ्माना रिङ् एरोक् होन्युक्, माङ्हाङ्ङाना टोॽवाउम् बिस्वास काचोक्बा याप्मिङा एडोक् चोक्मा हिडुटु॥ 5 ना आग्याँङाना मुलि रिङ्उम्बाक् माया ए, नाउम्बाक् चोखो निङ्ग्वा, ओचेट्नुना मिप्माना बोल् हिट्नुङ् छेम्बाना बिस्वासलाम्मा होन्युक्॥ 6 आम्टेप्मा याप्मिचि नागा ख्वाप्पा रिङ्चि ओनाडुङ् खेरोक्गा रिङ्चिङि ओबान्डाइसे॥ 7 हिट्नागा मोसाङाना धारमाबिधि काहिसिक्बा लिमा ओकोन्गा, टरो हिट्नागा आप्पेङा ओमाट्टुना रिङ् हिट्नुङ् ना छेम्बाना ए पिक्सा ओमाट्टुना रिङ् हिट्नागाँ आप्पे बुजा ओचोगुन्गा॥ 8 धारमाबिधिङिना रिङ् नुलोक् चालाँ चोगुम्नाँ नुना डोक् लियुक् नुङ् आनि सोब्बेलोङ्सा ठाहा युङ्ग्वा॥ 9 नागा रिङ् चा आनिलोङ्सा ठाहा युङ्ग्वा, धारमाबिधि नुना याप्मि लोङ्सा चोक्बालाक् माखाक्, टरो धारमाबिधि ओटेन्निगा हिट्नुङ् बिरोधिचि, माङ्ध्यान् ओचोक्निगा हिट्नुङ् पापिचि, निङ्ग्वा ओचाफेन्गा हिट्नुङ् माङ्हाङ् बिरोध काचोक्चि, पाबा-मामा कासेट्चि, याप्मि कासेट्चि, 10 इम्मेप्माजामा टोॽवा काचोक्बाचि, येम्बेछा-येम्बेछा हिट्नुङ् मेच्छेमा-मेच्छेमा इम्मेप्माजामा टोॽवा काचोक्बाचि, याप्मि काछोङ्बाचि, माङ्जो काचेक्बाचि, माङ्जो साँचि कापिचि हिट्नुङ् नुना हिसिक्माङाना बिरुद्दाङि टोॽवा काचोक्चि लोङ्सा चोक्बालाक् ए॥ 11 ना छेम्बाना हिसिक्मा आसिक् कापिबा माङ्हाङ्ङाना माहिमित नुना खाबोर गाड्डे युङ्ग्वा॥ माङ्हाङ्ङा बिस्वास याङ्चोगाउङ् ना नुना खाबोर आङा याङ्पिडे॥ लुक्माटुक्मा लोङ्सा पावालङाना पोए-पोए 12 ना टोॽवा चोक्मालोङ्सा आङा बोल् कापिबा आनि टाङ्बा खिरिस्ट येसु लोङ्सा पोए-पोए लोडुङ्टुङ्॥ उन्ङा डोक् बिस्वासिलो ठानाँ याङ्चोगे हिट्नुङ् ओसेवा चोक्मालोङ्सा याङ्सेगे॥ 13 हिट्नुङ् चा आङा उन् खिसि चोगुङे, बिस्वासिचि याङ्छामा हिट्नुङ् ओचाफेन्लोक् मेट्टुङ्चिङे, नागा ख्वाप्पा थोक् आङा ठाहा मिटोक्ङे हिट्नुङ् बिस्वास माले चोगुङ्नाँ आङा मायादाया टोगुङे॥ 14 हिट्नुङ् आनि टाङ्बाङाना मायादाया माङ्जोम् याङ्ठेन्डाबिडे, हिट्नुङ् खिरिस्ट येसुलाम्मा टोगुम्ना बिस्वास लोक् माया चा उन्ङा डोक् आङा याङ्पिडे॥ 15 “खिरिस्ट येसु कायाङ्छाबाचि हिङ्मेप्माउङ्सा डोक् ना नाराङि टाए”, ना रिङ् छेम्बा डोक् ए हिट्नुङ् सोब्बेङा बिस्वास चोक्मा कोन्युक्॥ हिट्नुङ् कायाङ्छाबाचि माड्डे आङाम्बाक् सोब्बे नुङ्ना औधि कायाङ्छाबा याप्मि॥ 16 टरो येसु खिरिस्टङा उन्ङि बिस्वास ओचोगुङ् लाट्निना चोला काटोक्चि लोङ्सा उन्ङा चोगुना धैइरेताङाना सिको काचोग्बा लिमा उहिङा नुङ् आङा गाड्डेना सोब्बे नुङ्ना औधि पापि याप्मि उन्ङा लुक्मा याङ्टुक्टे॥ 17 हाट्ले सोरोक् सासान् काचोक्बा हाङ्बा, खोना बेला चा सिनिना हिट्नुङ् निमा हिनिम्ना ठिबाङ् माङ्हाङ्लोङ्सा सोरोक् आदार लोक् माहिमा उलियुयाक्याक्॥ आमेन्॥ 18 आइछा गाड्डेना तिमोथि, आङा खान् ना आग्याँ पिनाँ, खान्ङाना बारेङि पाइला डोक् माङ्हाङ् रिङ्लाम्मा माट्टि गाड्डे, हिट्नागा रिङ्लाम्मा आँट् टोगुङ् नुना खाबोर लोङ्सा नुलोक् टोॽवा चोगु॥ 19 खान्ङाना बिस्वास लोक् चोखो मिप्माना बोल् युङ्सुयाक्टु॥ आम्टेप्मा याप्मिचिङा उन्चिङा मिप्माना बोल् खेम्मा इन्कार ओचोगुए, हिड्डेउङ् उन्चि बिस्वास डोक् जाखाम् ओचोगुए॥ 20 हिट्नागा माड्डेङि हुमेनियस लोक् आलेक्जेन्डर ए, नागाचिङा माङ्हाङ् लोमाजामा लिनिना नुङ् सिकाँ उलिच्याक् नुङ् आङा नागाचि बिस्वासिचिलाम्मा साम्डुङ्चिउङ् सैतानङाना उमुक्ङि पिडोएसुङ्चिङे॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.