१ थेसालोनिकि 4 - आठपहरियामाङ्हाङ्लोङ्सा निङ्ग्वा टाना चोला 1 हाट्ले भुम्भु-झान्झाचि हिट्नुङ् आनो-आन्झाचि, माङ्हाङ् खुसि मेप्मा खोड्डेना चाट्ला लिमा कोन्युक्ना हिट्ना बारेङि सिकाँ चोक्नैनाने, हिट्नुङ् हिट्ना पारा डोक् खानि आचोगेट्टि, हिट्नुङ् हाट्ले चा हिट्डे चोक्मा पोसा खाडानि नुङ् टाङ्बा येसुङि लोनाँनि, हिट्नुङ् बिन्टि चोगुम्टुम्मा॥ 2 पोङ्भोने खानि हिसिक्मा लोङ्सा टाङ्बा येसुङा आन्याँ खोना-खोना आदेसचि याप्मि पिडेना हिट्ना खानिङा ठाहा आटोगुएसुम्मे॥ 3 हिट्नुङ् खानि सेङ्सेङ् लिसानि नुङ् माङ्हाङ्ङाना उनिङ्ग्वा युङ्ग्वा, नाड्डेउङ् इम्मेप्माजामा टोॽवालाम्मा लाप्माङ् युङानि॥ 4 खानि सोब्बेङा खानि येम् खोड्डे पारिक् काबुङि युङ्मा हिट्नुङ् सेङ्सेङ् हिट्नुङ् याप्मिङा मान् ओचोगुना चोला लिमा कोन्युक्ना हिट्ना रिङ् ठाहा टोक्मा कोन्युक्॥ 5 टरो माङ्हाङ् मिसेन् उनिसुन्गेट्टुन्गा पानिछोङ्बा याप्मिचि गाड्डे इम्मेप्माजामा टोॽवाङि निङ्ग्वा छोम्बोक् चोक्सा युङ्नेनिन्॥ 6 हिट्नुङ् ना रिङ्ङि साङा चा आप्पे बिस्वासि भुम्भु-झान्झाचि बिरुद्दाङि पाप ओचोगुन्चा आथाबा उसुबुन्चिन्चा, पोङ्भोने नाड्डेगा रिङ् काचोक्चिलाउङ्सा टाङ्बाङा डोक् साजाए पिडुचिचि नुङ् आन्याँ पाइले डोक् नागा रिङ् बारेङि नुलोक् ओछेक्छेक् चोक्नाइने॥ 7 पोङ्भोने माङ्हाङ्ङा आनि आसुद्दो चोलाङि वामा माखाक्, टरो सेङ्सेङ्ना चोलाङि वामाउङ्सा आछेम्डाना ए॥ 8 हिड्डेउङ् जुन्ङा ना रिङ् इन्कार चोगुटु हिट्नाङाम्टे याप्मिङाना माखाक्, टरो माङ्हाङ् इन्कार चोगुटु, उन्ङा डोक् आप्पे उन्ङाना सेङ्सेङ्ना हाङ्सा आपियुक्॥ 9 हाट्ले बिस्वासि भुम्भु-झान्झाचि हिट्नुङ् नाना-झान्झाचिङि माया चोक्माना बारेङि टे खानिलोङ्सा छेप्मा कोन्ना खोना रिङ् चा वाइना, पोङ्भोने माङ्हाङ्ङा खानि आप्पे आप्पेङि खोड्डे पारिक् माया चोक्मा कोन्युक्ना नुङ् माहिसिक्टेसे॥ 10 छेम्बा डोक्, खानिङा माकेडोनिया छेट्राङिगा ख्वाप्पा बिस्वासि भुम्भु-झान्झा हिट्नुङ् नाना-झान्झाचिलाउङ्सा माया आचोगुएसुम्चिम्मे॥ हिट्नुङ् भुम्भु-झान्झा हिट्नुङ् नाना-झान्झाचि हाट्ले चा जोम् माया चोगानुम्चिम् नुङ् खानि आनुरोध चोक्नानि॥ 11 आन्याँ खानि पाइले लोनानि गाड्डे डोक् हाङ्हाङ्ङाना चोलाङि वामाउङ्सा निङ्ग्वा पिडानुम्॥ आप्पे खानि टोॽवाङि एरोक् ख्याल चोगानुम् हिट्नुङ् आप्पे डोक् टोॽवा चोगानुम्॥ 12 हिड्नाड्डेउङ् बिस्वास ओचोगुन्गाँ चा खानि मान् माचोगिटि, हिट्नुङ् खानि चाहाब् आलिसिनाँ साक्लोक् चा भोर चोक्मा कोन्निना॥ टाङ्बा उङ्युगेट् 13 हाट्ले भुम्भु-झान्झा हिट्नुङ् नाना-झान्झाचि, उसियागा याप्मिचि बारेङि पाक्चा ठाहा टोक्नेनुम् नुङ् आङा खानि लोनेनिन्गा, हिट्नुङ् खानि आरु आसा मालेगा याप्मिचि गाड्डे सानिङ्ग्वा लिनेनिन्॥ 14 हिट्नुङ् येसु सियाउङ् उहिङ्ग्वाट् लिसा कोबाना रिङ् आनि बिस्वास चोगुम्टुम्, हिट्नुङ् नाड्डेउङ् डोक् माङ्हाङ्ङा येसुङि बिस्वास ओचोगुङ् उसियागालाउङ्सा उन्लोक् एक्केउ खाट्टुचिचि॥ 15 टाङ्बाङा आप्पे माट्टुना उरिङ्लाम्मा आन्याँ खानि लोनाँनि, टाङ्बा उङ्ना लेम्बा सोम्मा आनि काहिङ्बाचिङा हिट्नागा उसियाडागालोङ्सा खोनाङा चा काक्मा हिनिम्चिम्गा॥ 16 पोङ्भोने टाङ्बा आप्पे ठेना आग्याँङाना ओसोराङि, मुलि माङ्हाङ् रिङ् काउग्बाङाना ओसोरा हिट्नुङ् माङ्हाङ्ङाना धुटुरिबा ओटेनुना बेला टोनालोग्लाम्मा उङ्युग्, हिट्नुङ् खिरिस्टङि बिस्वास ओचोगुङ् उसियागाउम्बाक् सोब्बे नुङ्ना पाइले उहिङ्ग्वाट् उलियुङ् ओकोप्युक्॥ 17 हिट्नुङ्ना आनि हिङेसिगा हिट्नुङ् नाडिढाइसिगाम्बाक् टाङ्साङ्ङि टाङ्बा टुब्सिङा माङ्हाङ्ङा एक्के खेप् हिट्नागालोक् आछुम्युङ् खिमेमाङि आफोक्युङ् आखाट्युक्, हिट्नुङ् आनि सोरोक् डोक् टाङ्बालोक् वासिटि॥ 18 नाड्डेउङ् नागा रिङ्लाम्मा ठिबाङ्ङा आरको आँट् पिडानुम्चिम्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.