१ थेसालोनिकि 3 - आठपहरियातिमोथि थेसालोनिकिङि 1 हिट्डेउङ् खानिलोक् याप्मा बेला सोम्मा मिटुप्मे युङ्मा आन्याँ ओचेट्नुलोक् लोसेट्टिन्ना, हिट्नुङ् आन्याँ एथेन्स खालाङ्गाङि तिमोथि माले डोक् युङ्मा नुयुक् नुङ् निङ्ग्वा चोगुम्मे॥ 2 हिट्नुङ् आनि झान्झा तिमोथिम्बाक् आनिलोक् एक्केउ टोॽवा चोक्ना खिरिस्टङाना नुना खाबोर पारचार काचोक्बा माङ्हाङ्ङाना सेवाक ए॥ खानि बिस्वासङि दोरो चोक्मा हिट्नुङ् बिस्वासङि आँट् पिमालाउङ्सा खानिङि उन् डोक् पाङ्सुम्मे॥ 3 हिट्डेउङ् नाड्डेगा याङ्छामा लिनाँ साङा चा हारेस ओचोन्चा॥ नाड्डेगा याङ्छामाउङ् आङ्मा लाउङ्सा आनिम्बाक् आसेगिगा नुङ् खानि आप्पेङा नुलोक् ठाहा आटोगुएसुम्मे॥ 4 पोङ्भोने आन्याँ खानिलोक् वासिङाना बेला डोक् आन्याँ याङ्छामा आङ्मा कोन्युक् नुङ् पाइला डोक् लोनानिगा डागा॥ छेम्बा डोक् आन्याँ माटुम्माना गाड्डे लिसे, हिट्ना रिङ् खानिङा ठाहा आटोगुमे॥ 5 हिड्नाड्डेउङ् आङा आरु याप्मा आङ्मा हिनेट्निउङ् खानि बिस्वास दोरो युङ्ग्वानि वाइना इ नुङ् ठाहा टोक्मा लोङ्सा खानिलोक् टुब्सिङा तिमोथि पाङ्सुङे, पोङ्भोने निङ्ग्वा काछिक्बाङा खानि निङ्ग्वा छिक्टुङ् वारिक्ङि माठेन्डिए होला हिट्नुङ् आन्याँ चोगुम्माना टोॽवा खेरोक् डोक् लियुक्नि नुङ् आङा किट्टाइसाङ्ना॥ 6 टरो हाट्ले तिमोथि खानिलाम्मा टायाउङ् खानिङि लिसाना बिस्वास हिट्नुङ् मायाङाना बारेङि ओचेट्नुना खाबोर टाडुएसुए॥ खानि ख्वाप्पाङा आन्याँ माया याप्मि आचोगाउङ् सोरोक् याप्मिआमिट्टाना हिट्नुङ् आड्डिक् टुब्माना निङ्ग्वा आचोगुम्ना रिङ् याप्मिलोडाइसे॥ आन्याँना चा खानि टुब्माना निङ्ग्वा आड्डिक् युङ्ग्वा॥ 7 हिट्डेउङ् भुम्भु-झान्झाचि, खानिङि लिसाना बिस्वासङाना खाबोर खेम्सुमुङ् आन्याँङि लिसाना ख्वाप्पा याङ्छामा हिट्नुङ् निङ्ग्वा सागुङि चा आन्याँ निङ्ग्वा आड्डिक् भेरेङ् लिसे॥ 8 हिट्नुङ् खानि टाङ्बाङि बोलियो आलिसिगा रिङ् खेम्सुम्मानाँ छेम्बा डोक् आन्याँ सोक्मा टाइसे॥ 9 खानि लोङ्सा माङ्हाङ्ङि आड्डिक् पोए-पोए ठाङ्सुम्मा चा हिट्ना खाट्टिप्मा लियुक्, पोङ्भोने खानिङा आचोगुम्नाँ आनि माङ्हाङ् ओटोकानाङि आन्याँ आड्डिक् हारका लिसिएसिङे॥ 10 खानिलोक् फेरि टुब्माहिडिङा हिट्नुङ् खानिङि लिसाना बिस्वासङाना आभोर पुरो चोक्मा उहिडुमा नुङ् आन्याँ निङ्ग्वालाम्मा डोक् खानिलाउङ्सा लेन्सेन् बिन्टि चोगेट्टिङा॥ 11 हाट्ले आनि माङ्हाङ् हिट्नुङ् पाबा आप्पेङा डोक् हिट्नुङ् आनि टाङ्बा येसुङा खानि सोरि आप्मा लोङ्सा आन्याँ लाम्बो टेयार याप्मि आचोक्युबियाक्॥ 12 हिट्नुङ् आन्याँ खानि माया चोक्नानि गाड्डे डोक् टाङ्बाङा खानि चा आप्पे आप्पेङि हिट्नुङ् सोब्बे याप्मिचिङि जोम् माया काचोक् लिमा घुवार माफाड्याक्॥ 13 नाड्डेउङ् उन्ङा खानि बिस्वासङि बोल्लेउ लिमा घुवार माफाडिटि, हिट्नुङ् आनि टाङ्बा येसु उन्ङाना ख्वाप्पा सेङ्सेङ्गा ओयाप्मिचिलोक् उङ्ना बेला आनि माङ्हाङ् पाबाङाना ओटोकानाङि खानि सेङ्सेङ् हिट्नुङ् फाट्टुर माले आलिसिटि॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.