१ थेसालोनिकि 2 - आठपहरियाथेसालोनिकेङि पावालङाना टोॽवा 1 आम्भु-आझान्झाचि हिट्नुङ् आनो-आन्झाचि, आनि टुबिजाइउङ् नुलोक् डोक् लिसाना रिङ् खानिङा ठाहा आटोगुएसुम्मे॥ 2 खानिङि आप्मा पाइले फिलिप्पिङि आन्याँ याङ्छामा याङ्ओचाट्टाना हिट्नुङ् ओचाफेन्लोक् याप्मि ओमेट्टाना रिङ् खानिङा ठाहा आटोगुएसुम्मे, टरो औधि बिरोध लिसा चा माङ्हाङ्ङाना नुना खाबोर माट्मा माङ्हाङ्लाम्मा आन्याँ आँट् टोगुमे॥ 3 पोङ्भोने आन्याँ लोनानिगा रिङ् माङ्जोना आथाबा ओचोफेन्ना निङ्ग्वालाम्मा टायाना माखाक्, हिट्नुङ् साक्चा ढाँट् फोक्माना रिङ् चोक्निम्गेट्निम्मागा॥ 4 हिट्ना ओसाट्टोङि, माङ्हाङ्ङा आन्याँ उन्ङाना टोॽवा चोक्मा काहिबा याप्मिचोगाउङ् डोक् नुना खाबोर खेम्मेप्माना जिम्मा याप्मिपिडे॥ नाड्डेउङ् आन्याँ याप्मिचि खुसि मेप्मा माखाक्, टरो आनि निङ्ग्वा काछिक्बा माङ्हाङ् खुसि चोक्मा एलोक् आन्याँ चेक्टिटिङा॥ 5 खानिङा नुलोक् ठाहा आटोगुएसुम्मे, आन्याँ खानिलोक् लेगालाप्माना रिङ्पान् चा चोक्नेट्निम्मा, हिट्नुङ् सोगोप् पालोवालो टोक्माना आसाङि पाक्चा चोग्नेएट्निम्मा॥ ना रिङ्ङाना साँचि माङ्हाङ् वाहेट्॥ 6 आन्याँ खिरिस्टङाना मुलिचेला लिसिङानाँ खानि उठुङ्ङि आधिकार बे चालाँ चोक्मा हिडुम्मे बे॥ हिड्डे लिसा चा आन्याँ याप्मिचिलाम्मा, खानिलाम्मा हिट्नुङ् आरु साक्लाम्मा चा मान् कोन्नेट्निम्मा॥ 7 टरो उमाङा उइछा स्याहार चोगु गाड्डे डोक् आन्याँ खानि सोरि खाट्टियुना गोलो लिसिङे॥ 8 आन्याँ खानि माया आड्डिक् लोसिङाउङ् माङ्हाङ्ङाना नुना खाबोर एडोक् माखाक्, टरो आन्याँ चोला चा खानि लोङ्सा पिमा टेयार लिसिङे, पोङ्भोने खानि औधि जोम् निङ्ग्वाङिगा याप्मिचि आलिसिएसिगा॥ 9 भुम्बु-झान्झाचि हिट्नुङ् आनो-आन्झाचि, आन्याँ टोगुम्माना याङ्छामा लोक् चोगुम्ना मिहिनेत खानिङा आमिट्टुएसुम्मे॥ खानि खोनालाउङ्सा चा दुखे उलिनि चा नुङ् लेम्बासेम्बा टोॽवा चोगिङाउङ् माङ्हाङ्ङाना नुना खाबोर खानि लोङ्सा आन्याँ पारचार चोगुम्मे॥ 10 खानि बिस्वासिचिलोक् वासिङाना आन्याँ खोड्डे पारिक् सेङ्सेङ्, धारमोति, हिट्नुङ् फाट्टुर माले लिसिङाउङ् वासिङे, ना रिङ्ङाना साँचि खानि हिट्नुङ् माङ्हाङ् चा वाहेट्॥ 11 हिट्नुङ् खानिलोङ्सा ठाहा युङ्ग्वा, उप्पाङा आप्पे उइछाचि नुलोक् चाट्ला चोगुचि गाड्डे डोक् आन्याँ खानि सोब्बेलाउङ्सा सिकाँ चोक्नाने॥ 12 हिट्नुङ् आन्याँ खानि आरति-उपादेस पिनाने, आँट् पिनाने, हिट्नुङ् आनुरोध चोक्नाने, हिट्डेउङ् खानि चाल चालान् माङ्हाङ्ङा निङ्ग्वा टासुना उलियाक्॥ हिट्नुङ् उन्ङा खानिलाउङ्सा उमुलुक्ङि हिट्नुङ् माहिमाङि माछेम्डिटि॥ 13 हिट्नुङ् आन्याँ चा माङ्हाङ्ङि पोए-पोए ठाङ्सुम् याक्टुम्टुम्मा, पोङ्भोने खानिङा आन्याँलाम्मा आखेम्सुम्ना माङ्हाङ्ङाना रिङ् खानिङा याप्मिङाना रिङ् गाड्डे माखाक्, टरो माङ्हाङ्ङाना रिङ् डोक् नुङ् आलाडुमे॥ छेम्बा डोक् ना माङ्हाङ् उरिङ् डोक्॥ ना रिङ् डोक् बिस्वास काचोक् खानिङि टोॽवा चोगुएट्टु॥ 14 आभुम्भु-आझान्झाचि हिट्नुङ् आनो-आन्झाचि, खानि चा खिरिस्ट येसुङि बिस्वास काचोक् याहुदियाङि उलिसागा माङ्हाङ्ङाना माङ्पाङ्ङिगा सिको काचोक्बा आलिसिए, पोङ्भोने याहुदियाङिगा माङ्पाङ्ङिगाँ आप्पे खानिगा देसङिगा याहुदिचिलाम्मा याङ्छामा ओआङ्डु गाड्डे डोक् खानिङा चा आप्पे छोङ् याप्मिचिलाम्मा याङ्छामा आङ्डुम्मे॥ 15 याहुदिचिङा डोक् टाङ्बा येसु लोक् माङ्काटाचि ओसेडुचे, हिट्नुङ् आन्याँ चा याप्मिउरिक्टे॥ हिट्नागाँ माङ्हाङ् उनिङ्ग्वा टानिना टोॽवा ओचोगुगा हिट्नुङ् सोब्बे याप्मिचि बिरोध ओचोगुचिगा॥ 16 हिट्नागाँ आन्याँलाउङ्सा पानिछोङ्बाचि लाउङ्सा मुक्टि टोक्माना रिङ् पारचार चोक्मा याप्मि छाक्मा ओकोले॥ नाड्डे ओचोगुङ् हिट्नागाँ सोरोक् पाप चोक्सा ओखाडे॥ टरो आखेरिङि माङ्हाङ्ङाना ओरेक् हिट्नागा उठुङ्ङि ठाइसे॥ 17 हाट्ले आभुम्भु-आझान्झाचि हिट्नुङ् आनो-आन्झाचि, आन्याँ खानिलाम्मा छोप्मोङ् लाउङ्सा एडोक् साम्डिङा चा, निङ्ग्वाङि भोनेउम्टे साम्डिन्गेट्टिन्गा॥ हिट्नुङ् खानिङि नोक्मा आप्माना लोक् फेरि टुब्माना आन्याँ निङ्ग्वा आड्डिक् लोसाइसे॥ 18 पोङ्भोने आन्याँ खानि सोरि आप्माना निङ्ग्वा चोगुम्मे॥ हिट्नुङ् आङा पावालङाम्बाक् खानि टुब्मा आप्मा निङ्ग्वा चोगुङ्याक्टुङ्ङे, टरो सैतानङा आन्याँ याप्मिछाक्टे॥ 19 पोङ्भोने आनि टाङ्बा येसु उङ्ना बेला उन् सोरि आन्याँ ठेलोक् चोग्माना मुकुट्, आन्याँ आसा, हिट्नुङ् आनान्दा खानि डोक्, पाक् खानि डोक् माखाइ टे? 20 छेम्बा डोक् आन्याँना निङ् कायुङ्बा हिट्नुङ् आनान्दा खानि डोक्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.