१ थेसालोनिकि 1 - आठपहरिया1 थेसालोनिकि माङ्पाङ्ङिगा माङ्हाङ् पाबा हिट्नुङ् टाङ्बा येसु खिरिस्टङि बिस्वास काचोक्चिलाउङ्सा आङा पावाल, सिलास लोक् तिमोथिलाम्मा ना चिट्ठि छेप्टुएट्टुम्मा॥ खानिलोङ्सा मायादाया लोक् हाङ्हाङ् उलियाक्॥ थेसालोनिकिङिगा बिस्वासिचिगा बिस्वास 2 आन्याँ खानि सोब्बे लाउङ्सा बिन्टि चोगुमुङुङ् माङ्हाङ् सोरोक् पोए-पोए ठाङ्सुम्टुम्मा॥ 3 आनि माङ्हाङ् पाबा ओटोकानाङि आनि टाङ्बा येसुङि खानिङा बिस्वास आचोगुम्मुङ् आचोगुम्ना टोॽवा, मायालोक् आचोगुम्ना दुखे हिट्नुङ् खानिङा आनि टाङ्बा येसु खिरिस्टङि आयुङ्सुम्ना आसाङि याङ्छामा आङ्डुम्ना रिङ् आन्याँ सोरोक् मिट्टुम्टुम्मा॥ 4 माङ्हाङ्ङा माया माचोगिगा भुम्बु-झान्झाचि हिट्नुङ् आनो-आन्झाचि, उन्ङा खानि मासेगिगा रिङ् आन्याँ ठाहा टोगुएसुम्मे, 5 पोङ्भोने आन्याँ खानि लोनानिगा नुना खाबोर रिङ्ङि एडोक् माखाक्, टरो साक्ति, सेङ्सेङ्ना हाङ्सा हिट्नुङ् साङ्का डोक् मालेना छेम्बाना रिङ् डाना॥ खानिलोक् आन्याँ वासिङानाँ खानिना ओचेट्नु लाउङ्सा आन्याँ खोड्डेना चाट्ला चोक्नानेना नुङ् खानिङा ठाहा आटोगुम्टुम्॥ 6 खानिङा आन्याँना हिट्नुङ् टाङ्बाङाना सिको चा आचोगुमे॥ हिट्नुङ् आम्टेप्मा याङ्छामा आङ्डुमुङ् चा खानिङा सेङ्सेङ्ना हाङ्साङा मापिडिगा खाबोर खुसिलोक् आलाडुमे॥ 7 नाड्डेउङ् खानि माकेडोनिया हिट्नुङ् आखैयाङिगा सोब्बे बिस्वासिचिङि खानि नामुना आलिसिए॥ 8 पोङ्भोने खानिलाम्मा माकेडोनिया हिट्नुङ् आखैया छेट्राङि एडोक् टाङ्बाङाना रिङ् पारचार लिनेट्नि, टरो माङ्हाङ्ङि खानिङा आचोगुम्ना बिस्वासङाना रिङ् सोब्बेलेङ् छिन्डाइसे॥ हिट्डेउङ् ना बारेङि आन्याँ आरु साक्चा पाक्चा लोमाचि कोन्नेएट्नि॥ 9 आन्याँ खानिङि आबिङानाँ खानिङा खोड्डे पारिक् आन्याँ स्वागाट् याप्मि आचोगेना, हिट्नुङ् खानि साम्माङ्चि साम्माङ् चोक्मा आनाडुमुङ् उहिङ्ग्वाट् हिट्नुङ् छेम्बाना माङ्हाङ् सेवा चोक्मा आनोक्टिगा, हिट्ना रिङ्उम्टे हिट्नागा याप्मिचिङा डोक् ओमाट्टुएसुए॥ 10 हिट्नुङ् खानिङा टोनालोग्लाम्मा उङ्ना उन्ङाना छाङाना लाम्बो आपुयुएट्टुम् बो नुङ् ओमाट्टुए॥ हिट्ना येसु डोक् उन्ङा सियानालाम्मा उहिङ्ग्वाट् चोगुए, हिट्नुङ् उन्ङा डोक् टायुगेट्ना माङ्हाङ्ङाना उकुन्जिरिॽवालाम्मा आनि छुट्कारा आपियुक्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.