१ पाटरुस 5 - आठपहरियामाङ्हाङ्ङाना ओठेडोङ्चि बारे 1 हाट्ले माङ्पाङ्ङिगा ओठेडोङ्चि लाउङ्सा आङा ठिक् रिङ् लोनाँनि॥ आङा चा माङ्पाङ्ङिना ओठेडोङ् डोक् हिट्नुङ् खिरिस्टङा आङ्डुना याङ्छामा आङा आप्पे निसुएसुङ्ङे॥ हिट्नुङ् ठेट्टा लाबाना माहिमाङि साहाभागि आङा चा लिङा॥ आङा खानि साइबा ओठेडोङ् लिसाङ्नाँ खानि लोनाँनि, 2 माङ्हाङ्ङा खानि जिम्माङि मापिडिगा ठुँबाचि निङ्ग्वा मिटाए मिटाए माखाक्, टरो खानि निङ्ग्वालाम्मा डोक् ओचेट्नुलोक् पुयानुम्चिम्॥ ओफाबा टोक्माउङ्सा माखाक्, टरो माङ्हाङ्ङाना उनिङ्ग्वा गाड्डे सेवा चोक्माना निङ्ग्वाङा ना टोॽवा चोगानुम्॥ 3 खानि जिम्माङि उलिसागा सासान् चोक्मा माखाक्, टरो हिट्नागा लाउङ्सा ओचेट्नुना सिको चोक्माना लिसानि॥ 4 जब मुलि कापुबा ठेट्युक्, हिट्ना बेला खानिङा सोरोक् ओम्युयाक्ना माहिमा लोक् मान्ङाना मुकुट् आटोगुम्टुम्॥ 5 हिट्नाड्डे डोक् ठाङ्बेन् याप्मिचि, खानि माङ्पाङ्ङिगा एल्डारचिगा आधिन्ङि युङानि॥ खानि ख्वाप्पा मेयोक् लिसानिउङ् युङानि हिट्नुङ् ठिबाङ्ङा आरकोङाना सेवा चोगानुम्॥ पोङ्भोने धारमाछाप्लाङि नाड्डे छेप्टेसे, “माङ्हाङ्ङा ओठेयुजागा याप्मिचि बिरोध चोगुचिचि, टरो मेयोक् उलिगा याप्मिचि मायादाया चोगुचिचि॥” 6 हिड्डेउङ् माङ्हाङ्ङाना बोल्लेउ उमुक्ङि आप्पे लाउङ्सा मेयोक् चोगानुम् हिट्नुङ् उन्ङा ठिक्का बेलाङि डोक् खानि माचोन्डिटि॥ 7 खानिगा सोब्बे सुरटा उन्ङि युङ्सानुम्, पोङ्भोने उन्ङा डोक् खानि मापुइटि॥ 8 ओछेक्छेक् युङानि हिट्नुङ् ओचाप्पाङ् लिसानि॥ खानि साट्टुर सैतान खोना टुबुङुङ् जाखाम् चोगुङ् नुङ् गुरलुम् गुरलुम् राट्ना किबा गाड्डे डोक् सुक्सा वायुगोन्॥ 9 बिस्वासङि बोल्लेउ लिसानिउङ् सैतानङाना बिरोध चोगानुम्, पोङ्भोने खानि गाड्डे डोक् नाराङिगा ख्वाप्पालेङ् आरु बिस्वासि भुम्भु-झान्झाचि हिट्नुङ् नाना-झान्झाचिङा चा नाड्डेगा याङ्छामा ओआङ्डुएट्टुगा रिङ् खानिलोङ्सा ठाहा युङ्ग्वा॥ 10 हिट्नुङ् जोम् मायादाया लिसाना माङ्हाङ्ङा खिरिस्टङि उन्ङाना लाट्निना माहिमा लाउङ्सा खानि माछेम्डिइसे॥ हिट्डेउङ् खानिङा होप्मो बेला सोम्मा याङ्छामा आआङ्डुमुङ् उन्ङा डोक् खानि फेरि ओछोङ्ग्वाट् माचोगिटि हिट्नुङ् घुवार माफाडिउङ् बोल्लेउ माचोगिटि॥ 11 माङ्हाङ्ङा सोरोक् साक्तिलोक् सासान् ओचोगुवाक्॥ आमेन्॥ पाटरुसङाना आखेरि बाबा 12 बिस्वासि झान्झा सिलासङा घुवार याङ्फाडाउङ् ना चिट्ठि खानिलोङ्सा छेप्टुएसुङे॥ आङा ना चिट्ठिम्बाक् खानि आँट् पिमा हिट्नुङ् माङ्हाङ्ङाना छेम्बाना मायादाया बारेङि साँचि पिमा छेप्टुङ्ना ए॥ हिट्नुङ् ना मायादायाङि खानि बोल्लेउ लिसानिउङ् युङानि॥ 13 खानि गाड्डे डोक् माङ्हाङ्ङा सेगुचिगा बेबिलोन्ङिना माङ्पाङ्ङिगा बिस्वासिचिङा खानि बाबा माहाक्टेएसिए॥ आङा घुवार काफाबा ठाङ्बेन् मारकुसङा चा खानि बाबा मालोडेएसिए॥ 14 ठिबाङ्ङा आरको माया चोक्गा चोग् चोगानिउङ् स्या मेट्गामेट् चायानि॥ खिरिस्टङि आलिसिगा खानि ख्वाप्पालोक् हाङ्हाङ् उलियाक्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.