१ पाटरुस 3 - आठपहरियाटालिबाङ् लोक् टालिमाङ् बारे 1 टालिमाङ्चि, नाड्डेडोक् खानि टालिमाङ्चि आप्पे लाउङ्सा खानिगा टालिबाङ्चिगा आधिन्ङि युङ्मा कोन्युक्॥ हिट्नाड्डेउङ् माङ्हाङ्ङाना रिङ् बिस्वास ओचोगुन्गा टालिबाङ्चिङा चा खानि चाट्ला ठाहा ओटोगुङ् खानिङा पाक्चा आलोनिम्चिम्चा बिस्वास चोक्मा उहिडुटु, 2 पोङ्भोने खानिङा माङ्हाङ् मान् आचोगुम्ना हिट्नुङ् सेङ्सेङ्ना चोलाङि आयुङिगा रिङ् हिट्नागा आप्पेङा उनिसुटु॥ 3 खानिङा नाक्काल झाक्काल चोक्सा फ्याक् खिक्मा हिट्नुङ् माहाङ्गो साम्मेङ्ङाना गारगाहाना हिट्नुङ् ओफाङ्-ओफाङ् लोट्लिङ् वाट्सा ओचेट्नु लिमाना रिङ्ङि निङ्ग्वा पिनेनुम्, 4 टरो खानिना सुन्दारता भिट्रा निङ्ग्वाङि उलियाक्, जुन् खोना बेला चा मेयोप् लिनिना नाम्रा हिट्नुङ् सान्ता लिसाना हाङ्साङाना सुन्दारता ए, हिट्नुङ् नाम्बाक् माङ्हाङ्ङाना ओटोकानाइ आड्डिक् जोम् मुल्लेङाना ए॥ 5 नाड्डेडोक् माङ्हाङ्ङि भारोसा काचोक्चि पाइलेगा धारमोति मेच्छेमाचिङा आप्पेलाउङ्सा चा सिंगारपाट्टार ओचोगे, हिट्नुङ् उन्चि टालिबाङ्ङाना आधिन्ङि चा उयुङे॥ 6 नागा धारमोति मेन्झेमाचिङि सारा ओटालिबाङ्ङा लोडुना रिङ् टेन्डाना डाना॥ हिट्नुङ् ओटालिबाङ् आब्राहाम “आडाङ्बा” लोडुना डाना॥ हिट्नुङ् खानिङा ओचेट्नुना टोॽवा आचोगुम्मे हिट्नुङ् खोना रिङ्ङि चा आकिट्टेट्टिन् भोने, खानि साराङाना डोक् छाचि आलिसिटि॥ 7 नाड्डेडोक्, टालिबाङ्चि खानि टालिमाङ्चि खानि नुङ्ना फेटुलो उलिगा नुङ् बुजा चोगानुमुङ् उन्चिलोक् आयुङिनाँ मान् चोगानुम्चिम्॥ पोङ्भोने हिट्नागाँ चा खानिलोक् डोक् माङ्हाङ्ङा आपिना चोला ओटोगुटु॥ नाड्डेउङ् खानिङा आचोगुम्ना बिन्टिङि खोना खाले चा बाधा उलिनि चा नुङ् खानिङा हिट्नागा नुलोक् चाट्ला मेट्टानुम्चिम्॥ नुना टोॽवा चोगिनाँ आङ्माना याङ्छामा 8 आखेरिङि लोनाँनि, खानि ख्वाप्पाङाना निङ्ग्वा ठिक्ए लिमा कोन्युक्॥ ठिबाङ्ङा आरकोङाना निङ्ग्वाङिना रिङ् बुजा चोक्मा कोन्युक्॥ भुम्भु-झान्झाचि हिट्नुङ् नाना-झान्झाचि गाड्डे ठिबाङ्ङा आरको माया चोग्गा चोक् चोगानि॥ हिट्नुङ् लुक्मा काटुक् लोक् मेयोक् लिसानि॥ 9 कोइङा खानि ओचाफेम्मा माचोगिए भोने हिट्ना ओचाफेम्मा मेट्नेनुम्, हिट्नुङ् साराप याङुए भोने चा सारापें चोक्नेनुम्॥ टरो हिट्ना ओसाट्टोङि आसिक् पिडानुम्चिम्, पोङ्भोने माङ्हाङ्ङा ना लाउङ्सा डोक् खानि माछेम्डिगा॥ हिट्नुङ् खानिङा उन्लाम्मा आसिक् टोगानुम्॥ 10 धारमाछाप्लाङि छेप्टेसे, “जुन्ङा ओचोला माया चोगुटु हिट्नुङ् सुखि लिसिना लेम्बा पुमा निङ्ग्वा चोगुटु, हिट्नाँ ओलेक्फाङा ओचाफेन्ना रिङ् चेक्मा हिट्नुङ् ओयासिङा ढाँट् फोक्मा लिनिना॥ 11 हिट्नाङा ओचाफेन्ना टोॽवा चोक्मा नाडुङ् ओचेट्नुना टोॽवा चोक्मा कोन्युक्॥ हिट्नाङा आरु याप्मिचिलोक् सान्तिङि युङ्मा निङ्ग्वालाम्मा डोक् चोक्मा कोन्युक्॥ 12 पोङ्भोने माङ्हाङ्ङा धारमोति याप्मिचि पुयुचिचि हिट्नुङ् उन्चिगा बिन्टि खेम्सुटु॥ टरो टाङ्बाङाना ओनाभाक् ओभेन्गा टोॽवा काचोक्चिगा बिरुद्दाङि लियुक्॥” 13 हाट्ले खानि ओचेट्नुना टोॽवा चोक्मा निङ्ग्वा आचोगुम्टुम् भोने साङा खानि याङ्छामा माचाट्टिटिगा टे? 14 ओचेट्नुना टोॽवा आचोगुम्नाँ याङ्छामा आङ्मा कोले भोने चा माङ्हाङ्ङा खानि आसिक् मापिडिटि॥ खानि याङ्छामा मापिडिगा खोनालोक् चा किट्नेनिन् आथाबा चिन्तित् लिनेनिन्॥ 15 टरो खानि निङ्ग्वालाम्मा खिरिस्ट टाङ्बा नुङ् मान् चोगानुम्॥ खानिङि लिसाना आसाङाना बारेङि कोइङा मासिलाप्टिए भोने, हिट्नाङाना बारेङि माप्मा लाउङ्सा सोरोक् टेयार लिसानि॥ 16 हिट्ना आसा बारेङि मेयोक् लिसानिउङ् याप्मिचि मान् चोक्सा लोडानुम्चिम्॥ खानि मिप्माना बोल् सेङ्सेङ् युङ्सानुम्॥ हिड्नाड्डेउङ् खिरिस्टङि खोड्डे पारिक् नुना चोलाङि आयुङिएसेगा हिट्ना रिङ् उनिसुङ् खानि बिरुद्दाङि ओचेक्गा आप्पे ओमोन्युसियुक्॥ 17 ओचाफेन्ना टोॽवा चोगुमुङ् याङ्छामा आङ्मा नुङ्ना ओचेट्नुना टोॽवा चोगुमुङ् याङ्छामा आङ्मा माङ्हाङ्ङाना उनिङ्ग्वा भोने ना नुना रिङ् ए॥ 18 पोङ्भोने खिरिस्ट आनि पाप लोङ्सा एक्के खेप् सिए॥ ठिबाङ् नुना याप्मि कायाङ्छाबा याप्मिचि लाउङ्सा सिए॥ खिरिस्टङा आनि माङ्हाङ् सोरि खाप्माउङ्सा हिड्डे चोगुए॥ उन् याप्मिचिगा गाड्डे येम्ङि लिसानाँ सिए, टरो माङ्हाङ्ङाना ओहाङ्साङा उन् फेरि उहिङ्ग्वाट् चोगुए॥ 19 हिट्नुङ् उन् हिट्ना हाङ्साङाना ओबारगाट्ङि खाडाउङ् खाम्बाङ्ङि ओठायागा हाङ्साचिलाउङ्सा पारचार चोगुए॥ 20 हिट्नागा हाङ्साचिम्बाक् नोआङा चुवाखोङ्डाङ् चोगुना बेला हिट्नागा काएल्-काबु उलियुक्गि नुङ् माङ्हाङ्ङा पाङ्सुचिगा हाङ्साचि ओडागा॥ टरो हिट्नागाँ माङ्हाङ् उरिङ् ओखेम्स्वाट्टुन्॥ चुवाखोङ्डाङ् भिट्रा उलिसागा याङ् जाना एरोक् चुवालाम्मा उहिङे॥ 21 हिट्नुङ् ना चुवाङा बाप्टिस्माङाना साङ्केट् चोगुटु, जुन्ङा खानि माहिङिटि॥ ना येम्ङिना रिग्वाट् वासिडि गाड्डे माखाक्, टरो ना चोखो मिप्माना बोल्ङा माङ्हाङ्लोक् चोक्बालाक् चामारसिङा ए॥ येसु खिरिस्ट सियानालाम्मा उहिङ्ग्वाट् लिसानाँ ना बाप्टिस्माङा खानि आहिङिटि॥ 22 उन् उहिङ्ग्वाट् लिसाउङ् टोनालोग् खाडे हिट्नुङ् माङ्हाङ्ङाना उछुप्टाङ्लेङ् युङैसे, हिट्नुङ् ख्वाप्पा माङ्हाङ् रिङ् काउग्बाचि, टोनालोग्ङिना आधिकार हिट्नुङ् बोल् उन्ङाना आधिन्ङि उयुङ्ग्वा॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.