१ पाटरुस 1 - आठपहरिया1 आङा येसु खिरिस्टङाना मुलिचेला पाटरुसलाम्मा पारदेसि उलिसाउङ् उछिन्डाउङ् उयुङागा पोन्टास, गालातिया, कापाडोकिया, एसिया हिट्नुङ् बिथिनियाङिना छेट्राङिगा माङ्हाङ्ङा सेगुचिगा याप्मिचिलाउङ्सा ना चिट्ठि छेप्टुएट्टुङ्॥ 2 पाइले डोक् माङ्हाङ् पाबाङा खानि आप्पे ओयाप्मिचि चोक्माउङ्सा मासेगिए, हिट्नुङ् सेङ्सेङ्ना हाङ्साङा खानि सेङ्सेङ् माचोगिए॥ हिट्डेउङ् खानिङा येसु खिरिस्टङाना रिङ् आखेम्सुम्टुम्, हिट्नुङ् उन्ङाना ओहेलिक्ङा खानि चोख्याँ आलिसिएसिए॥ माङ्हाङ्ङा खानि जोम् जोम् मायादाया लोक् हाङ्हाङ् मापिडियाक्॥ उहिङ्ग्वाट् आसा 3 आनि टाङ्बा येसु खिरिस्टङाना माङ्हाङ् पाबाङाना उनिङ् टो-टो चोन्डुम्॥ माङ्हाङ्ङा आनि आड्डिक् लुक्मा आटुक्टानाँ ओछोङ्ग्वाट् चोला आपिडे, पोङ्भोने उन्ङा येसु खिरिस्ट सियानालाम्मा उहिङ्ग्वाट् चोगुए॥ हिड्नाड्डेउङ् आनि ठेना आसा चोगुमुङ् हिङिटि, 4 हिट्नुङ् माङ्हाङ्ङा टोनालोग्ङि खानि लाउङ्सा खोना बेला चा जाखाम् लिनिना, चोखो, हिट्नुङ् मेग्निना उताराधिकार युङ्सुएसुए॥ 5 खानि बिस्वासङा चोगुनाँ माङ्हाङ्ङाना ओबारगाट्ङा मुक्टि लोङ्सा सुरेक्छे माचोगिएसिए॥ हिट्नाम्बाक् आन्तेङिना बेलाङि पारकाट् लिमा टेयार युङ्ग्वा॥ 6 नागा सोब्बे रिङ्ङि खानि हारका लिमा कोन्युक्, टरो चा खानिङा होप्मो बेला लोङ्सा पारिक् पारिक्ङागा याङ्छामा आङ्मा कोन्युक्॥ 7 खानि बिस्वास छेम्बाना नुङ् नागा याङ्छामाङा आनिमेट्युक्॥ याप्मिचिङा जाखाम् लिना साम्मेङ्उम् मिङि उटुनुङ् आसालि ओचोगुटु भोने, खानि बिस्वास हिट्ना नुङ्ना चा आड्डिक् माहाङ्गो ए॥ जब पारिक् पारिक्गा याङ्छामाङि खानि बिस्वास दोरो लियुक्, टब येसु खिरिस्ट नाराङि ठेट्ना बेला खानिङा मान्, माहिमा हिट्नुङ् निङ् चोम्मा आटोगुम्टुम्॥ 8 खानिङा उन् आनिनिम्गेट्निम् हिट्नुङ् चा माया आचोगुम्टुम्॥ हिट्नुङ् उन् हाट्ले आनिनिम्चा उन्ङि बिस्वास आचोगुम्टुम्॥ हिट्नुङ् माप्मा डोक् हिनिम्ना ठेना हारकाङा खानि निङ्ग्वा इप्टुएसुए॥ 9 खानिङा उन्ङि बिस्वास आचोगुम्नाँ खानिङा खानि हाङ्साङाना मुक्टि आटोगुम्टुम्॥ 10 ना मुक्टि बारेङि डोक् ख्वाप्पा थोक् ठाहा टोक्मा लाउङ्सा माङ्काटाचिङा नुलोक् ओकोलुए, हिट्नुङ् ना मुक्टि डोक् माङ्हाङ्ङा खानि मापिडिटि नुङ् पाइले डोक् ओमाट्टुए॥ 11 माङ्काटाचिङा ना खोड्डेउङ् हिट्नुङ् खोना बेला लियुक्ना नुङ् ठाहा टोक्मा ओकोलुए॥ हिट्नुङ् हिट्नागा भिट्रा लिसाना खिरिस्टङाना सेङ्सेङ्ना ओहाङ्साङा उन्ङा याङ्छामा आङ्मा कोन्युक् हिट्नुङ् आड्डिक् मान् टोगुटु नुङ् पाइले डोक् लोडुचे॥ 12 माङ्हाङ्ङा हिट्नागा माङ्काटाचिङा ओचोगुना सेवा हिट्नागा आप्पे लाउङ्सा माखाक्, टरो खानि लाउङ्सा नुङ् हिट्नागा लोडुचे॥ हिट्नुङ् टोनालोग्लाम्मा पाङ्बालाक् सेङ्सेङ्ना हाङ्साङाना बोल्ङि खानि लाउङ्सा टाप्बालाक् नुना खाबोर हिट्नागाँ हाट्ले खानि माझाङि पारचार ओचोगुएसुए॥ ना रिङ् माङ्हाङ् रिङ् काउग्बाचिङा चा ठाहा टोक्मा ओकोलुएट्टु॥ सेङ्सेङ् लिमाना रिङ् 13 नाड्डेउङ् टोॽवा चोक्माउङ्सा खानि निङ्ग्वा टेयार चोगानुम्॥ आप्पे लाउङ्सा काबुङि युङ्सानुम् हिट्नुङ् येसु खिरिस्ट ठेट्ना बेला खानिङा आटोगुम्लाबुम्ना आसिक्ङि डोक् ख्वाप्पा आसा युङ्सानुम्॥ 14 खानि माङ्हाङ् छाचि गाड्डे आग्याँकारि आलिसिनाँ पाइले ठाहा मिटोक्ङे आचोगुम्गा ओभेन्गा निङ्ग्वा गाड्डे हाट्ले चोक्नेनिन्॥ 15 टरो खानि काछेम्बा माङ्हाङ् सेङ्सेङ्ना॥ हिट्डेउङ् खानि चा सोब्बे रिङ्ङि सेङ्सेङ् लिसानि॥ 16 पोङ्भोने धारमाछाप्लाङि नाड्डे छेप्टेसे, “खानि सेङ्सेङ् लिसानि, पोङ्भोने आङा सेङ्सेङ्ना ए॥” 17 हिट्नुङ् खोनालेङ् चा मिकेङ्ङे सोब्बे याप्मिचि उन्चि टोॽवा गाड्डे न्याए काचोक्बाउम् खानिङा बिन्टि आचोगिनाँ माङ्हाङ्लाउङ्सा पाबा आलोडुम्टुम् भोने, ना नाराङि पारदेसि आलिसिउङ् आयुङिनाँ उन् आड्डिक् मान् पिडानुमुङ् युङानि॥ 18 खानि टुबाठेबाचिगा खेडोक्गा चाल चालान्लाम्मा माङ्हाङ्ङा मुल्ले हुङुङ् छुट्कारा मापिडिगा रिङ् खानिङा ठाहा आटोगुएसुम्मे॥ हिट्नुङ् ना रिङ्उम्बाक् उन्ङा जाखाम् लिना साम्मेङ् लोक् रुपाक् हुङुना माखाक्, 19 टरो नाउम् पाप मालेना, खोट् मालेना माङ्हाङ्ङाना थुमा खिरिस्टङाना आड्डिक् बाहुमुल्ले ओहेलिक्ङा छुट्कारा आटोगुएसुम्मे॥ 20 माङ्हाङ्ङा नारा सिरिस्टि चोक्मा नुङ्ना पाइला डोक् उन् सेगुएसुना डाना हिट्नुङ् खानि लोङ्सा ना आन्तेङिना लेम्बाङि उन् ठेट्टे॥ 21 खिरिस्टलाम्मा खानिङा माङ्हाङ्ङि बिस्वास आचोगुम्मे, जुन्ङा उन् सियानालाम्मा उहिङ्ग्वाट् चोगुए हिट्नुङ् उन्लाउङ्सा मान् पिडुए, नाड्डेउङ् खानिङा बिस्वास लोक् आसा माङ्हाङ्ङि आयुङ्सुएसुम्मे॥ 22 हाट्ले खानिङा छेम्बाना रिङ् मानाँ आचोगुमुङ् खानि निङ्ग्वा सेङ्सेङ् आचोगुम्नाँ खानि भुम्भु-झान्झाचि हिट्नुङ् नाना-झान्झाचि छेम्बाना माया चोगानुम्चिम्, हिट्नुङ् निङ्ग्वालाम्मा डोक् ठिबाङ्ङा आरको माया चोग्गा चोग् चोगानि॥ 23 माङ्हाङ्ङाना उहिङ्ग्वाट् हिट्नुङ् सोरोक् लियुयाक्ना रिङ्लाम्मा खानि फेरि आपोङ्सिएसिए॥ खानि जाखाम् लिना पाबाङा ओछालेट्चि माखाक्, टरो जाखाम् लिनिना पाबाङाना ओछालेट्चि ए॥ 24 धारमाछाप्लाङि नाड्डे छेप्टेसे– “ख्वाप्पा याप्मि घाँसा गाड्डेगा डोक् हिट्नुङ् हिट्नागाँगा निङ्ला चा फुङ् गाड्डेगा डोक्॥ घाँसा लेम्युएट्युक्, हिट्नुङ् फुङ्चि ओठायुएट्युक्, 25 टरो टाङ्बाङाना उरिङ् सोरोक् लियुक्॥” हिट्नुङ् खानि पारचार चोक्बालाक् टाङ्बाङाना ना रिङ् डोक् नुना खाबोर ए॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.