१ युहान्ना 5 - आठपहरियामाङ्हाङ् छाङि बिस्वास 1 येसु डोक् खिरिस्ट नुङ् बिस्वास काचोक्बाचि सोब्बे माङ्हाङ् ओछालेट्चि ए॥ हिट्नुङ् जुन्ङा माङ्हाङ् पाबा माया चोगुटु हिट्नाङा उइछा चा माया चोगुटु॥ 2 माङ्हाङ् माया चोगुमुङ् हिट्नुङ् उन्ङाना आग्याँ टेन्डिउङ् डोक् ओछालेट्चि आनि माया चोगुम्चिम्चिम् नुङ् ठाहा लियुक्॥ 3 माङ्हाङ् माया चोक्मा डोक् उन्ङाना आग्याँ टेन्मा ए॥ हिट्नुङ् उन्ङा आलोडागा रिङ् चोक्मा आनि लाउङ्सा टुक्निना॥ 4 पोङ्भोने माङ्हाङ् ओछालेट्चि ख्वाप्पाङा नाराङिगा ओभेन्गा थोक्चि मेप्मा उहिडुटु॥ नाड्डेउङ् नाराङिगा ओभेन्गा रिङ्चि आनि बिस्वासलाम्मा डोक् मेप्मा हिडुम्टुम्॥ 5 खोनाङा नाराङिगा ओभेन्गा रिङ्चि मेप्मा हिडुटुना टे? जुन्ङा येसु माङ्हाङ् छा नुङ् बिस्वास चोगुटु हिट्नाङा डोक् मेट्टुटु॥ येसु खिरिस्टङाना बारेङि साँचि कापिचि 6 येसु खिरिस्ट चुवाङाना बाप्टिस्मा हिट्नुङ् खाप्चेङि हेलिक् वेडुङ् टाए, उन् चुवालाम्मा एरोक् माखाक्, टरो उन् चुवा हिट्नुङ् हेलिक्लोक् चा टाए॥ हिट्नुङ् ना छेम्बाना ए नुङ् सेङ्सेङ्ना हाङ्साङा डोक् साँचि पिडुटु, पोङ्भोने सेङ्सेङ्ना हाङ्सा डोक् छेम्बाना ए॥ 7 उन्ङाना बारेङि सुम्बोक् रिङ्ङा साँचि पिडुटु, 8 हाङ्सा, चुवा लोक् हेलिक्॥ नागा सुम्बोक्ङा ठिक्ए साँचि उपिडुटु॥ 9 याप्मिङा ओमाट्टुगा साँचिउम् आनि बिस्वास चोगुम्टुम् भोने माङ्हाङ्ङा माट्टुना साँचिउम् झान् बोल्लेउ ए॥ हिट्नुङ् माङ्हाङ्ङा डोक् उन्ङाना छाङाना बारेङि साँचि पिडुएसुए॥ 10 हिड्डे लिसाउङ् जुन्ङा माङ्हाङ् छाङि बिस्वास चोगुटु, हिट्नाङाना उनिङ्ग्वाङि ना डोक् साँचि लियुक्॥ टरो जुन्ङा माङ्हाङ् बिस्वास चोगुन्ना, हिट्नाङा माङ्हाङ् माङ्जोना नुङ् माट्टुटु, पोङ्भोने माङ्हाङ्ङा उन्ङाना छाङाना बारेङि माट्टुना रिङ् हिट्नाङा बिस्वास चोगुन्ना॥ 11 हिट्नुङ् साँचिम्बाक् ना डोक् ए, माङ्हाङ्ङा आनि लाट्निना चोला आपिडाइसे हिट्नुङ् ना चोलाउम्बाक् उन्ङाना छाङि युङ्ग्वा॥ 12 जुन्लोक् माङ्हाङ् छा लियुक्, हिट्नालोक् चोला लियुक्, जुन्लोक् माङ्हाङ् छा लिनिना, हिट्नालोक् चोला लिनिना॥ लाट्निना चोला 13 खानिङा लाट्निना चोला आटोगुम्मे नुङ् खानिङा ठाहा टोगानुम् नुङ् डोक् माङ्हाङ् छाङि बिस्वास काचोक् खानिलोङ्सा ना चिट्ठि छेप्टुङ्गेट्टुङ्॥ 14 हिट्नुङ् माङ्हाङ्ङाना उनिङ्ग्वा गाड्डे जे रिङ् आनि नाक्टुम्टुम् उन्ङा आपियुक् नुङ् डोक् आनि ढुक्का लिसिटि॥ 15 आनि बिन्टि चोगुम्नाँ जे नाक्टुम् चा उन्ङा खेम्सुटु नुङ् ठाहा टोगुम्टुम् भोने, उन्लोक् आनि जे नाक्टुएसुम्मे हिट्ना चा आनि टोगुएसुम्मे नुङ् ठाहा टोगुम्टुम्॥ 16 कोइङा बिस्वासि भुम्भु-झान्झा आथाबा नाना-झान्झाङा पाप चोगुना निसुटु, हिट्नुङ् हिट्ना पापङाम्बाक् माङ्हाङ्लाम्मा सोरोक् लोङ्सा साम्डुना पाराना माखाक् भोने, हिट्नाङा उन्चि लोङ्सा माङ्हाङ्लोक् बिन्टि ठाङ्माबिमा कोन्युक्, हिट्नुङ् माङ्हाङ्ङा हिट्ना चोला पिडुटु॥ टरो माङ्हाङ्लाम्मा सोरोक् लोङ्सा आसाम्ना पाराना पाप चा लियुक्, नाड्डेना पाप लोङ्सा खानिङा बिन्टि ठाङ्मा कोन्युक् नुङ् आङा लोनेन्निन्गा॥ 17 सोब्बे ओचाफेन्गा टोॽवा चोक्मा डोक् पाप ए॥ टरो सोब्बे पापङा याप्मिलाउङ्सा माङ्हाङ्लाम्मा सोरोक् लोङ्सा साम्डुन्ना॥ 18 माङ्हाङ् ओछालेट्चि खोनाङा चा पाप ओचोगुन्याक्टुन्ना नुङ् आनि ठाहा टोगुम्टुम्, पोङ्भोने माङ्हाङ् छाङा उन् जोगाँ चोगुटु हिट्नुङ् सैतानङा उन् पाक्चा चोक्मा हिडुन्ना॥ 19 ख्वाप्पा नारा सैतानङाना उमुक्ठुङ्ङि युङ्सु चा आनिम्बाक् माङ्हाङ् ओछालेट्चि नुङ् आनिलाउङ्सा ठाहा युङ्ग्वा॥ 20 हिट्नुङ् माङ्हाङ् छा टाइसे, हिट्नुङ् छेम्बाना माङ्हाङ् मिसेन् निमा उहिडुम् नुङ् उन्ङा आनि लाउङ्सा बुजा चोक्माना ठोना चा आपिडाना रिङ् ठाहा युङ्ग्वा॥ हिट्नुङ् आनि छेम्बाना माङ्हाङ्ङि वासेट्टि, पोङ्भोने आनि उन्ङाना छा येसु खिरिस्टङि वासेट्टि॥ उन् एरोक् छेम्बाना माङ्हाङ् हिट्नुङ् उन्ङा एरोक् याप्मिचि लाट्निना चोला पिमा हिडुचिचि॥ 21 खानि आइछाचि गाड्डेगा, माङ्जोगा साम्माङ्चिलाम्मा खानि लाप्माङ् युङानि॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.