१ युहान्ना 4 - आठपहरियाछेम्बाना हिट्नुङ् माङ्जोना हाङ्सा बारे 1 मायालु आसाइबाचि, आङा सेङ्सेङ्ना हाङ्सालाम्मा चेक्ङाना नुङ् उपिग्गा सोब्बे बिस्वास चोक्नेनुम्चिम्, टरो हिट्नागालोक् लिसाना हाङ्सा माङ्हाङ्ङाना इ माखाक् इ नुङ् नुलोक् कोलानुमुङ् पुयानुम्, पोङ्भोने ना नाराङि जोम् माङ्जोगा माङ्काटाचि ओवाहेट्॥ 2 हिट्नागालोक् माङ्हाङ्ङाना हाङ्सा युङ्ग्वा नुङ् ना रिङ्लाम्मा आनि ठाहा टोगुम्टुम्, जुन्ङा येसु खिरिस्ट याप्मिङाना येम्ङि टाए नुङ् लाडुटु, हिट्नालोक् माङ्हाङ्ङाना हाङ्सा लियुक्॥ 3 टरो कोइङा येसु याप्मि लिसाना नुङ् लाडुन्ना भोने, हिट्ना हाङ्साम्बाक् माङ्हाङ्ङाना हाङ्सा माखाक्॥ ना हाङ्साम्बाक् खिरिस्टङाना ओसाट्टुरलाम्मा टायाना॥ हिट्ना टायुक् नुङ् खानिङा आखेम्सुएसुम्मे, हिट्नुङ् हिट्ना पाइले डोक् ना नाराङि टामाहिडाइसे॥ 4 खानि आइछाचि गाड्डेगा, खानिम्बाक् माङ्हाङ्ङाना ओयाप्मिचि, हिट्नुङ् खानिङा हिट्नागा माङ्जो रिङ् काहिसिक्बाचि आमेट्टुम्चिम्मे, पोङ्भोने खानिलोक्ना सेङ्सेङ्ना हाङ्साम्बाक् नाराङि लिसाना हाङ्सा नुङ्ना माङ्ठेना ए॥ 5 हिट्नागा नाराङिगा उलिसानाँ नाराङिगा डोक् रिङ् ओचेक्युक्, हिट्नुङ् हिट्नागाँ ओमाट्टुगा रिङ् नाराङिगा याप्मिचिङा डोक् ओखेम्सुटु॥ 6 टरो आनिम्टे माङ्हाङ्ङाना ओयाप्मिचि, हिट्नुङ् जुन्ङा माङ्हाङ् मिसेन् निसुटु, उन्ङा आनि रिङ् खेम्सुटु॥ जुन् माङ्हाङ्ङाना ओयाप्मि माखाक्, हिट्नाङा आनि रिङ् खेम्सुन्ना॥ नाड्डेउङ् छेम्बाना हाङ्सा लोक् माङ्जोना हाङ्सा नुङ् आनि मिसेन् निसुम्टुम्॥ माङ्हाङ्ङाना माया 7 मायालु आसाइबाचि, आनि ठिबाङ्ङा आरको माया चोग्गा चोग् चोगि, पोङ्भोने माया चोक्माना निङ्ग्वाम्बाक् माङ्हाङ्लाम्मा टायुक्॥ जुन्ङा आरु याप्मिचि माया चोगुचिचि, हिट्ना माङ्हाङ् उइछा हिट्नुङ् हिट्नाङा माङ्हाङ् मिसेन् निसुटु॥ 8 जुन्ङा आरु माया चोगुन्चिन्गा हिट्नाँ माङ्हाङ् मिसेन् निसुन्ना, पोङ्भोने माङ्हाङ्ङा याप्मिचि सोरोक् माया चोगुचिचि॥ 9 माङ्हाङ्ङा आनि नाड्डेउङ् ओमाया आनिमेट्टे, उन्ङाना उइछालाम्मा आनि चोला टोगुम् नुङ् उन्ङाना ठिबाङ् एना छा चा नाराङि पाङ्सुए॥ 10 छेम्बाना मायाम्बाक् ना ए, माङ्हाङ् आनि माया चोगुम्ना माखाक्, टरो उन्ङा आनि माया आचोगे, हिट्नुङ् आनि पाप टुग्मा लोङ्सा भोक् लिमा उन्ङा आप्पे उइछा पाङ्सुए॥ 11 मायालु आसाइबाचि, माङ्हाङ्ङा आनि ना पारा माया आचोगाना भोने, आनि चा ठिबाङ्ङा आरकोलाउङ्सा माया चोक्माचि कोन्युक्॥ 12 साङा चा खोना बेला चा माङ्हाङ् उनिसुन्गेट्टुन्ना॥ टरो आनि ठिबाङ्ङा आरको माया चोगुम्टुम् भोने, माङ्हाङ् आनिलोक् युङ्युक्, हिट्नुङ् उन्ङाना माया आनिङि युडैसे॥ 13 माङ्हाङ्ङा आनिलोङ्सा उन्ङाना सेङ्सेङ्ना हाङ्सा आपिडाइसे, हिड्डेउङ् आनि उन्ङि लिसिटि, हिट्नुङ् उन् आनिङि लियुक् नुङ् आनि ठाहा टोगुम्टुम्॥ 14 हिट्नुङ् माङ्हाङ् पाबाङा उन्ङाना छा नाराङिना काहिङ्मेप्बा डाङ्बा लिमा पाङ्सुना नुङ् आन्याँ निसुम्मे, हिट्नुङ् नाङाना डोक् साँचि पिडुम्टुम्मा॥ 15 जुन्ङा येसु माङ्हाङ् छा नुङ् लाडुटु, हिट्नालोक् माङ्हाङ् लियुक्, हिट्नुङ् हिट्नाम्बाक् माङ्हाङ्ङि लियुक्॥ 16 नाड्डेउङ् आनि आप्पेङा चा माङ्हाङ्ङा आनि माया आचोगाना ठाहा टोगुम्टुम् हिट्नुङ् हिट्ना माया आन्याँ बिस्वास चोगुम्टुम्॥ माङ्हाङ्ङा याप्मिचि सोरोक् माया चोगुचिचि॥ हिट्नुङ् जुन् याप्मि माङ्हाङ्ङाना ओमायाङि लियुयाक्युक् भोने हिट्ना माङ्हाङ्ङि लियुक्, हिट्नुङ् माङ्हाङ् उन्ङि लियुक्॥ 17 आनि आरु छेम्बाना माया चोगुम्चिम्चिम् हिट्नुङ् खिरिस्टङा नाराङि चोगु गाड्डे डोक् युङिटि भोने, न्याएङाना लेम्बा आनि चिन्तित लिमा कोन्निना॥ 18 मायाङि किट्मा कोन्निना, टरो छेम्बाना मायाङा किट्माना रिङ् सोब्बे रिक्टुडिसुटु, पोङ्भोने किट्माडुङ्म्बाक् साजाएलाम्मा टायुक्, हिट्नुङ् उन्ङाना माया आनिङि युनिगेट्निना नुङ् ना रिङ्ङा आनिमेट्युक्॥ 19 माङ्हाङ्ङा डोक् उटुम्ङि आनि माया आचोगानाँ आनि चा ठिबाङ्ङा आरको माया चोग्गा चोग् चोगिटि॥ 20 कोइङा “आङा माङ्हाङ् माया चोगुङ्टुङ्” माट्टुटु, टरो बिस्वासि भुम्बु-झान्झाचि हिट्नुङ् नाना-झान्झाचि चिम्मा फुट्टुचिचि भोने हिट्ना याप्मि माङ्जो चेक्युक्, पोङ्भोने उन्ङा निसुना बिस्वासि भुम्भु-झान्झा आथाबा नाना-झान्झाचिउम् माया चोगुन्चिन्गा भोने खोना बेला चा निसुन्गेट्टुन्ना माङ्हाङ् माया चोक्मा हिडुन्ना॥ 21 हिट्नुङ् उन्ङा आनि ना आग्याँ आपिडाइसे, जुन्ङा माङ्हाङ् माया चोगुटु, हिट्नाङा बिस्वासि भुम्भु-झान्झाचि आथाबा नाना-झान्झाचि चा माया चोक्माचि कोन्युक्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.