१ युहान्ना 3 - आठपहरियामाङ्हाङ्ङाना छालेट् 1 खेम्सानुम्, आनिलोङ्सा पाबाङा आम्टेप्मा जोम् माया आचोगाइसे, उन्ङा आचोगाना मायाङा आनि उन्ङाना छालेट्चि आलोडाइसे, हिट्नुङ् छेम्बा डोक् आनि माङ्हाङ्ङाना छालेट्चि डोक् ए॥ टरो ना नाराङिगा याप्मिचिङा आनि मिसेन् आनिनिगा, पोङ्भोने हिट्नागाँ उन् मिसेन् उनिसुन्ना॥ 2 मायालु आसाइबाचि, हाट्लेम्बाक् आनि माङ्हाङ्ङाना खालाक् डोक् ए॥ हिट्नुङ् हान्डेङ् आनि पाक् गाड्डेना लिसिटिगा हिट्ना रिङ् आनि ठाहा टोग्निम्ना॥ टरो खिरिस्ट उङ्नाँ आनि चा उन् गाड्डे डोक् लिसिटि नुङ् ठाहा टोगुम्टुम्, पोङ्भोने उन् खोड्डेना वाहेट्ना हिड्नाडेना डोक् उन् निसुम्टुम्॥ 3 हिट्नुङ् खिरिस्ट फाकाट्ना लिसा गाड्डे, उन्ङि नाड्डेना आसा उयुङ्सुगाँ ख्वाप्पा याप्मिङा आप्पेलाउङ्सा फाकाट्ना ओचोगुङ् उयुङ्सुटु॥ 4 हिट्नुङ् पाप काचोक्बाचि ख्वाप्पाङा माङ्हाङ्ङाना धारमाबिधि पालान् ओचोगुन्ना, पोङ्भोने धारमाबिधि पालान् मिचोक्मा डोक् पाप ए॥ 5 हिट्नुङ् याप्मिचिगा पाप टुग्मा लाउङ्सा खिरिस्ट पारकाट् लिसाना नुङ् खानिङा ठाहा आटोगुम्टुम्॥ हिट्नुङ् उन्ङि पाप डोक् वाइना॥ 6 हिट्नाड्डेउङ् उन्ङि उलिसागा खोना याप्मिङा चा पाप चोगुन्याक्टुन्ना॥ पाप ओचोगुयाक्टुगा याप्मिङा उन् साइना नुङ् मिसेन् चा उनिसुन्ना, ठाहा चा ओटोगुन्ना॥ 7 खानि आइछाचि गाड्डेगा, खोना याप्मिङा चा खानि माबान्डिन्चा॥ जुन् याप्मिङा माहामाना टोॽवा चोगुटु, हिट्नाम्बाक् धारमि याप्मि ए, हिट्नाडेडोक् खिरिस्ट धारमोति ए॥ 8 जुन्ङा पाप चोगुयाक्टुटु हिट्ना सैतानङाना ओयाप्मि ए, पोङ्भोने सैतानङा उटुम्लाम्मा डोक् पाप चोक्सा टाइसे॥ हिट्नाड्डेउङ् सैतानङाना टोॽवा जाखाम् चोक्सिङा माङ्हाङ् छा ठेट्टाना ए॥ 9 माङ्हाङ्ङाना छालेट्ङा खोनाँ चा पाप चोगुन्याक्टुन्ना, पोङ्भोने उन्ङाना चाट्ला हिट्नालोक् लियुक्, हिट्नुङ् हिट्नाङा पाप चोगुन्याक्टुन्ना, पोङ्भोने हिट्ना माङ्हाङ्ङाना छालेट् ए॥ 10 माङ्हाङ् ओखालाक् हिट्नुङ् सैतानङाना ओखालाक् साइना नुङ् ना रिङ्लाम्मा डोक् मिसेन् निमा हिडुम्टुम्, माङ्हाङ् ओटोकानाइ नुना टोॽवा चोक्निना हिट्नुङ् बिस्वासि भुम्भु-झान्झा आथाबा नाना-झान्झाचि माया चोगुन्चिन्गा भोने हिट्ना माङ्हाङ् ओखालाक् माखाक्॥ ठिबाङ्ङा आरको माया चोक्माना बारे 11 ठिबाङ्ङा आरको माया चोक्मा कोन्युक् नुङ् खान्याँ पाइलेलाम्मा डोक् आखेम्सुम्ना खाबोर ए॥ 12 आनि कायिन गाड्डे लिमा लिनिना॥ उन् सैतानङाना ओयाप्मि डाना, हिट्नुङ् आप्पे उन्झा सेडुए॥ हिट्नाङा आप्पे उन्झा पोङ् सेडुएना? पोङ्भोने हिट्नाङाना ओटोॽवा भेन्ना डाना, हिट्नुङ् आप्पे उन्झाङाना टोॽवाम्बाक् नुना डाना॥ 13 आम्भु-आन्झाचि आथाबा नाना-झान्झाचि, नाराङिगा याप्मिचिङा खानि चिम्मा माफुट्टिना खानि डोङ् ठोङ्नेनिन्॥ 14 आनिउम्टे जाइले टाइले सियाना याप्मि गाड्डे लिसिन्गा हिट्नुङ् हाट्ले चोला आनि टोगुएसुम्मे नुङ् आनिलाउङ्सा ठाहा युङ्ग्वा, पोङ्भोने आनिउम्टे आनि बिस्वासि भुम्भु-झान्झाचि आथाबा नाना-झान्झाचि माया चोगुम्चिम्गा॥ माया चोक्निना याप्मिम्बाक् हाट्ले चा सियाना याप्मि गाड्डे डोक् लियुक्॥ 15 आप्पे बिस्वासि भुम्भु-झान्झा आथाबा नाना-झान्झा चिम्मा काफुट्उम्बाक् याङ्कासेट् ए, हिट्नुङ् याप्मि याङ्कासेट्लोक् लाट्निना चोला लिनिना नुङ् खानिलोङ्सा ठाहा युङ्ग्वा॥ 16 हाट्ले येसु खिरिस्टङा आनि लोङ्सा ओसोक्मा लेडुङ् छेम्बाना माया खोड्डेना नुङ् आन्याँ बुजा चोगुएसुम्मे॥ आनि चा आप्पे आनि बिस्वासि भुम्भु-झान्झाचि आथाबा नाना-झान्झाचि लोङ्सा आनि सोक्मा पिमा कोन्युक्॥ 17 कोइ याप्मिलोक् जोम् माक्फेन्सुबेन् युङ्ग्वा, हिट्नुङ् हिट्नाङा आप्पे बिस्वासि भुम्भु-झान्झा आथाबा नाना-झान्झाचि चाहाबा उलिसागा निसुङ् चा उनिङ्ग्वा ठुम्ना चोगुटु भोने, खोड्डेउङ् हिट्ना याप्मिलोक् माङ्हाङ्ङाना माया लियुक्ना टे? 18 खानि आइछाचि गाड्डेगा, आनि यासि लोक् रिङ्ङा एडोक् माया चोगि पिगिन्चा, टरो आनिना मायाम्बाक् छेम्बाना लिमा कोन्युक् हिट्नुङ् नाड्डेना माया टोॽवालाम्मा डोक् ठेट्युक्॥ माङ्हाङ् सोरि खाप्मा आँट् चोगानि 19 बिस्वासिचि आनि माया चोगुम्चिम्चिम् भोने, आनि छेम्बागा याप्मिचि नुङ् ठाहा लियुक्, हिट्नुङ् आनि माङ्हाङ् ओटोकानाङि येबिनाँ ढुक्का लिसिटि॥ 20 आनि निङ्ग्वाङा आप्पे आनिलाउङ्सा कायाङ्छाबाचि नुङ् आलोयुक् भोने, माङ्हाङ् टे आनि निङ्ग्वा नुङ्ना चा माङ्ठेना, हिट्नुङ् उन्ङा सोब्बे थोक् ठाहा टोगुटु॥ 21 मायालु आसाइबाचि, आनि निङ्ग्वाङा आनि आप्पेलाउङ्सा फाट्टुर आलाब्नेएट्नि भोने आनि माङ्हाङ् ओटोकानाइ खाप्मा आँट् टोगुम्टुम्॥ 22 हिट्नुङ् आनि जे थोक् नाक्टुम्टुम्, हिट्ना उन्लाम्मा टोगुम्टुम्, पोङ्भोने आनि उन्ङा आलोडाना रिङ् पालान् चोगुम्टुम्, हिट्नुङ् उनिङ्ग्वा टाना टोॽवा चोगुम्टुम्॥ 23 उन्ङा आनि आग्याँ आचोगाना रिङ्उम्बाक् ना डोक् ए, आनि उन्ङाना छा येसु खिरिस्ट उनिङ्ङि बिस्वास चोग्मा कोन्युक्, हिट्नुङ् उन्ङा आनि आहिसिक्टा गाड्डे डोक् ठिबाङ्ङा आरकोलाउङ्सा माया चोक्मा कोन्युक्॥ 24 उन्ङा माट्टुगा रिङ् पालान् काचोक् सोब्बे याप्मिचि उन्ङि उलियुक्, हिट्नुङ् उन् हिट्नागालोक् लियुक्॥ नाड्डेउङ् माङ्हाङ् आनि निङ्ग्वाङि युङ्ना रिङ् उन्ङा आपिडाना सेङ्सेङ्ना हाङ्सालाम्मा आनि ठाहा टोगुम्टुम्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.