१ युहान्ना 2 - आठपहरियाखिरिस्ट आनि घुवार काफाबा 1 खानि आइछाचि गाड्डेगा, खानिङा पाप चोग्नेनुम् नुङ् आङा नागा रिङ् खानिलाउङ्सा छेप्टुएट्टुङ्॥ टरो कोइङा पाप चोगुए भोने चा माङ्हाङ् पाबालोक् आनि लोङ्सा बिन्टि काचोक् ठिबाङ् धारमोति येसु खिरिस्ट वाहेट्॥ 2 उन् आप्पे डोक् आनि पाप टुग्माउङ्सा भोक् लिसे, हिट्नुङ् आनि लाउङ्सा एरोक् माखाक्, टरो नाराङिगा सोब्बे याप्मिचि लाउङ्सा चा ए॥ 3 हिट्नुङ् उन्ङाना आग्याँचि आनि पालान् चोगुम्मे भोने, छेम्बा उन् आनि मिसेन् निसुम्ना रैछो नुङ् ठाहा लियुक्॥ 4 जुन्ङा “आङा उन् मिसेन् निसुङ्ना” पिक्युग्, टरो उन्ङाना आग्याँचि पालान् चोगुन्गा भोने हिट्ना माङ्जोना ए, हिट्नुङ् हिट्नाङा छेम्बाना रिङ् ठाहा टोगुन्ना॥ 5 टरो जुन्ङा उरिङ् पालान् चोगुटु, हिट्नाङा छेम्बा डोक् माङ्हाङ् माया चोगुटु॥ आनि उन्ङि वासेट्टि नुङ् ना रिङ्लाम्मा डोक् ठाहा लियुक्॥ 6 माङ्हाङ्ङि वाङेट्ना पिक्ना याप्मिङा खिरिस्टङाना ओचाट्ला गाड्डे वामा कोन्युक्॥ ओछोङ्ग्वाट् आग्याँ 7 मायालु आसाइबाचि, आङा खानिलाउङ्सा आखेम्निम्गेट्निम्ना खोना चा ओछोङ्ग्वाट् आग्याँ माखाक्, टरो हिट्ना उटुम्लाम्मा डोक् खानिलोक् लिसाडायाना पुरानो आग्याँ डोक् छेप्टुएट्टुङ्॥ ना पुरानो आग्याँ खानिङा पाइले डोक् आखेम्सुम्ना रिङ् ए॥ 8 टरो चा आङा छेप्टुङ्गेट्टुङ्ना आग्याँम्बाक् ओछोङ्ग्वाट् ए॥ येसु ना आग्याँङाना सात्तेताङि वासे, हिट्नुङ् खानि चा हिट्नि डोक् आवासेट्टि, पोङ्भोने डुम्बारिक् डुम् मासा खाट्युगेट् हिट्नुङ् छेम्बाना व्हाङ् पाइले डोक् ओम्येट्॥ 9 जुन्ङा “आङा व्हाङ्ङि वाङेट्ना” नुङ् माट्टुटु, टरो बिस्वासि भुम्भु-झान्झा आथाबा नाना-झान्झा चिम्मा फुट्टुटु भोने हिट्ना हाट्ले चा डुम्बारिक् डुम्ङि डोक् वाहेट्॥ 10 जुन्ङा आप्पे बिस्वासि भुम्भु-झान्झा आथाबा नाना-झान्झा माया चोगुटु, हिट्नाम्बाक् व्हाङ्ङि लियुक्, हिट्नुङ् आरु पाप लिना खोना रिङ् चा उन्ङि उलिनिगा॥ 11 टरो जुन्ङा आप्पे बिस्वासि भुम्भु-झान्झा आथाबा नाना-झान्झा चिम्मा फुट्टुटु, हिट्ना डुम्बारिक् डुम्ङि लियुक्, हिट्नुङ् डुम्बारिक्ङि वायुक्, हिट्नुङ् हिट्ना खोनि खाट्युगेट्ना, उन्ङा ठाहा टोगुन्ना, पोङ्भोने डुम्बारिक् डुम्ना रिङ्ङा हिट्ना याङ्निनिना चोगुटु॥ 12 खानि आइछाचि गाड्डेगा, खानि लाउङ्सा आङा छेप्टुएट्टुङ्, पोङ्भोने उन्ङाना उनिङ्ङि खानि पाप छेमा लिसाइसे॥ 13 पाबाचि, आङा खानि लोङ्सा छेप्टुएट्टुङ्, पोङ्भोने उटुम्लाम्मा वासेट्टाना खानिङा मिसेन् आनिसुम्टुम्॥ ठाङ्बेन्चि, आङा खानि लाउङ्सा छेप्टुएट्टुङ्, पोङ्भोने खानिङा सैतान आमेट्टुएसुम्मे॥ 14 खानि आइछाचि गाड्डेगा, आङा खानि लाउङ्सा छेप्टुएट्टुङ्, पोङ्भोने खानिङा माङ्हाङ् पाबा मिसेन् आनिसुएसुम्मे॥ पाबाचि, आङा खानि लाउङ्सा छेप्टुएट्टुङ्, पोङ्भोने उटुम्लाम्मा वासेट्टाना खानिङा मिसेन् आनिसुम्टुम्॥ ठाङ्बेन्चि, आङा खानि लाउङ्सा छेप्टुएट्टुङ्, पोङ्भोने खानि बोल्लेउ आवासेट्टि, हिट्नुङ् माङ्हाङ् उरिङ् खानि निङ्ग्वाङि युङ्ग्वा, हिट्नुङ् खानिङा सैतान आमेट्टुएसुम्मे॥ 15 नारा लोक् नाराङि उलिसागा खोना थोक्चि चा माया चोग्नेनुम्॥ कोइ याप्मिङा नारा माया चोगुटु भोने उन्ङा माङ्हाङ् पाबा माया चोगुन्ना॥ 16 पोङ्भोने नाराङिगा याप्मिचिगा भेन्ना निङ्ग्वाङा येम्ङाना मोज्मोज्जाङि एडोक् लुम्मा कोलुटु, निसुम्गा ख्वाप्पा रिङ्चि टोक्मा लुम्मा कोलुटु, हिट्नुङ् माक्फेन्सुबेन् हिट्नुङ् चोगु फासुगा थोक्ङि एडोक् ठेलोक् चोक्मा कोलुटु॥ नाड्डेगा रिङ्उम्बाक् माङ्हाङ् पाबालाम्मा ओटायागा माखाक्, टरो नाड्डेगा थोक् ना नारालाम्मा ओटायुक्॥ 17 नारा लोक् याप्मिचिङा निङ्ग्वा ओचोगुगा नाराङिगा ओभेन्गा रिङ्चि जाखाम् उलियुङ् ओखाट्युक्, टरो माङ्हाङ् उनिङ्ग्वा गाड्डे चोक्युयाक्ना याप्मिम्बाक् सोरोक् युङ्युयाक्युक्॥ खिरिस्टङाना ओसाट्टुर 18 खानि आइछाचि गाड्डेगा, नाराङाना आखेरि बेलाम्बाक् ना डोक् ए॥ खिरिस्टङाना ओसाट्टुर टायुगेट् नुङ् खानिङा आखेम्सुएसुम्मे॥ जोम् खिरिस्टङाना ओसाट्टुरचिम् टे पाइले डोक् ओटामाइडे॥ ना रिङ्लाम्मा डोक् नाराङाना आखेरि बेला ए नुङ् आनि ठाहा टोगुम्टुम्॥ 19 हिट्नागा आनिलेङ्गा माखाक्, हिट्नाड्डेउङ् आनि आपोक्टाढाउङ् ओखाडे॥ छेम्बा हिट्नागा आनिगालेङ्गा नाउम्बे हिट्नागा आनिलोक् उयुङेबे, टरो हिट्नागा होन्डा ओखाडाउङ् हिट्नागा आनिगा माखाक् नुङ् ना रिङ्ङा पारचिन्दा चोगुए॥ 20 टरो खानिम्बाक् खिरिस्टङा सेङ्सेङ्ना हाङ्सा मापिडिएसे, हिट्नुङ् खानि सोब्बेङा छेम्बाना रिङ् आनिसुम्टुम्॥ 21 खानिङा छेम्बाना रिङ् ठाहा आटोक्निम्ना नुङ् छेप्टुङ्ना माखाक्, टरो खानिङा छेम्बाना रिङ् ठाहा आटोगुम्नाँ डोक् आङा खानिलाउङ्सा छेप्टुङ्ना, हिट्नुङ् माङ्जोना रिङ् छेम्बाना रिङ्लाम्मा टानिना नुङ् खानिलाउङ्सा ठाहा डोक् युङ्ग्वा॥ 22 हिट्नुङ् साक्उम्बाक् माङ्जोना टे? जुन्ङा येसु डोक् खिरिस्ट नुङ् लाडुन्ना, हिट्ना डोक् माङ्जोना ए॥ हिट्नुङ् जुन्ङा माङ्हाङ् पाबा लोक् छा लाडुन्ना, हिट्ना डोक् खिरिस्टङाना ओसाट्टुर ए॥ 23 जुन्ङा छा लाडुन्ना, हिट्नाङा पाबा चा लाडुन्ना॥ जुन्ङा छा लाडुटु, हिट्नाङा पाबा चा लाडुटु॥ 24 हिट्नाड्डेउङ् खानिङा उटुम्लाम्मा डोक् आखेम्सुम्ना हिसिक्मा खानि निङ्ग्वाङि युङ्सानुम्॥ खानिङा उटुम्लाम्मा डोक् आखेम्सुम्गा हिसिक्मा खानि निङ्ग्वाङि आयुङ्सुम्मे भोने छा हिट्नुङ् माङ्हाङ् पाबाङि खानि आलिसिटि॥ 25 हिट्नुङ् उन्ङा आनिलोक् माङ्हुप् चोगुना रिङ्उम्बाक् लाट्निना चोला ए॥ 26 नागा सोब्बे रिङ् खानि सुप्मा माकोलिगा बारेङि आङा खानिलोङ्सा छेप्टुएट्टुङ्॥ 27 टरो खानिङाम्बाक् सेङ्सेङ्ना हाङ्सा आटोगुएसुम्मे, हिट्नुङ् उन् खानिङि लियुक्, हिट्डेउङ् साङा चा खानि हिसिक्मा कोन्निना॥ पोङ्भोने सेङ्सेङ्ना हाङ्साङा खानि सोब्बे रिङ् सिकाँ माचोगिटि, हिट्नुङ् उन्ङा सिकाँ माचोगिगा रिङ् छेम्बाना ए, माङ्जोना माखाक्॥ सेङ्सेङ्ना हाङ्साङा सिकाँ माचोगि गाड्डे डोक् खिरिस्टङि लिसानि॥ 28 हिट्नुङ् खानि आइछाचि गाड्डेगा, उन्ङि लिसायाक्टानि, हिट्डेउङ् उन् ठेट्ना बेला आनि आँट् टोगुम्टुम्, हिट्नुङ् उन् उङ्ना लेम्बा उन् सोरि आनि मोम्मासिमा कोन्निना॥ 29 खिरिस्ट धारमोति नुङ् खानिलाउङ्सा ठाहा डोक् युङ्ग्वा॥ हिट्नाड्डेउङ् माङ्हाङ् ओटोकानाङि पाक् नुना हिट्ना टोॽवा काचोक्बाम्बाक् माङ्हाङ् ओछालेट्चि नुङ् खानिङा ठाहा टोक्मा कोन्युक्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.