१ युहान्ना 1 - आठपहरियाचोला आपिना रिङ् 1 उटुम्लाम्मा डोक् लिसाना चोला आपिना रिङ्, हिट्ना आन्याँ खेम्सुएसुम्मे हिट्नुङ् आप्पे आन्याँ मिक्ङा निसुम्मे, हिट्नुङ् नुलोक् पुयुम्मे हिट्नुङ् आन्याँ मुक्ङा डोक् खोट्टुम्मे, हिट्ना बारेङि आन्याँ खानिलाउङ्सा छेप्टुएट्टुम्मा॥ 2 जब ना चोला पारकाट् लिसे, आन्याँ निसुम्मे॥ हिट्नुङ् हाट्ले उन् लाट्निना चोला ए नुङ् खानि साँचि पिनाँनि हिट्नुङ् खानि लोनाँनि॥ उन् माङ्हाङ् पाबालोक् डाना हिट्नुङ् आनि सोरि पारकाट् लिसे॥ 3 आन्याँलोक् खानिगा साङ्गाति उलियाक् नुङ् डोक् आन्याँ जे निसुम्मे हिट्नुङ् खेम्सुम्मे, हिट्ना डोक् खानिलाउङ्सा लोनाँनि॥ आनि साङ्गातिउम्बाक् माङ्हाङ् पाबा हिट्नुङ् उन्ङाना छा येसु खिरिस्टलोक् युङ्ग्वा॥ 4 आन्याँना आनान्दा उयुयाक् नुङ् डोक् नागा रिङ् आन्याँ छेप्टुएट्टुम्मा॥ माङ्हाङ्म्बाक् व्हाङ् ए 5 हाट्ले उन्लाम्मा खेम्सुम्माना खाबोर ना डोक् ए हिट्नुङ् खानि लोनाँनि, हिट्ना खाबोरम्बाक्– माङ्हाङ् डोक् व्हाङ् हिट्नुङ् उन्ङि खाट्टिप्मा चा डुम् वाइना॥ 6 नाड्डेउङ् उन्लोक् आनिना साङ्गाति युङ्ग्वा नुङ् आनि पिगिटि हिट्नुङ् डुम्बारिक् डुम्ङि डोक् वासिटि भोनेउम्टे, आनि माङ्जो चेक्टिटि हिट्नुङ् छेम्बाना रिङ् गाड्डे चोगिन्गा॥ 7 टरो उन् व्हाङ्ङि लिसाना गाड्डे डोक् आनि चा व्हाङ्ङि वासिटि भोने, आनि आनिङि साङ्गाति लियुक्, हिट्नुङ् उन्ङाना छा येसुङाना ओहेलिक्ङा आनि सोब्बे पापलाम्मा सेङ्सेङ् आचोक्युक्॥ 8 आनि आप्पेङा आनिङि पाप वाइना माट्टुम्टुम् भोने, आनि आप्पेलाउङ्सा ढाँट् फोक्टुम्टुम्, हिट्नुङ् माङ्हाङ्ङा आनिमेट्टाना छेम्बाना रिङ् आनि ठाहा टोक्निम्ना॥ 9 टरो आनि पाप माङ्हाङ्ङाना ओटोकानाङि काएल्-काबु चोगुम्टुम् भोने, उन्ङा आनि पाप छेमा आचोक्युबियुक् हिट्नुङ् सोब्बे ओचाफेम्मा रिङ्लाम्मा आनि सेङ्सेङ् आचोक्युक्, पोङ्भोने उन् बिस्वासयोग्ए हिट्नुङ् धारमोति ए॥ 10 आनि आप्पेङा पाप चोक्निङ्गेट्निङ्ना नुङ् पिगिटि भोने आनि उन् माङ्जोना रैछो नुङ् माट्टुम्टुम्, हिट्नुङ् उरिङ् आनि निङ्ग्वाङि लिनिना॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.