१ कोरिन्थि 9 - आठपहरियापावालङा आरुचिगा ओचेट्नु लाउङ्सा उन्ङाना आधिकार नाडुटु 1 पाक् आङा सोतान्तर याप्मि माखाइ? पाक् आङा मुलिचेला माखाइ? पाक् आङा आनि टाङ्बा येसु निनिङ्गेट्निङ् नै? पाक् खानि डोक् आङा चोगुङ्ना टोॽवालाम्मा टाङ्बाङि बिस्वास काचोक् याप्मिचि माखाइ टे? 2 आङा आरु याप्मिचिगा लाउङ्सा मुलिचेला माखाक् नुङ् चा खानिलोङ्साम्टे मुलिचेला डोक्, पोङ्भोने खानि खिरिस्टङि आलिसिना रिङ्लाम्मा डोक् आङा मुलिचेला नुङ् खानिङा पारमान् आपिडुम्टुम्॥ 3 आङा फाट्टुर याङ्कालाप्चि लोङ्सा ना डोक् रिङ् लोडुङ्चिङ्चिङ्, 4 पाक् आन्च्याँ चोगाचुङाना टोॽवालाम्मा चामा-ठुङ्माना आधिकार वाइना इ? 5 पाक् आरु मुलिचेलाचि गाड्डे डोक्, डाङ्बाङाना उन्झाचि गाड्डे डोक् हिट्नुङ् पाटरुसङा गाड्डे डोक् आन्च्याँलाउङ्सा चा बिस्वासि पाङ्डाङ्मालोक् लाम्टिमाना आधिकार वाइना इ टे? 6 पाक् बारनाबास लोक् आङा एडोक् आप्पेलाउङ्सा चामा-ठुङ्मा टोॽवा चोक्मा कोन्युक् नि टे? 7 पाक् टिलिङ्गा आप्पे ओखारचाङा डोक् टिलिङ्गाङाना टोॽवा चोगुटुनि टे? पाक् आङ्गुर बारिङि टोॽवा काचोक्बाङा आङ्गुरङाना उसा चामा टोगुन्नै टे? पाक् गोठालेङा पिट् मेरबा ओम्डुचिउङ् नुनु ठुङ्मा टोगुन्नै टे? 8 ना आङा याप्मिङाना निङ्ग्वालाम्मा एडोक् माट्टुङ्ना माखाक्, धारमाबिधिङा चा नाड्डे डोक् माट्टुटु॥ 9 पोङ्भोने मोसाङा धारमाबिधिङि नाड्डे छेप्टुएसुए, “दाइ चोगुम्नाँ गोरुङाना ओयासिङि मोहोला मेट्नेनुम्॥” पाक् ना रिङ् माङ्हाङ्ङा गोरुचि लोङ्सा डोक् माट्टुनाइ टे? 10 पाक् उन्ङा आनि लोङ्सा डोक् नाड्डे आलोडाना माखाइ टे? आनि लोङ्सा डोक् ना रिङ् छेप्टाना ए॥ पोङ्भोने काफेङ्बाङा उनिम्याक् टोगुङ्टुङ् नुङ् डोक् फेङ्सुटु हिट्नुङ् दाइ काचोक्बाङा चा निम्याक् टोगुङ्टुङ् नुङ् डोक् दाइ चोगुटु॥ 11 आन्याँ खानि माझै चोला आपिना लालिक् हिसुएसुम्मे भोने, पाक् खानिलाम्मा आन्याँ लोङ्सा चाहाब् लिगा थोक् टोक्माम्बाक् डोङ् ठोङ्माना रिङ् लियुक्नि टे? 12 आरुङा खानिलाम्मा आम्टेप्मा थोक् टोक्माना हाक युङ्ग्वा भोने, आन्च्याँ लोङ्साउम् हिट्ना नुङ्ना चा झान् बेसि टोक्माना हाक वाइना इ टे? टरो चा आन्च्याँ ना हाक चालाँ चोक्चुन्गेट्चुन्नागा, टरो खिरिस्टङाना नुना खाबोर याप्मिचिङा बिस्वास चोक्मा बाधा उलिन्याक् नुङ् सोब्बे रिङ् आङ्चुचुङा॥ 13 माङ्ठानाङि टोॽवा काचोक्बाचिङा माङ्ठानाङि ठाङ्माउङ्सा ओटाडुगा थोक्लाम्मा डोक् चामा ओटोगुटु, हिट्नुङ् बेदिङि टोॽवा काचोक्बाचिङा भोक् ओठाङ्सुनालाम्मा डोक् ओभागा ओटोगुटु नुङ् खानिलाउङ्सा ठाहा वाइना इ? 14 हिड्नाड्डे डोक् नुना खाबोर पारचार काचोक्बाङा नुना खाबोरलाम्मा डोक् चामा-ठुङ्मा ओटोगुवाक् नुङ् टाङ्बाङा आग्याँ चोगुएसुए॥ 15 टरो आङा खोना चा हाक लाट्निङ्गेट्निङ्ना, हिट्नुङ् आङालोङ्सा नाड्डेना डोक् लिमा कोन्युक् नुङ् नागा रिङ् खानिलाउङ्सा छेप्टुङाना चा माखाक्॥ पोङ्भोने आनाभुक् ठेना चोक्माना रिङ्ङि आरुङा आनाभाक् ठाना रिङ् चोक्मा नुङ्ना बुरु आङा सिमा डोक् ओचेट्नुयुक्॥ 16 आङा नुना खाबोर पारचार चोगुङ्ना आङा ठेलोक् लिमाना रिङ् वाइना, पोङ्भोने ना रिङ् आङा चोक्मा डोक् कोन्युक्॥ आङा ना नुना खाबोर पारचार चोक्नेएट्निङ् भोने आङा साजाए टोगुङ्टुङ्॥ 17 आङा ना टोॽवा आप्पे आनिङ्ग्वाङा चोगुङ्टुङ् भोने, आङा लाउङ्सा इनाम युङ्ग्वा॥ टरो आङा ना टोॽवा आप्पे आनिङ्ग्वाङा चोक्निङ्ना भोने चा माङ्हाङ्ङा आङा ना टोॽवा चोक्माना जिम्मा याङ्पिडानाँ आझै चोक्मा कोन्युक्॥ 18 माङ्हाङ्ङा ना चोक्माना टोॽवा याङ्पिडाइसे भोने खोड्डेउङ् आङा इनाम टोक्मा हिडुङ्टुङ्ना टे? टरो आङाना इनामम्बाक् आङालोक् लिसाना हाक यान्दा मिचोक्ङे हिट्नुङ् खेरोक् डोक् आङाना आप्पे आनिङ्ग्वाङा नुना खाबोर पारचार चोगुङुङ् एडोक् टोगुङ्टुङ्॥ 19 आङा साङाना चा चाकार माखाक्, टरोचा आझै जोम् याप्मिचिङा खिरिस्टङि बिस्वास ओचोगुवाक् नुङ् आङा सोब्बेङाना चाकार लिसेसाङे॥ 20 आङा याहुदि याप्मिचिलोक् टोॽवा चोक्ङाना हिट्नागाँङा खिरिस्टङि बिस्वास ओचोगु नुङ् याहुदिचि गाड्डे डोक् लिङा॥ हिट्नुङ् आङा याहुदि धारमाबिधि पालान् काचोक्चिलोक् वाङानाँ आङा चा धारमाबिधि पालान् चोगुङ्टुङ्॥ आङा आप्पेङा धारमाबिधि पालान् चोक्मा कोन्निचा हिट्नागाँ खिरिस्टङि बिस्वास ओचोगु नुङ् धारमाबिधि पालान् चोगुङ्टुङ्॥ 21 आङा याहुदि धारमाबिधि पालान् ओचोगुन्गा पानिछोङ्बाचिलोक् वाङाना हिट्नागाँ चा खिरिस्टङि बिस्वास ओचोगु नुङ् आङा चा धारमाबिधि पालान् ओचोगुन्गा गाड्डे डोक् लिङा॥ टरो आङा माङ्हाङ्ङाना धारमाबिधि एङ्फुट् चोगुङ्ना माखाक्, आङा खिरिस्टङाना धारमाबिधि पालान् चोगुङ्टुङ्॥ 22 आङा निम्छारो उलिसागा याप्मिचिङि वाङानाँ हिट्नागाँ चा खिरिस्टङि बिस्वास ओचोगु नुङ् उन्चि गाड्डे डोक् निम्छारो लिङा॥ नाड्डेउङ् खोड्डे पारिक् लियुक्ना सोब्बे याप्मिचि हिङ्मा हिडुङ्चिङ् नुङ् ख्वाप्पा लाउङ्सा आङा सोब्बे थोक् लिङा॥ 23 नुना खाबोरलाम्मा आसिक् टोग्मा उहिडुङ् नुङ् डोक् नुना खाबोरङाना लाउङ्सा आङा नागा सोब्बे थोक् चोगुङ्टुङ्॥ 24 पाक् खानिङा ठाहा आटोग्निम्नै, पिम्मा बेला उपिन्गा सोब्बे जाना डोक् उपिन्युक्, टरो पुरेस्कारम्बाक् ठिबाङ्ङा एडोक् टोगुटु नुङ्? नाड्डेउङ् खानि चा इनाम् टोगुङ्टुङ् नुङ् पिन्डानि॥ 25 पाङ्ग्वामाङि ओखाट्गा सोब्बेङा आप्पेलाउङ्सा आड्डिक् टुक्लोक् तालिम पिमा कोन्युक्॥ हिट्नुङ् हिट्नागाँ जाखाम् लियुङ् खाट्ना पुरेस्कार टोक्माउङ्सा हिट्नाड्डे ओचोक्युक्, टरो आनिम्बाक् सोरोक् लियुयाक्ना पुरेस्कार टोक्माउङ्सा नाड्डे चोगिटि॥ 26 हिड्नाड्डेउङ् ङाङ्सुबा याप्मिङा हिॽवाङि खेडोक् लेम्सि गाड्डे आङा लेम्निङ्ना॥ टरो आङा खोनि खाट्नागेट्नाँ हिट्ना ठोङ् पुयुङुङ् पिन्नाँ॥ 27 हिट्नुङ् आङा पाक् चोक्मा मिट्नाङाना हिट्ना चोक्मालाउङ्सा आयेम् साधाँ चोगुङ्टुङ्, आङा नाड्डे चोक्नेट्निङ् भोनेम्टे आरुलाउङ्सा नुना खाबोर पारचार चोगुङ्ना टोॽवाङाना पुरेस्कार टोक्निङ्ना॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.