१ कोरिन्थि 8 - आठपहरियासाम्माङ् चोक्बालाक् थोक्ङाना बारे 1 हाट्ले मुरतिङि ठाङ्बालाक् थोक् बिसाएङि आङा लोनाँनि, आनि सोब्बेलोक् ठोना युङ्ग्वाना रिङ् छेम्बा डोक् ए॥ याप्मिङा टोगुना ठोनाङा उन् आप्पेलाउङ्सा ठेलोक् चोक्ना लियुक्, टरो मायाङाम्बाक् आरु बिस्वासिचि बोल्लेउ चोगुचिचि॥ 2 कोइङा आङा छेम्बा डोक् निसुङ्टुङ् पिक्सा मिट्टुटु भोने, हिट्नाङा ठाहा टोक्माना टेप्मा ठाहा टोगुन्ना॥ 3 टरो जुन्ङा माङ्हाङ् माया चोगुटु, माङ्हाङ्ङा हिट्नागा याप्मिचि उन्ङाना नुङ् लाडुचिचि॥ 4 हिड्नाड्डेउङ् मुरतिङि ठाङ्बालाक् थोक् चामा लियुक्नि लिनिना इ हिट्ना बारेङि आङा खानि लोनाँनि॥ नाहि ठिक् एडोक् माङ्हाङ् युङ्ग्वा नुङ् आनि लाउङ्सा ठाहा युङ्ग्वा, हिट्नुङ् नाराङि लिसागा मुरतिम्बाक् छेम्बाना माङ्हाङ् माखाक्॥ 5 टरो टोनालोग् लोक् नाराङि याप्मिचिङा याप्मा साम्माङ्चि उयुङ्ग्वा नुङ् ओलोडुचिगा ओवाहेट्॥ छेम्बा डोक् याप्मिचिङा नागा याप्मा साम्माङ्चि डोक् साम्माङ् ओचोगुचिगा॥ 6 टरो आनि लोङ्साम्बाक् ठिबाङ् एडोक् माङ्हाङ् पाबा वाहेट्, उन्ङा डोक् सोब्बे थोक् सिरिस्टि चोगुए, हिट्नुङ् उन्ङाना सेवा चोक्माउङ्सा आनि हिङिटि॥ येसु खिरिस्टउम्बाक् आनिना ठिबाङ् एना टाङ्बा ए॥ उन्लाम्मा डोक् सोब्बे थोक् सिरिस्टि लिसे हिट्नुङ् उन्लाम्मा डोक् माङ्हाङ्ङाना सेवा आनि चोगुम्टुम्॥ 7 टरो सोब्बेङा ना रिङ् ठाहा ओटोगुन्ना॥ आम्टेप्मा याप्मिचिङा बिस्वास चोक्मा पाइले मुरतिङि एडोक् निङ्ग्वा उटिसुनाँ हाट्ले चा हिट्नागाँ चामा थोक् ओचोनाँ मुरतिङि ठाङ्बालाक् डोक् चाएट्टुम् नुङ् उमिट्गा॥ हिट्नुङ् हिट्नागा ओचाफेन्लोक् उमिट्गा, पोङ्भोने हाट्ले चा हिट्नागाँ ओचोगुएट्टुना रिङ् गाल्ति नुङ् उमिट्टुगा॥ 8 हिट्नुङ् चामा-ठुङ्माङा माङ्हाङ्ङि नेहेट्टाङ् आनि खाप्मा आहिनिना॥ चानेट्निम् भोने चा आनि जाखाम् लिसिन्गा, चाम्मे भोने चा पाक्चा टोक्निम्ना॥ 9 टरो ओछेक्छेक् लिसानि, खानिगा नाड्डेगा सोतान्तरताङा बिस्वासङि निम्छारो उलिसागा लोङ्सा पापङि ठामाना रिङ् उलिनि चा॥ 10 ठिबाङ् बिस्वासि जुन्ङा नुलोक् ठाहा टोगुन्गेट्टुन्ना, हिट्नाङा खान् नुलोक् ठाहा काटोक्बा बिस्वासिङा माङ्ठानाङि मुरतिङि ठाङ्बालाक् थोक् आचोएट्टुना मानिसे भोने, पाक् मुरतिङि ठाङ्बालाक् पारसाद हिट्नाङा चामा लिनिना नुङ् ठाहा मिटोक्ङे सोम्मा चामाउङ्सा उनिङ्ग्वा टिसुन्नाइ टे? 11 हिट्डेउङ् हिट्ना निम्छारो बिस्वासि खान्ङाना काठोनाङा चोगुनाँ जाक्खाम् लियुक्॥ टरो उन् लाउङ्सा चा खिरिस्ट सियाना ए॥ 12 नाड्डेउङ् खानिङा आरु बिस्वासि भुम्भु-झान्झाचिगा बिरुद्दाङि पाप आचोगुम्टुम्, हिटनुङ् हिट्नागाँ गाल्ति ओचोगुए नुङ् मिप्मा आमेट्टुम्चिम्मुङ् खानिङा खिरिस्टङाना बिरुद्दाङि पाप आचोगुम्टुम्॥ 13 हिड्नाड्डेउङ् मुरतिङि ठाङ्बालाक् चेचे आङा चाङ्नाँ कोइ बिस्वासिङाना उनिङ्ग्वा टुग्युक् भोने, आङा खोना बेला चा मुरतिङि ठाङ्बालाक् चेचे चानिङ्ना, हिट्डेउङ् खोना चा बिस्वासिङा बिस्वास ओनाडुवाक् नुङ् निङ्ग्वा चोक्निङ्ना॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.