१ कोरिन्थि 7 - आठपहरियाभ्याङाना बारे हिसिक्मा 1-2 हाट्ले खानिङा आछेप्टुम्ना चिट्ठिङाना बिसाएङि आङा खानि लोनाँनि॥ येम्बेछाङा भ्या मिचोक्मा डोक् ओचेट्नुना लियुक्, टरो इम्मेप्माजामा टोॽवाङाना वारिक्ङि ठामाना रिङ् जोम् लिसानाँ ख्वाप्पा येम्बेछाचिगा आप्पे उन्चि टालिमाङ् उलियाक्, हिट्नुङ् ख्वाप्पा मेच्छेमाचिगा चा आप्पे उन्चि टालिबाङ् उलियाक्॥ 3 हिट्नुङ् येम्बेछा ओटालिमाङ्लोक् एक्केउ युङ्मा हिट्नुङ् टालिमाङ् ओटालिबाङ्लोक् एक्केउ युङ्मा ओचेट्नुयुक्, नाड्डेउङ् इप्पाङ्ङा डोक् भ्या उलियुङ् युमाना रित पुरो ओचोगुवाक्॥ 4 टालिमाङ्ङाना ओयेम् आप्पे उन्ङाना एडोक् माखाक्, टरो ओटालिबाङ्ङाना चा ए॥ हिट्नाडेडोक् टालिबाङ्ङाना ओयेम् आप्पे उन्ङाना एडोक् माखाक्, टरो ओटालिमाङ्ङाना चा ए॥ 5 हिट्नुङ् ओयेम्बेछा लोक् ओमेच्छेमा ठिबाङ्ङा आरको इन्कार मिचोक्ङे एक्केउ इम्माजामा कोन्युक्॥ छोप्मोङ् धारि बिन्टि चोक्माउङ्सा साम्चिउङ् युङ्मा हिचिचि, हिट्नुङ्ना फेरि हिट्नागाचि एक्केउ युङ्मा कोन्युक्, हिड्डेउङ् हिट्नागाचिगा काम्जोरिङा चोगुनाँ सैतानङा वारिक्ङि ठेम्माहिडुन्चिन्गा॥ 6 नाउम् आङा खानि आग्याँ पिनाँनिउङ् लोनानिगा माखाक्, टरो हिट्ना रिङ् चोक्मा एडोक् साल्लाह पिनानिगा॥ 7 सोब्बे याप्मि आङा गाड्डे डोक् भ्या मिलिए उयुङाना बे ओचेट्नुना लिसे, टरो ख्वाप्पाङा माङ्हाङ्लाम्मा पारिक् पारिक्गा बारदान ओटोगुएसुए॥ ठिबाङ्लोक् ठिक् खाले बारदान युङ्ग्वा भोने, आरकोलोक् आरको खाले बारदान युङ्ग्वा॥ 8 हाट्ले भ्या ओचोक्निगेट्निगा लोक् लाङ्लेप्माचि आङा लोडुङ्चिङ्चिङ्, हिट्नागा आङा गाड्डे डोक् भ्या मिचोक्ङे युङ्मा ओचेट्नुयुक्॥ 9 टरो हिट्नागाँ आप्पे उन्चि निङ्ग्वा सेप्मा उहिडुन्ना भोने, हिट्नागाँ भ्या चोक्मा ओचेट्नु लियुक्॥ पोङ्भोने भ्या मिलिए लाम्सा युङ्मा नुङ्ना भ्या लिमा डोक् ओचेट्नुयुक्॥ 10 हाट्ले भ्या उलिसागा बिस्वासिचि आङा नाड्डेना आग्याँ पिडुङ्चिङ्चिङ्, टरो आङाना माखाक्, टाङ्बाङाना ए॥ ओमेच्छेमाङा ओयेम्बेछा ओनाडुन्चा॥ 11 हिट्नुङ् टालिमाङ् साम्डाउङ् युङालेट्टे भोने चा हिट्ना मेन्झेमा भ्या ओलिनिचा, टरो ओयेम्बेछालोक् फेरि ओटोङ्याक्॥ हिट्नाड्डे डोक् ओयेम्बेछाङा ओटालिमाङ् ओनाडुन्चा॥ 12 हाट्ले आङा खानि बिस्वासिचि जुन्ङा आबिस्वासि भ्या ओचोगुएसुचे हिट्नागा लाउङ्सा चा लोडुङ्चिङ्चिङ्, टाङ्बाङा माखाक्, आङा ए, कोइ बिस्वासि झान्झाङाना बिस्वास चोगुन्गेट्टुन्ना ओटालिमाङ् युङ्ग्वा, हिट्नुङ् हिट्ना उन्लोक् युङ्मा कोन्युक् भोने, हिट्नाङा ओटालिमाङ् ओनाडुन्चा॥ 13 हिट्नाडेडोक् कोइ मेन्झेमाङाना बिस्वास चोगुन्गेट्टुन्ना ओटालिबाङ् युङ्ग्वा, हिट्नुङ् उन्लोक् युङ्मा कोन्युक् भोने, हिट्नाङा ओयेम्बेछा ओनाडुन्चा॥ 14 पोङ्भोने बिस्वास चोगुन्गेट्टुन्ना येम्बेछा बिस्वास काचोक्बा टालिमाङ्लाम्मा सुद्दो लियुक्, हिट्नुङ् बिस्वास चोगुन्गेट्टुन्ना टालिमाङ् बिस्वास काचोक्बा टालिबाङ्लाम्मा सुद्दो लियुक्॥ हिट्डे लिनेट्नि भोने उन्चि छाचि आसुद्दो उलियुक्, टरो हाट्ले हिट्नागा सुद्दो उलिसेसे॥ 15 टरो बिस्वास चोगुन्गेट्टुन्ना साम्युक् भोने साम्मा पिडानुम्॥ हिट्ना बेला हिट्ना बिस्वास काचोक्बा येम्बेछा आथाबा टालिमाङ् सोतान्तर लियुक्॥ टरो माङ्हाङ्ङा आनि हाङ्हाङ् युङि नुङ् आसेगाना॥ 16 पोङ्भोने खान् बिस्वासि टालिमाङ्ङा बिस्वास चोगुन्गेट्टुन्ना कायेम्बेछा लोक् एक्केउ आयुङे भोने, माङ्हाङ्ङा बाचाँ चोगुना रिङ् खान्ङा ठाहा आटोगुन्ना॥ हिट्नाड्डे डोक् खान् बिस्वासि येम्बेछाङा बिस्वास चोगुन्गेट्टुन्ना काटालिमाङ् टाङ्बाङि बिस्वास चोक्मा घुवार फामा आहिडुटु॥ माङ्हाङ्ङा माछेम्डि गाड्डे युङानि 17 ख्वाप्पा माङ्पाङ्ङिगा लाउङ्सा लोमाना आङाना रिङ्उम्बाक् ना ए, जुन्सुके आवास्थाङि माङ्हाङ्ङा खानि माछेम्डि चा हिट्ना पारा डोक् उन्ङि वासानि॥ 18 कोइ याप्मि बिस्वासि लिमा नुङ्ना पाइले डोक् खाताना चोगुएसुए भोने, हिट्नाँ खाताना मिचोक्एना गाड्डे ओचोक्निचा॥ हिट्नुङ् कोइ याप्मि बिस्वासि लिमा नुङ्ना पाइले खाताना चोगुन्गेट्टुन्ना भोने, हिट्नाङा खाताना चोक्मा कोन्निना॥ 19 पोङ्भोने खाताना चोक्मा हिट्नुङ् खाताना मिचोक्मा ठेना रिङ् माखाक्, टरो माङ्हाङ्ङाना आग्याँ पालान् चोक्माउम्बाक् मुलि रिङ् ए॥ 20 जुन् आवास्थाङि माङ्हाङ्ङा याप्मि छेम्डुए, हिट्ना आवास्थाङि डोक् हिट्ना उयुङ्याक्॥ 21 माङ्हाङ्ङा खान् माछेम्डाना बेला कामारा आवासेट्टाना भोने, हिट्ना रिङ् यान्दा चोगुन्, टरो सोतान्तर लिमा आटोगुटु भोने सोतान्तर लिसा॥ 22 पोङ्भोने जुन् याप्मि टाङ्बाङा छेम्मा पाइले कामारा डाना, हाट्ले हिट्ना टाङ्बाङा सोतान्तर याप्मि चोगुएसुए॥ हिट्नाडेडोक् जुन् याप्मि टाङ्बाङा छेम्डुना बेला सोतान्तर डाना, हिट्ना याप्मि खिरिस्टङाना कामारा लिसेसे॥ 23 हिट्नुङ् माङ्हाङ्ङा याप्मा मुल्ले हुङुङ् खानि माइनिगा, हिट्नाड्डेउङ् याप्मिचिगा कामारा काचोक् लिनेनिन्॥ 24 हिट्नाड्डेउङ् बिस्वासि आसाइबाचि, माङ्हाङ्ङा खानि जुन् आवास्थाङि मासेगिएसिए, हिट्ना आवास्थाङि डोक् माङ्हाङ्लोक् वासानि॥ भ्या मिचोक्माना बारे 25 हाट्ले भ्या आचोगिन्गेट्टिन्गा कायेप्माचि बारेङि टाङ्बाङाना आग्याँ आङालोक् पाक्चा वाइना॥ टरो टाङ्बाङा आङा दाया याङ्चोगेसे, हिट्नुङ् आङा लोनानिगा रिङ् खानिङा भोरोसा आचोगुम्टुम् नुङ् आङा बिस्वास चोगुङ्टुङ्, हिट्डेउङ् आङा नुलोक् लोसाङ्ना रिङ् खानि लोनाँनि॥ 26 ना बेला याप्मा याङ्छामा लिएट्, हिट्डेउङ् खोना याप्मि जुन् आवास्थाङि युङ्ग्वा हिट्डेडोक् युङ्नाँ ओचेट्नुयुक् नुङ् आङा मिट्नाँ॥ 27 खानिङि कोइङा पाइले डोक् भ्या चोगुएसुए भोने, ओटालिमाङ् नामाना निङ्ग्वा ओचोगुन्चा॥ खान्ङा भ्या आचोगुन्गेट्टुन्ना भोने भ्या चोक्मा कोन्नेन्॥ 28 टरो खानि माड्डे कोइङा भ्या चोगुए भोने चा हिट्नाङा पाप चोगुन्ना॥ हिट्नाडेडोक् कायेप्मा मेच्छेमाङा भ्या चोगुए भोने चा हिट्नाङा पाप चोगुन्ना॥ टरो जुन्ङा भ्या चोगुटु हिट्नाङा जोम् याङ्छामा आङ्मा कोन्युक्, हिट्नुङ् आङा ना याङ्छामालाम्मा खानि जोगाँ चोक्मा कोन्नेट्नाँनि॥ 29 बिस्वासि आसाइबाचि, हाट्ले आङा खानि ना रिङ् लोनाँनि, ना नाराङि युङ्माना आनिलोक् याप्मा बेला वाइना॥ हाट्लेउङ् खानि भ्या आलिसिगा येम्बेछाचि खानि टालिमाङ्ङि एडोक् निङ्ग्वा पिनेनुम्॥ 30 हिट्नुङ् सोक् काचोक्बाचि सोक् ओचोक्निगा गाड्डे हिट्नुङ् हारका उलिगा हारका उलिनिगेट्निगा गाड्डे उलि॥ पालोवालो काइन्बाचिङा उन्चिलोक् पाक्चा वाइना गाड्डे ओचोक्याक्॥ 31 हिट्नुङ् आनि ना नाराङि जे चोगिटि, नागा थोक्चि आनि लाउङ्सा बाहुमुल्ले माखाक् नुङ् ठाहा टोक्मा कोन्युक्, पोङ्भोने ना नारा हाट्ले जाखाम् लिसा खाट्युगेट्॥ 32 ना चोला बारेङि खानि चिन्तित् लिनेनिन् नुङ् आङा निङ्ग्वा चोगुङ्टुङ्॥ भ्या चोगुन्गेट्टुन्ना याप्मिङा खोड्डेउङ् टाङ्बा हारका लियुक्ना हिट्ना टोॽवाङि निङ्ग्वा पिडुटु॥ 33 टरो भ्या लिसाना याप्मिङा खोड्डेउङ् ओटालिमाङ् ओचाप् टालोक् चोक्माना नुङ् नाराङिगा रिङ्ङि निङ्ग्वा पिडुटु॥ 34 हिट्नुङ् नाड्डेना याप्मिङाना उनिङ्ग्वा इप्पोक् रिङ्ङि लियुक्॥ भ्या लिनिगेएट्निना मेच्छेमाङा ओयेम् हिट्नुङ् ओहाङ्साङा डोक् टाङ्बाङाना सेवा चोक्माना नुङ् उनिङ्ग्वा पिडुटु, टरो भ्या लिसाना मेच्छेमाङाम्बाक् ओयेम्बेछा खोड्डेउङ् खुसि चोक्माना नुङ् नाराङिगा थोक्ङि उनिङ्ग्वा पिडुटु॥ 35 आङा ना रिङ् खानिगा नुलोक् उलियाक् नुङ् डोक् लोनानिगा॥ आङा खानि हिड्डे चोक्मालाम्मा छाक्नानिगा माखाक्॥ टरो खानिङा पाक् नुना हिट्ना चोगानुम् हिट्नुङ् पाक्चा चिन्ता मिचोक्ङे टाङ्बाङाना सेवा चोगानुम् नुङ् लोनानिगा॥ 36 कोइ याप्मिङा उन्लोक् लोइबा ठेन्डुना मेच्छेमालोक् ओचाफेम्मा चाट्ला चोगुना गाड्डे मिट्युक्, हिट्नुङ् हिट्ना मेच्छेमाङाना भ्या चोक्माना बेला चा काक्टुलाबुना भोने, हिट्नाङा भ्या चोक्मा निङ्ग्वा चोगुटु भोने भ्या चोक्मा हिडुटु॥ नाड्डे चोगुनाँ उन् पाप लाहाब् लिनिना॥ हिट्नागाचिगा भ्या लिमा डोक् कोन्युक्॥ 37 टरो हिट्ना याप्मिङा भ्या चोक्निङ्ना नुङ् उनिङ्ग्वा बोल्लेउ चोगुएसुए, हिट्नुङ् खोनाङा चा कारकापङि ओठेन्डुन्गेट्टुन् हिट्नुङ् छोम्बोक् छोम्बोक्ना उनिङ्ग्वा सेप्मा हिडुटु हिट्नुङ् लोइबा ठेन्डुना मेन्झेमा भ्या चोक्मा निङ्ग्वा चोगुन्ना भोने, हिट्नाङा ठिक्का डोक् चोगुटु॥ 38 हिड्डेउङ् जुन्ङा लोइबा ठेन्डुना मेच्छेमालोक् भ्या चोगुटु, हिट्ना याप्मिङा नुलोक् डोक् चोगुटु, टरो जुन्ङा भ्या चोगुन्ना, हिट्नाङा झान् ओचेट्नु चोगुटु॥ 39 हिट्ना मेन्झेमाङाना ओयेम्बेछा हिङ्लोक् सोम्मा हिट्ना मेन्झेमा ओयेम्बेछाङाना ओआधिन्ङि डोक् लियुक्॥ टरो ओयेम्बेछा सिए भोने, हिट्ना मेन्झेमाङा उनिङ्ग्वा टासुना भ्या लिनिगेट्निना येम्बिछालोक् फेरि भ्या चोक्मा हिडुटु॥ टरो हिट्नाङा बिस्वासिलोक् भ्या चोक्मा कोन्युक्॥ 40 टरो हिट्ना फेरि भ्या मिचोक्ए युङ्युक् भोने, हिट्नाङाना ओचाप् टायुक्॥ ना आङाना आनिङ्ग्वा ए, ना रिङ्उम्बाक् माङ्हाङ् ओहाङ्साङा जे याङ्लोडे हिट्नालाम्मा टायाना नुङ् आङा मिट्टुङ्टुङ्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.