१ कोरिन्थि 6 - आठपहरियाबिस्वासिचिङि खेमाबुङ्मा 1 खानि माड्डे ठिबाङ्ङाना आरको बिस्वासि झान्झालोक् खेमाबुङ्मा लिसाइसे भोने, रिङ् टोङ्ङा माङ्हाङ्ङाना सेङ्सेङ्गा ओयाप्मिचि सोरि मिखाट्ए आबिस्वासि सोरि खाप्माउङ्सा हिट्नाङा इट्टुटुनि टे? 2 माङ्हाङ् ओयाप्मिचिङा डोक् हान्डेङ् ना नाराङिगा याप्मिचि न्याए ओचोगुचिचि नुङ् पाक् खानिलाउङ्सा ठाहा वाइना इ? हिट्नुङ् नाराङाना न्याए खानिङा डोक् चोक्मा कोन्युक् भोने, नागा खाट्टिउगा नुङ्ना चा खाट्टिउगा रिङ् पाक् खानि आप्पेङा टोङ्मा आहिनिम्गाइ टे? 3 आनि माङ्हाङ् रिङ् काउग्बाचि चा न्याए चोगुम्चिम्चिम् नुङ् पाक् खानिलाउङ्सा ठाहा वाइना इ? हिट्डेउङ् ना चोलाङि लिना खेमाबुङ्माउम् छेम्बा डोक् खानिङा टोङ्मा हिमा कोन्युक्॥ 4 खानिङि नाड्डेगा खेमाबुङ्मा युङ्ग्वा भोने, पोङ् माङ्पाङ् नुङ् भारागा याप्मिचिङि रिङ् टोङ्माउङ्सा आखाडिटिगा? 5 खानिलोङ्सा ना मोम्मासिमाना रिङ् लिसे नुङ् आङा खानि लोनाँनि॥ हिट्नुङ् खानि आप्पे बिस्वासि भुम्बु-झान्झाचि माझाङि खेमाबुङ्मा रिङ् टोङ्मा काहिबा ठोना लिसाना याप्मि खानि सोरि ठिबाङ् चा वाइना इ टे? 6 टरो ठिबाङ् बिस्वासि झान्झा आरको बिस्वासि झान्झा खेमाबुङ्मा टोङ्माउङ्सा आदालातङि खाट्युक्, हिट्नि चा आड्डिक् ओचाफेम्माम्बाक् बिस्वास ओचोगुन्गा सोरि खेमाबुङ्मा टोङ्मा हिट्नागा ओखाट्गा॥ 7 हिट्नुङ् खानिङि ठिबाङ्ङा आरकोङाना बिरुद्दाङि मुड्डा मामिला चोक्मा डोक् आड्डिक् मोम्मासिमा ए॥ आदालातङि खाप्मा नुङ्ना बुरु रिङ् आङ्मा डोक् ओचेट्नुना लियुक्॥ हिट्नुङ् बुरु आरुङा खानि मासुबिगा डोक् ओचेट्नुयुक् ए॥ 8 टरो खानिङा आप्पे खानि बिस्वासि भुम्भु-झान्झाचिङि ठिबाङ्ङा आरको ओचाफेम्मा आमेट्टुम्चिम्गा हिट्नुङ् आसुबुम्चिम्गा॥ 9 ओभेन्गा याप्मिचिङा माङ्हाङ् उमुलुक्ङि लिक्माना हाक् ओटोगुन्ना नुङ् पाक् खानिलाउङ्सा ठाहा वाइना इ? आप्पेलाउङ्सा ढाँट् फोक्नेनुम्॥ नाड्डेगा वालाफेडुबा टोॽवा काचोक्चि, मुर्ति साम्माङ् काचोक्चि, इम्मेप्माजामा टोॽवा काचोक्चि, वालाफेडुबा येम्बेछाचि, येम्बेछा-येम्बेछा हिट्नुङ् मेच्छेमा-मेच्छेमा इम्मेप्माजामा टोॽवा काचोक्चि, 10 याङ्काखुट्चि, लोभि याप्मिचि, टेडुबा याप्मिचि, चिम्मा काफुट्चि लोक् कासुप्बाचि माङ्हाङ्ङाना मुलुक्ङि लिक्माना हाक् ओटोगुन्ना॥ 11 खानि माड्डे आम्टेप्मा ठिक् बेला नाड्डेगा डोक् आवासेट्टिगा डागा॥ टरो माङ्हाङ्ङा खानि पाप माटुगिबिडिसिए, हिट्नुङ् सेङ्सेङ् माचोगिएसिए॥ हाटले टाङ्बा येसु खिरिस्टङा चोगुनाँ हिट्नुङ् आनि माङ्हाङ्ङाना ओहाङ्सालाम्मा माङ्हाङ्ङा खानि धारमोति याप्मि नुङ् माछेम्डिएसिए॥ आनि येम्ङि माङ्हाङ् मान् चोक्मा 12 खानि माड्डे कोइ नाड्डे आपिगिटि, “आङा जे चा चोग्मा हिडुङ्टुङ् हिट्नुङ् जे चा चामा हिडुङ्टुङ्॥” हिट्ना रिङ् ठिक्का डोक्, टरो सोब्बे रिङ् आङालाउङ्सा घुवार याङ्फाना हिट्नुङ् सोब्बे रिङ्ङा आधिन् याङ्ओचोक्याक् नुङ् आङा पिग्निङ्ना॥ 13 खानि आपिगिटि, “चामागा थोक् माभोक् लाउङ्सा, हिट्नुङ् माभोक् चामागा थोक् लाउङ्सा चोग्बालाक् ए॥” ना रिङ् छेम्बा डोक्, टरो माङ्हाङ्ङा नागाचि इप्पोक् डोक् ठिक् बेला जाक्खाम् चोगुचिचि॥ हिट्नुङ् माङ्हाङ्ङा याप्मिङाना ओयेम् इम्मेप्माजामा टोॽवा चोक्मा लोङ्सा चोगुना माखाक्, टरो टाङ्बा सेवा चोक्मा लोङ्सा चोगुना ए, हिट्नुङ् आनि येम् टाङ्बाङा यान्दा चोगुटु॥ 14 माङ्हाङ् ओबोल्ङा टाङ्बा सियानालाम्मा उहिङ्ग्वाट् चोगुए, हिट्नुङ् उन्ङाना ओबोल्ङा डोक् आनि चा उहिङ्ग्वाट् आचोक्युक्॥ 15 खानि येम् खिरिस्टङाना ओआङ्गा नुङ् पाक् खानिलोङ्सा ठाहा वाइना इ? हिड्डे भोने पाक् आङा खिरस्टङाना आङ्गालोङ्सा वालाफेडुमा टोॽवा काचोक् ओआङ्गालोक् एक्केउ चोगुङ्नि टे? नाउम् लिमा डोक् हिनिना रिङ् ए॥ 16 वालाफेडुमा सोरि खाट्ना याप्मि वालाफेडुमालोक् ठिक्ए येम् लियुक् नुङ् पाक् खानिलाउङ्सा ठाहा वाइना इ? धारमाछाप्लाङि छेप्टेसे, “हिट्नागाचि इप्पाङ् याप्मिचि टोङ्चिउङ् ठिक्ए येम् लिचिचि॥” 17 टरो टाङ्बालोक् टोङ्नाम्बाक् उन्लोक् हाङ्साङि ठिक्ए लियुक्॥ 18 इम्मेप्माजामा टोॽवालाम्मा लाप्माङ् युङानि॥ आरु जुन्सुके पाप याप्मिङा चोगुटु, हिट्नाङा आप्पे ओयेम् बिरुद्दाङि पाप चोगुन्ना॥ टरो इम्मेप्माजामा टोॽवा काचोक्बा याप्मिङा आप्पे ओयेम्ङाना बिरुद्दाङि पाप चोगुटु॥ 19 पाक् खानि येम् सेङ्सेङ्ना हाङ्सा युङ्ना माङ्ठाना नुङ् खानिलोङ्सा ठाहा वाइना इ? माङ्हाङ् आप्पेङा खानि लाउङ्सा सेङ्सेङ्ना हाङ्सा मापिडिटि हिट्नुङ् खानिङि उन् युङ्युक्॥ हिड्नाड्डेउङ् खानि उन्ङाना ए, खानि आप्पेम्बाक् आप्पेङाना माखाक् ए॥ 20 पोङ्भोने माङ्हाङ्ङा याप्मा मुल्ले हुङुङ् खानि माइनिगा॥ नाड्डेउङ् खानिङा खानि येम्ङा माङ्हाङ् मान् चोगानुम्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.