१ कोरिन्थि 5 - आठपहरियाइम्मेप्माजामा टोॽवा बारे 1 खानि माझाङि आड्डिक् इम्मेप्माजामा टोॽवा युङ्ग्वाना रिङ् आङा खेम्सुएसुङे, नाड्डेना इम्मेप्माजामा टोॽवाउम् आबिस्वासि याप्मिचिङि चा लिनिना॥ खानि माड्डे कोइङा आप्पे ओगोङ्मा डोक् युङ्सुएसुए बो॥ 2 हिट्नुङ् खानिम्बाक् आप्पे ठेलोक् आचोगेएट्टि, टरो खानिङाम्टे सानिङ्ग्वा लोमा कोन्युक्॥ हिट्नुङ् नाड्डेना टोॽवा काचोक् याप्मि खानि माझालाम्मा होट्टाडिसानुम्॥ 3-4 आङा खानिलोक् हिट्नि वानिङ् चा सोरोक् खानिङि डोक् आनिङ्ग्वा युङ्ग्वा॥ हिट्नुङ् आङा हिट्नि लिसाङ्ना गाड्डे डोक् नाड्डेना टोॽवा काचोक्बा टाङ्बा येसुङा उनिङ्ङि न्याए चोग्मा हिडुएसुङे॥ खानि आछुमिनाँ आङाना आनिङ्ग्वा चा खानिलोक् लियुक्, हिट्नुङ् उन्ङा चोक्मा निङ्ग्वा चोगुना रिङ् चोक्माउङ्सा आनि टाङ्बा येसुङा आनि बोल् आपियुक्॥ 5 हिट्ना याप्मि खानि छुम्मालाम्मा होट्टाडिसानुमुङ् सैतान उमुक्ङि पिडानुम्, हिट्डेउङ् हिट्ना याप्मिङाना पापलोक्ना टोॽवा जाखाम् लियुक्, हिट्नुङ् टाङ्बाङा न्याए चोगुना लेम्बा ओहाङ्साम्बाक् हिङ्युक्॥ 6 नागा रिङ्ङि खानि ठेमाजामा लिमाम्बाक् ओचेट्नुना लिनिना॥ खानिङा नाड्डे माप्बालाक् रिङ् ठाहा आटोगुम्टुम्, “पिठोङि खाट्टिप्मा एडोक् खामिर काङेभोने ख्वाप्पा पिठो डोक् बोङ्ना चोगुटु॥” 7 खानिङि लिसाना भेन्ना याप्मि होट्टानुमुङ् यामाना खामिर होट्टाडिसानुम्, हिट्नुङ् खानि खामिर मिठेन्ङे फोप्बालाक् पिठो गाड्डेना आलिसिटि॥ छेम्बा डोक्, खानि खामिर मिठेन्ङे फोप्बालाक् पिठो गाड्डेगा, पोङ्भोने आनि छुट्कारा आपिना ठुँबा खिरिस्ट आनि लाउङ्सा भोक् लिमा हिडे॥ 8 हिड्नाड्डेउङ् ओचाफेन्ना हिट्नुङ् पापङा इप्टुना बासि खामिरलोक्ना चालेप्पाङा छुट्काराङाना चाडा आनि मानाँ चोक्निम्चा, टरो फाकाट्ना हिट्नुङ् छेम्बाना आखामिरि चालेप्पाङा चाडा मानाँ चोगुम्॥ 9 आङा पाइले छेप्टुङ्ना चिट्ठिङि खानिलोङ्सा इम्मेप्माजामा टोॽवा काचोक् याप्मिचिलोक् टोङ्नेनिन् नुङ् छेप्टुएसुङ्ना डाना॥ 10 आङा माप्मा कोलुङ्नाम्बाक् ना नाराङिगा इम्मेप्माजामा टोॽवा काचोक्चि, लोभिचि, कासुप्बाचि हिट्नुङ् आरु साम्माङ्ङि बिस्वास काचोक्चिलोक् वानेनिन् युङ्नेनिन् नुङ् माट्टुङ्ना माखाक्॥ उन्चिलाम्मा खानि आयुङेट्टिन् भोने, खानि नारालाम्मा डोक् होम्माउङ् खाप्मा कोन्युक्॥ 11 टरो आङाम्टे आप्पेलाउङ्सा बिस्वास काचोक्बा झान्झा ए नुङ् पिक्सा इम्मेप्माजामा टोॽवा काचोक्बा, लोभि लिना, आरु साम्माङ्ङि बिस्वास काचोक्, चिम्मा काफुट्, टेडुबा हिट्नुङ् कासुप्बालोक् वानेनिन् युङ्नेनिन् नुङ् गोलो माट्टुङ्ना॥ नाड्डेना याप्मिलोक् उम्टे पालोवालो चासिङा चा युङ्नेनिन्॥ 12 माङ्हाङ् बिस्वास ओचोगुन्गेट्टुन्गा भारागा याप्मिचि न्याए चोक्माना आटोॽवा माखाक्, टरो पाक् खानिङा माङ्पाङ्ङि उलिसागा याप्मिचि न्याए चोक्मा कोन्नि नै टे? 13 माङ्हाङ्ङा डोक् आरु याप्मिचि न्याए चोगुचिचि॥ टरो धारमाछाप्लाङि आनि लाउङ्सा नाड्डे छेप्टेसे, “ओभेन्गा याप्मि खानि माझालाम्मा होट्टाडिसानुम्॥” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.