१ कोरिन्थि 4 - आठपहरियामुलिचेलाचिगा टोॽवा 1 खानिङा आन्याँ खिरिस्टङाना ओसेवाक् हिट्नुङ् माङ्हाङ्ङाना ठोबाना रिङ् माप्मा जिम्मा काटोग्बाचि नुङ् मिप्मा कोन्युक्॥ 2 हिट्नुङ् टोॽवा पुमाउङ्सा जिम्मा टोगुना याप्मि बिस्वासयोग्ए लिमा कोन्युक्॥ 3 खानि माड्डे कोइङा आथाबा याप्मिङा ओचोगुना न्याएलाम्मा आङा चोगुङ्ना टोॽवाङाना न्याए चोगुटु भोने, हिट्ना आङा लाउङ्सा ठेना रिङ् माखाक्॥ हिट्नुङ् आङा आप्पे चा न्याए चोक्निङ्ना॥ 4 आङा आप्पे ओचाफेम्मा टोॽवा चोगुङे नुङ् आङा लाउङ्सा ठाहा वाइना, टरो आङा छेम्बा डोक् फाट्टुर मालेना टोॽवा चोगुङे नुङ् ना रिङ्ङा पारमान् पिडुन्ना॥ आङा चोगुङ्ना टोॽवाङाना न्याए काचोक्बा टाङ्बा डोक् वाहेट्॥ 5 हिट्डेउङ् बेला मिलिए पाइले डोक् न्याए चोक्नेनुम्, टाङ्बा उङ्लोक् सोम्मा हाङ्सानुम्॥ टाङ्बाङा डोक् डुम्बारिक् डुम्ङि ठोबागा रिङ् व्हाङ्ङि पारकाट् चोगुटु, हिट्नुङ् याप्मिचिगा निङ्ग्वाङिगा रिङ् पारचिन्दा चोगुटु॥ हिट्ना बेला सोब्बे याप्मिचिङा ओचोगुना टोॽवालाम्मा टोक्माना जाए-जाए माङ्हाङ्लाम्मा ओटोगुटु॥ 6 आम्भु-आन्झाचि हिट्नुङ् आनो-आन्झाचि, खानि लोङ्सा ओचेट्नुना उलियाक् नुङ् डोक् आङालोक् आपोल्लोसङाना उदाहारान् छेप्टुङ्ना, हिड्डेउङ् खानिङा आन्च्याँलाम्मा ना माप्बालाक् रिङ् बुजा चोगानुम्, “कोइ याप्मिङा जे छेप्टुए हिट्ना नुङ्ना टो खानिङा पाक्चा माट्नेनुम्॥” हिट्नुङ् खानि माड्डेङि खोना चा ठिबाङ्ङा आरकोङाना बिरुद्दाङि आनि आनिङि डोक् ठेलोक् चोगिन्चा॥ 7 खानि साङा ठेलोक् माचोगिउङ् आरु याप्मिचि न्याए आचोगुम्चिम्चिम्गा? पाक् खानिलोक् लिसाना रिङ् माङ्हाङ्ङा मापिडिगा माखाइ टे? हिट्नुङ् खानिलोक् लिसागा ख्वाप्पा थोक् माङ्हाङ्लाम्मा आटोगुम्ना भोने, हिट्ना बारदान डोक् माखाक् गाड्डे आचोगिउङ् पोङ् ठेलोक् आचोगिटिगा? 8 खानिलाउङ्सा चाहाब् लिना ख्वाप्पा थोक् आटोगुएसुम्मे नुङ् खानिङा आमिट्टुम्गा॥ खानिम्टे वागाठागा आलिसिसिए बो॥ खानि आन्याँ माले चा हाङ्बा आलिसिएसिए, छेम्बा डोक् खानि हाङ्बा आलिसिना बे ओचेट्नुना लिसे बे हिट्नुङ् खानिलोक् आन्याँ चा सासान् चोगुम्मे बे॥ 9 सेप्मा लाउङ्सा टेयार चोक्बालाक् याप्मि गाड्डे डोक् आनि मुलिचेलाचिलाउङ्सा माङ्हाङ्ङा सोब्बे याप्मिचिगा रेप्माजामाना रिङ् आचोगाना गाड्डे लोसाइसाङे॥ पोङ्भोने आनिलाउङ्सा पाक् लियुक्ना नुङ् ख्वाप्पा नाराङिगा याप्मिचि हिट्नुङ् माङ्हाङ् रिङ् काउग्बाचिङा चा आपुयेट्॥ 10 खिरिस्ट लोङ्सा आन्याँम्बाक् मुरखा लिसिएसिइङे, टरो खानिम्बाक् खिरिस्टङि ठोना लिसागा गाड्डे आलिसिएसिए॥ आन्याँ निम्छारो लिसिएसिङे, टरो खानि बोल्लेउ आलिसिएसिए॥ याप्मिचिङा खानि मान् माचोगिगा, टरो आन्याँम्बाक् चिम्मा याप्मिउफुट्गा॥ 11 हाट्ले चा आन्याँ चामा-ठुङ्मा मिचाए वासेट्टिङा, आन्याँलोक् वाप्माना लोट्लिङ् चा बो वाइगा॥ याप्मिचिङा आन्याँ ओचाफेन्लोक् चाट्ला याप्मिओमेट्गा हिट्नुङ् आन्याँलोक् युङ्माना पाङ्ठाङ् चा वाइना॥ 12 हिट्नुङ् चामा-ठुङ्मा लोङ्सा आन्याँ आप्पे मुक्ङा टोॽवा चोगुम्टुम्मा॥ आरुङा साराप ओयाङ्नाँ हिट्नागा आसिक् पिडुम्चिम्मागा॥ याप्मिचिङा ओचाफेन्लोक् चाट्ला याप्मि ओमेट्नाँ आन्याँ आङ्डुम्टुम्मा॥ 13 याप्मिचिङा आन्याँ ओचाफेन्लोक् याप्मि ओलोनाँ ओचेट्नुलोक् डोक् लोडुम्चिम्चिम्मा॥ हाट्ले सोम्मा आन्याँ नाराङिना फुवार हिट्नुङ् स्वाँराङिना खासिप्पा गाड्डे डोक् काम लाहाब् लिसिन्नागा लिसेएसिङे॥ 14 आङा नागा रिङ् खानि मोम्मासिमा आलिसि नुङ् छेप्टुङ्ना माखाक्, टरो आङा माया चोगुङ्चिगा आप्पे आइछाचि गाड्डे खानि साल्लाह पिमा लोङ्सा छेप्टुङ्ना ए॥ 15 हिट्नुङ् खानिलाउङ्सा खिरिस्टङाना बारेङि काहिसिक्बाचि औधि याप्मा ओवाहेट्, टरो खानिगा याप्मा पाबाचिउम् ओवाइगा॥ पोङ्भोने आङा खानिलाउङ्सा नुना खाबोर पारचार चोगुङ् खिरिस्ट येसुङि खानि पाबा गाड्डे डोक् लिसेसाङे॥ 16 हिट्नाड्डेउङ् खानि चा आङाना योॽवा काचोक्बा लिसानि नुङ् बिन्टि चोग्नाँनि॥ 17 नाड्डेउङ् आङा माया चोगुङ्ना हिट्नुङ् टाङ्बाङि बिस्वासङि बोल्लेउ आइछा गाड्डेना तिमोथि खानि सोरि पाङ्सुङ्गेट्टुङ्॥ आङा सोब्बे डेन्ङि लोक् ख्वाप्पा माङ्पाङ्ङि हिसिक्टुङ्चिङ् गाड्डे डोक् खिरिस्टङि आङाना आचोला खोड्डेना हिट्ना रिङ् उन्ङा खानि फेरि माहिसिक्टिटि॥ 18 हिट्नुङ् आङा खानि सोरि आप्निङ्ना नुङ् उमिट्टाउङ् कोइ-कोइम्बाक् ठेलोक् उलिसेसे॥ 19 टरो टाङ्बाङाना उनिङ्ग्वा लिसे भोने आङा खानि सोरि एला डोक् आप्ङा, हिट्नुङ् हिट्नागा ठेलोक् काचोक्चि छेम्बा डोक् माङ्हाङ्ङाना ओचेट्नुना टोॽवा ओचोगुएट्टुनि आथाबा रिङ् एडोक् ओचेक्येट्गि हिट्ना रिङ् ठाहा टोगुङ्टुङ्॥ 20 पोङ्भोने माङ्हाङ् उमुलुक् रिङ्ङि माखाक्, टरो उन्ङाना ओबोल्ङि लियुक्॥ 21 खानि पाक् चाहाब् आलिसिटिगा? आङा लाहुरिक् याङुङ् आप्ङा नि लुक्मा टुक्माना लोक् माया चोक्माना निङ्ग्वा आप्टुङ् आप्ङा नि? |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.