१ कोरिन्थि 3 - आठपहरियामाङ्हाङ्ङाना सेवा काचोक्चि 1 मायालु आम्भु-आन्झाचि, आङा खानिलोक् चेक्टाङ्नाँ सेङ्सेङ्ना हाङ्सा ओटोगुगा याप्मिचिलोक् चेक्टि गाड्डे आङा चेक्मा हिनेट्निङ्, टरो आङाम्टे खानिलोक् नाराङिगा याप्मिचि गाड्डे आथाबा बिस्वासङि लोप्मोगा नुनु उठुङुगा ओओचिलोक् चेक्टि गाड्डे चेक्टाङे॥ 2 हिट्नाड्डेउङ् आङा खानि राम्ना चामा माखाक्, दुध ठुङ्मा पिनाने, पोङ्भोने हिट्ना बेला खानि राम्ना चामा चामा लाउङ्सा टेयार आलिसिन्गेटिन्गा डागा, हिट्नुङ् हाट्ले चा टेयार आलिसिन्गेट्टिन्गा॥ 3 हिट्नुङ् हाट्ले चा खानि आप्पे निङ्ग्वाङिगा रिङ् युमाङि एडोक् लाहाब् आलिसिइसिए हिट्नुङ् खानि खानिङि रेक् काप्माना रिङ् हिट्नुङ् खेमाबुङ्मा युङ्ग्वा॥ नाड्डेगा रिङ् आचोगुम्टुम् भोने, पाक् आझै चा खानि आप्पे निङ्ग्वाङिगा रिङ् एडोक् पुरो चोग्मा लाहाब् आलिसिन्गेट्टिन्गै टे? छेम्बा डोक्, खानि नाराङिगा याप्मिचि गाड्डे डोक् आचोगेट्टि॥ 4 पोङ्भोने खानिङि कोइङा “आङा पावालङाना याप्मि,” आरकोङा “आङा आपोल्लोसङाना याप्मि” नुङ् आमाट्टुम्टुम् भोने, खानि नाराङिगा याप्मिचि गाड्डे डोक् आलिसिटि॥ 5 हिट्नुङ् आपोल्लोस साइना? पावाल साइना? आन्च्याँउम् माङ्हाङ्ङाना ओसेवाक्चि एडोक्, आन्च्याँलाम्मा खानिङा नुना खाबोरङि बिस्वास आचोगुम्मे॥ टाङ्बाङा आपिडाना टोॽवा एडोक् आनि सोब्बेङा चोगुम्टुम्॥ 6 हिट्नुङ् आङा लालिक् लेट्टुङे, हिट्नुङ् आपोल्लोसङा लालिक्ङि चुवा ठेन्डुए, टरो लालिक् पोना टोॽवाम्बाक् माङ्हाङ्ङा डोक् चोगुए॥ 7 हिट्नाड्डेउङ् लालिक् कालेट्बा लोक् चुवा काठेन् ठेना माखाक्, टरो माङ्हाङ् एना ठेना, पोङ्भोने उन्ङा लालिक् पोमेट्टुटु॥ 8 लालिक् कालेट्बा लोक् चुवा काठेन् टोॽवा चोक्मा ठिक्ए उदेसेङा टोॽवा चोक्मा ए॥ हिट्नुङ् ख्वाप्पाङा आ-आप्पेङा ओचोगुना टोॽवाङाना निमेक् ओटोगुटु॥ 9 पोङ्भोने आनि सोब्बेम्बाक् माङ्हाङ्ङाना टोॽवा काचोक्चि ए, हिट्नुङ् माङ्हाङ्ङाना ओबेङ्सिम्बाक् खानि ए॥ हिट्नुङ् खानिम्बाक् माङ्हाङ्ङा चोगुना पाङ् ए॥ 10 माङ्हाङ्ङा याङ्पिडाना बारदान चालाँ चोगुङुङ् पाङ् काचोक् सिपालु गारो काछेट् गाड्डे डोक् आङा ओजाग् ठेन्डुङे, हिट्नुङ् आरुङाम्बाक् हिट्ना उठुङ्ङि पाङ् ओचोगुटु॥ पाङ् काचोक्बाङा खोड्डेउङ् चोगुएट्टुना हिट्नि नुलोक् निङ्ग्वा पिमा कोन्युक्॥ 11 पोङ्भोने माङ्हाङ्ङा ठेन्डुना ठिक् एना जागम्बाक् येसु खिरिस्ट ए॥ नाउङ्ना खोनाङा चा आरको जाग् ठेन्मा उहिडुन्ना॥ 12 कोइ याप्मिचिङा पाङ् ओजाग् ओठेन्डुना साम्मेङ्, रुपाक्, माहाङ्गो लिङ्गेॽवा ओठेन्डुङ् ओचोगुटु॥ कोइ याप्मिचिङा सिङ्, खिट्लिङ् आथाबा पाराल ओठेन्डुङ् पाङ् ओजाग् ओचोगुटु॥ 13 टरो न्याए लिना लेम्बा हिट्नागाँ खोड्डे पारागा पाङ् ओजाग्ङि चोक्मागा थोक्चि ओठेन्डुएना येसु खिरिस्ट उङ्युङ् ओठेट्युक्, उन्ङा ख्वाप्पा थोक् पारचिन्दा चोगुटु॥ हिट्ना बेला मिङा सोब्बेङा ओचोगुना टोॽवा पारकाट् चोगुटु, हिट्नुङ् ख्वाप्पाङा उन्चिङा ओचोगुना टोॽवा खोड्डेना नुङ् मिङि ठेन्युङ् जाँच चोक्युक्॥ 14 कोइ याप्मिङा हिट्ना जाग् उठुङ्ङि युङ्सुङ् चोगुना टोॽवा मिङि टुन्नेयाट्नि भोने, हिट्नाङा इनाम टोगुटु॥ 15 टरो कोइ याप्मिङाना ओटोॽवा मिङा टुनुङ् जाखाम् चोगुए भोने, हिट्नाङा पाक्चा टुबुन्ना॥ टरो चा मिङा टुनुगेट्टुना पाङ्लाम्मा पिन्डाउङ् होन्डाना याप्मि गाड्डे आप्पे लाउङ्साम्बाक् हिट्ना याप्मिङा हिङुटु॥ 16 पाक् खानि आप्पे माङ्हाङ् पाङ् हिट्नुङ् माङ्हाङ् ओहाङ्सा खानिङि युङ्युक् नुङ् खानिङा ठाहा आटोक्निम्नै? 17 कोइङा माङ्हाङ् पाङ् खेमाबुङ्मा होट्टुङ् जाखाम् चोगुटु भोने, माङ्हाङ्ङा डोक् हिट्ना जाखाम् चोगुटु॥ पोङ्भोने माङ्हाङ् पाङ् सेङ्सेङ्ना ए, हिट्नुङ् हिट्ना पाङ्म्बाक् खानि डोक् ए॥ 18 खोनाङा चा आप्पेलाउङ्सा धोका उपिडुन्चा॥ खानि माड्डे कोइङा ना नाराङिना ठोना लिसाना याप्मि गाड्डे मिट्टुटु भोने, हिट्ना छेम्बाना ठोना लिसाना याप्मि लिमाउङ्सा हिट्ना मुरखा लिमा कोन्युक्॥ 19 पोङ्भोने नाराङिगा याप्मिचिङा ठोना लिसाना नुङ् उमिट्टुगा रिङ् माङ्हाङ्ङाना ओटोकानाङि पाक्चा माखाक् ए॥ धारमाछाप्लाङि नाड्डे छेप्टेसे, “माङ्हाङ्ङा हिट्नागा ठोना उलिसागा याप्मिचि उन्चिङा ओचोगुना ओचाप्पाङ् रिङ्ङि डोक् लाबुचिचि॥” 20 हिट्नुङ् फेरि धारमाछाप्लाङि नाड्डे चा छेप्टेसे, “आम्टेप्मा याप्मिचि आप्पेलाउङ्सा ठोना लिसागा याप्मिचि नुङ् उमिट्टुगा, टरो टाङ्बाङा हिट्नागाँ उमिट्टुगा रिङ् पाक्चा माखाक् नुङ् ठाहा टोगुटु॥” 21 हिट्डेउङ् याप्मिङा ओचोगुना टोॽवाङाना बारेङि ठेलोक् लिमाना टोॽवा चोग्नेनुम्॥ पोङ्भोने सोब्बे थोक् खानिगा ओचेट्नु लोङ्सा डोक् माङ्हाङ्ङा मापिडिटिटि, 22 पावाल नुङ् चा, आपोल्लोस नुङ् चा, पाटरुस नुङ् चा, आथाबा नारा, चोला हिट्नुङ् सिमा कोन्ना लिचा, आथाबा हाट्लेना बेला लिचा, हान्डेङ्ना बेला लिचा, नागा ख्वाप्पा थोक् खानिगा ओचेटुनु लाउङ्सा डोक् ए॥ 23 हिट्नुङ् खानिम्बाक् खिरिस्टङाना, हिट्नुङ् खिरिस्टउम्बाक् माङ्हाङ्ङाना ए॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.