१ कोरिन्थि 16 - आठपहरियायरुसलेमङिगा बिस्वासिचि लाउङ्सा घुवार फामाना ओफाबा 1 हाट्ले यरुसलेमङिगा माङ्हाङ् ओयाप्मिचि लाउङ्सा छुम्सुम्ना ओफाबा बारेङि आङा खानि लोनाँनि॥ गालातियाङिगा माङ्पाङ्ङिगा लाउङ्सा आङा लोडुङ्चिङ्गा गाड्डे डोक् खानिङा चा चोगानुम्॥ 2 सोरोक् हाप्ताङाना पाइलेना लेम्बा खानि सोब्बेङा कामाइ आचोगुम्नालाम्मा चिप्चिप् ओफाबा साम्डानुमुङ् छुम्सा युङ्सानुम्, हिड्नाडेउङ् आङा आप्ङाना बेला ओफाबा फोक्मायाक्मा कोन्निना॥ 3 हिट्नुङ् आङा हिट्नि आप्माउङ् खानिङा भोरोसा आचोगुम्चिम्गा याप्मिचिलोक् हिट्ना ओफाबा यरुसलेमङि हाक्टुङ्चिङ्चिङ्॥ हिट्नुङ् खानिङा डोक् हिट्नागा आसेगुम्चिम्गा नुङ् हिट्नागालोक् चिट्ठि चा छेप्टुङ् पाङ्सुङ्टुङ्॥ 4 टरो आङा चा खाप्मा कोन्युक् नुङ् आमिट्टिटि भोने, हिट्नागा आङालोक् खाट्मा उहियुक्॥ पावालङाना योजाना 5 हाट्लेम्बाक् आङा सिधा माकेडोनिया लिसा खाप्माना निङ्ग्वा चोगुएसुङे, हिट्नुङ् एरोक् खानि टुब्सिङा आङा आप्माँ॥ 6 आङा खानिलोक् छोप्मोङ् सोम्मा एडोक् युङ्ङा होला, आथाबा लिसे भोने चुङ्ग्वामा माइना टेप् डोक् युङ्ङा होला, हिट्नुङ् हिट्नालाम्मा आङा खोनि खाड्ना चा खानिङा आङा घुवार फामा आहिडिटिङा॥ 7 नाबाजि खानिलोक् छोप्मोङ् धारि एडोक् टुब्सिङा माखाक्, टरो टाङ्बाङा उनिङ्ग्वा लिसे भोने, खानिलोक् याप्मा लेम्बा सोम्मा युङ्माना आनिङ्ग्वा चोगुएसुङे॥ 8 टरो पेन्तिकोसङाना चाडा सोम्मा आङा एफिसास खालाङ्गाङि डोक् युङ्ङा॥ 9 पोङ्भोने हिट्नि आङा टाङ्बाङाना टोॽवा चोक्माउङ्सा ठिक् ठेना छेक् टोगुएसुङे, हिट्नुङ् हिट्नि बिरोध काचोक् याप्मिचि चा जोम् ओवाहेट्॥ 10 तिमोथि खानिङि आब्नाँ उन् ओचेट्नुलोक् मेट्टानुम्, पोङ्भोने उन्ङा चा आङा गाड्डे डोक् टाङ्बाङाना टोॽवा चोगुएट्टु॥ 11 नाड्डेउङ् साङा चा उन् ओचाफेन्लोक् चाट्ला मेट्नेनुम्॥ उन् आङि नोक्ना आब्नाँ उन्लोङ्सा लाम्बो-कोक्पोङि चाहाब् लिना थोक् पिडानुमुङ् घुवार फाडानुम्, पोङ्भोने उन् आरु बिस्वासिचिलोक् आप्युगेट् नुङ् आङा ओलाम्बो पुएट्टुङ्॥ 12 हाट्ले आनि बिस्वासि साइबा आपोल्लोसङाना बारेङि आङा लोनाँनि, आङा उन् आरु बिस्वासिचिलोक् एक्केउ खानि टुब्सिङा खाडा नुङ् आम्टेप्मा बिन्टि चोगुङुङ् लोडुङे, टरो उन् हाट्ले हिट्नि आप्मा उनिङ्ग्वा टिसुवाट्टुन्॥ टरो हान्डेङ् मौका टोगुनामे उन् खानि टुब्सिङा आब्युक्॥ आखेरिङिना हिसिक्मा 13 ओछेक्छेक् चोगानि, बिस्वासङि लाहाब् लिसायाक्टानि॥ निङ्ग्वा ठेलोक् चोगानुम् हिट्नुङ् बिस्वास्ङि डोरो लिसानि॥ 14 खानिङा जे आचोगुम्चा सोब्बेलोक् माया चोक्सा चोगानुम्॥ 15 आम्भु-आन्झाचि हिट्नुङ् नाना-झान्झाचि, खानिङा इस्तिफानास लोक् ओपाङ्ङिगा जाहान्चिउम् मिसेन् आनिसुम्चिम्गा॥ हिट्नागाउम् आखैया छेट्राङि सोब्बे नुङ्ना पाइला टाङ्बाङि बिस्वास काचोक्चि ए॥ हिट्नागाँ माङ्हाङ् ओयाप्मिचि लाउङ्सा उन्चि चोला डोक् उपिडुएसुए॥ 16 नाड्डेगा याप्मिचिङा मालोडिगा रिङ् खेम्सानुम्, हिट्नुङ् नाड्डेगा गाड्डे डोक् टोॽवा काचोक् आरु याप्मिचिङा मालोडिगा रिङ् चा टेन्डानि नुङ् आङा खानि बिन्टि चोक्नाँनि॥ 17 हिट्नुङ् इस्तिफानास, फोरटुनास हिट्नुङ् आखाइकास ओटायानाँ आङा आड्डिक् आचाप् टाए, पोङ्भोने खानि आवासेट्टिन्ना बेला हिट्नागा नाहि उलिसाउङ् आङा आँट् टोगुङे॥ 18 हिट्नागाँ खानि आँट् मापिडि गाड्डे डोक् आङा चा आँट् याङ्उपिडाइसाङे॥ छेम्बा डोक्, नाड्डेगा याप्मिचि खानिङा मान् चोक्मा कोन्युक्॥ आखेरिङिना स्या 19 एसिया छेट्राङिगा माङ्पाङ्ङिगाँ खानि बाबा माहाक्टेसिए॥ आकिलास लोक् पिरिस्किला हिट्नुङ् उन्चि पाङ्ङि उछुमागा बिस्वासिचि सोब्बेङा टाङ्बा उनिङ्ङि निङ्ग्वालाम्मा डोक् बाबा माहाक्टेसिए॥ 20 खानिलाउङ्सा सोब्बे बिस्वासि भुम्भु-झान्झाचि हिट्नुङ् नाना-झान्झाचिङा बाबा मालोडेसिए॥ खानिङा ठिबाङ्ङा आरको माया चोक्सा बाबा चोग्गा चोक् चोगानि॥ 21 आङा पावालङा आप्पे आमुक्ङा बाबा छेप्टुएसुङे॥ 22 जुन्ङा टाङ्बा माया चोगुन्ना हिट्ना माङ्हाङ्ङा साराप पिडुटु॥ आनि टाङ्बा एला डोक् उङ्सा॥ 23 टाङ्बा येसुङा खानि लुक्मा माटुक्टेयाक् नुङ् बिन्टि चोगुङ्टुङ्॥ 24 खिरिस्ट येसुङि आलिसिगा खानि सोब्बेलाउङ्सा आङा माया चोक्नाँनि॥ आमेन्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.