१ कोरिन्थि 15 - आठपहरियायेसु सियाउङ् उहिङ्ग्वाट् लिसाना 1 आम्बु-आन्झाचि हिट्नुङ् आनो-आन्झाचि, आङा खानिलाउङ्सा पारचार चोगुङ्ना नुना खाबोरङाना बारेङि फेरि खानि लोनाँनि॥ जुन् नुना खाबोर खानिङा आलाडुम्मे, हिट्ना बिस्वासङि डोक् खानि लाहाब् आलिसेसिए॥ 2 आङा खानिलाउङ्सा पारचार चोगुङ्ना ना नुना खाबोरङि भोरोसा आयुङ्सुम् याक्टुम्मे भोने नाङा खानि माहिङिटि, नाभाम्टे खानिङा आचोगुम्ना बिस्वास खेरोक् डोक् लियुक्॥ 3 पोङ्भोने आङा टोगुङ्ना सोब्बे नुङ्ना मुलि खाबोर डोक् खानि लोनाँने॥ हिट्नाम्बाक्, धारमाछाप्लाङा माट्टु गाड्डे खिरिस्ट आनि पाप लोङ्सा सिए॥ 4 धारमाछाप्लाङा माट्टु गाड्डे याप्मिचिङा उन् उहुम्पाङि उहुमुए, हिट्नुङ् सुम्बोक् लेम्बा उन् सियानालाम्मा उहिङ्ग्वाट् लिसे॥ 5 हिट्नुङ्ना उन् पाटरुसङि ठेट्टे, हिट्नुङ् आरु चेलाचिङि ठेट्टे॥ 6 हिट्नुङ्ना उन् बिस्वास काचोक्चि लेम्बोक् साए नुङ्ना चा याप्मा भुम्बु-झान्झाचि सोरि ठिक्ए खेप् ठेट्टे॥ हिट्नागा माड्डे आम्टेप्मा उसियाडे चा याप्माम्बाक् हाट्ले चा उहिङ्ग्वाट् उयुङ्ग्वा॥ 7 हिट्नुङ् उन् याकुब सोरि ठेट्टे, हिट्नुङ् ख्वाप्पा मुलिचेलाचि सोरि ठेट्टे॥ 8 सोब्बे नुङ्ना एङ्स्वा बेला मिलिए पोङ्साना ओओ गाड्डे आङा सोरि चा उन् ठेट्टे॥ 9 हिट्नुङ् आरु सोब्बे मुलिचेलाचि आङा नुङ्ना ओठेगा ए॥ आङाउम्टे मुलिचेला ए लोमा चा याङ्खान्निना, पोङ्भोने आङा माङ्हाङ् ओमाङ्पाङ्ङिगा आड्डिक् डोक् याङ्छामा चाट्टुङ्चिङे॥ 10 टरो हाटले आङा खोड्डेना लिसेसाङेना हिट्ना माङ्हाङ्ङा आङा आड्डिक् माया लोक् घुवार याङ्फाडानाँ डोक् ए, हिट्नुङ् उन्ङा आङा मायादाया याङ्चोगानाँ आरु मुलिचेलाचि नुङ्ना याप्मा रिङ् चोक्मा काहिबा लिसेसाङे॥ टरो चा आङा आप्पेङाम्बाक् माखाक्, टरो ख्वाप्पा थोक् माङ्हाङ्ङा घुवार याङ्फाडाउङ् चोगुङे॥ 11 हिड्डेउङ् आङा माट्टुङ् चा आथाबा हिट्नागाँ ओमाट्टु चा, आन्याँ सोब्बेङा ठिक्ए खाबोर डोक् पारचार चोगुम्टुम्मा, हिट्ना खाबोर खानिङा पाइले डोक् बिस्वास आचोगेसुम्मे॥ उसियागा याप्मिचि उहिङ्ग्वाट् उलिगा रिङ् 12 हाट्ले आन्याँ खिरिस्ट सियानालाम्मा उहिङ्ग्वाट् लिसे नुङ् पारचार चोगुम्टुम्मा भोने, खानि माड्डे कोइ-कोइङाम्बाक् पोङ् सियाना उहिङ्ग्वाट् लिनिना नुङ् आमाट्टुम्टुम्गा? 13 हिट्नुङ् उसियागा उहिङ्ग्वाट् उलिनिगा भोने, खिरिस्ट चा सियाउङ् उहिङ्ग्वाट् लिनेट्नि॥ 14 खिरिस्ट सियाउङ् उहिङ्ग्वाट् लिनेट्निनाँ बे आन्याँ चोगुम्ना पारचार खेडोक्ना लिसे, हिट्नुङ् खानिङा आचोगुम्ना बिस्वास चा खेडोक्ना लियुक्॥ 15 छेम्बा डोक्, खोना चा याप्मि सियुङ् हिङ्निना भोने, आन्याँ माङ्हाङ्ङाना बारेङि माङ्जो रिङ् काचेक् याप्मिचि लिसिटिङा, पोङ्भोने माङ्हाङ्ङा खिरिस्ट सियाउङ् उहिङ्ग्वाट् चोगुना नुङ् आन्याँ डोक् खानि साँचि पिनेनाँने॥ 16 पोङ्भोने उसियागा उहिङ्ग्वाट् उलिनिगा भोने, माङ्हाङ्ङा खिरिस्ट चा सियानालाम्मा उहिङ्ग्वाट् चोग्वाट्टुन्॥ 17 खिरिस्ट सियाउङ् उहिङ्ग्वाट् लिसाना माखाक् भोने, खानिङा आचोगुम्ना बिस्वास चा बिथाइना ए, हिट्नुङ् खानि पाप आझै चा खानिलोक् युङ्ग्वा॥ 18 हिट्नुङ् खिरिस्ट सियाउङ् उहिङ्ग्वाट् लिनेट्निना भोने, खिरिस्टङि बिस्वास ओचोगुङ् उसियागा याप्मिचि सोब्बे जाखाम् उलियुक्॥ 19 ना चोला लोङ्सा एडोक् खिरिस्टङि आनि आसा युङ्सुम्टुम् भोने, आनि सोब्बे याप्मिचि नुङ्ना आड्डिक् पुमाजामागा लिसिटि॥ 20 टरो खिरिस्टउम्टे सियाउङ् उहिङ्ग्वाट् लिसाउङ् सोब्बे नुङ्ना पाइले कोबाना रिङ् छेम्बा डोक् ए, हिट्नुङ् आरु उसियागा याप्मिचि चा उहिङ्युङ् ओकोब्युक् नुङ् पारमान् आनि आपिडेसे॥ 21 पोङ्भोने ठिबाङ् याप्मिङा चोगुनाँ सिमाना रिङ् टाए, हिट्नाडेडोक् ठिबाङ् याप्मिलाम्मा डोक् चोला टायुक्॥ 22 ख्वाप्पा याप्मिचि सिमा कोन्युक्, पोङ्भोने हिट्नागा आदामङाना उपुङ्लाचि ए, हिड्नाड्डे डोक् खिरिस्टङि उलिसागा सोब्बे हान्डेङ्म्बाक् उहिङ्ग्वाट् उलियुक्॥ 23 टरो आनि सोब्बेङा आ-आप्पे पालो हाङ्मा कोन्युक्॥ खिरिस्टम्बाक् उसियागा याप्मिचिङि पाइले उहिङ्ग्वाट् लिसे, हिट्नुङ् खिरिस्ट नोक्युउङ्नाँ ओयाप्मिचि चा उहिङ्ग्वाट् उलियुक्॥ 24 हिट्नुङ्ना नाराङाना आखेरि बेला टायुक्॥ हिट्ना बेला खिरिस्टङा सोब्बे सासान् काचोक्चि, आधिकार हिट्नुङ् बोल्लेउचि फ्याङ् जाखाम् चोगुचिचि॥ हिट्नुङ्ना उन्ङा सासान् चोक्माना मुलुक् माङ्हाङ् पाबा उमुक्ङि जिम्मा पिडुटु॥ 25 खिरिस्टङा सोब्बे उसाट्टुरचि उलाङ्घेप्पा उछिक्ङि मिचोक्ङे सोम्मा हिट्ना मुलुक्ङि उन्ङा सासान् चोक्मा डोक् कोन्युक्॥ 26 हिट्नुङ् सोब्बे नुङ्ना एङ्स्वाना साट्टुरम्बाक् कासेब्बा ए, हिट्ना खिरिस्टङा जाखाम् चोगुटु॥ 27 पोङ्भोने धारमाछाप्लाङि नाड्डे छेप्टेसे, “माङ्हाङ्ङा सोब्बे थोक् खिरिस्टङाना ओआधिकारङि युङ्सुएसुए॥” टरो “सोब्बे थोक्” ओआधिकारङि नुङ् माप्बालाक् रिङ्म्बाक् माङ्हाङ् चा ओआधिकारङि युङ्ग्वा नुङ् माप्बालाक् माखाक्, पोङ्भोने माङ्हाङ्ङा सोब्बे थोक् खिरिस्टङाना ओआधिकारङि युङ्सुबिडुना ए॥ 28 हिट्नुङ् सोब्बे थोक् खिरिस्टङाना ओआधिकारङि माङ्हाङ्ङा युङ्सुए, हिट्नुङ् छा आप्पेङा चा सोब्बे थोक्ङाना आधिकार कापिबा माङ्हाङ्ङाना ओआधिकारङि युङ्सुटु, हिट्नुङ् माङ्हाङ्ङा डोक् सोब्बे उठुङ्ङि सासान् चोगुटु॥ 29 उसियागा उहिङ्ग्वाट् उलिनिगा भोने उसियागालाउङ्सा याप्मिचिङा पोङ् बाप्टिस्मा ओलाडुटुगा टे? हिट्नालाम्मा पाक् ओचेट्नुना पारिनाम् टायुक्नि टे? 30 उसियागा उहिङ्ग्वाट् उलियुक् नुङ् बिस्वास चोक्निम्ना भोने, पोङ् आनि नाड्डेना किप्माडुङ् आङ्माना टे? 31 आम्भु-आन्झाचि हिट्नुङ् आनो-आन्झाचि, छेम्बा डोक् आङा खानि लोनाँनि, “आङा लेन्सेन् सिमा कोन्ना रिङ् आङ्डुएट्टुङ्॥” खानिङा टाङ्बा येसु खिरिस्टङि बिस्वास आचोगुम्ना रिङ्ङा आङाना आड्डिक् आचाप् टायाना रिङ् माङ्हाङ्ङा ठाहा टोगुटु॥ हिट्नुङ् हिट्डेडोक्, नाहि आङाना दुखे सोरोक् आड्डिक् टुक्ना रिङ् छेम्बा डोक् नुङ् उन्ङा ठाहा टोगुटु॥ 32 हाट्ले नाराङाना इनाम लोङ्सा एडोक् नेहि एफिसासङि आङाना बिरुद्दाङि ओकोब्गा जाङ्गालि जिवाट्चि गाड्डेगालोक् आङा चुङ्ङा भोने, आङालोङ्सा पाक् ओचेट्नुयुक्ना टे? सियाना याप्मि उहिङ्ग्वाट् लिनिना भोने, याप्मिचिङा ओमाट्टु गाड्डे “आनि चाम् हिट्नुङ् ठुङुम्, पोङ्भोने हान्डेङ्उम् आनि सिइयेट्टिटि॥” 33 उहिङ्ग्वाट् लियुङ् कोबिन्गा नुङ् उपिग्गा याप्मिचिङा खानि माटेप्टिन्चा॥ हिट्नुङ् ओचाफेन्ना टाक्लुङ्ङाना लाइलाइङा चोगुनाँ ओचेट्नुना चाट्ला चा जाखाम् लियुक्॥ 34 पाक् नुना ए हिट्ना ओछेक्छेक् चोगानिउङ् मिट्टानुम्, हिट्नुङ् पाप चोक्मा नाडानुम्॥ ना रिङ् खानिलोङ्सा मोम्मासिमाना रिङ् उलियाक् नुङ् आङा खानि लोनाँनि, पोङ्भोने खानि माड्डे आम्टेप्माङा माङ्हाङ् मिसेन् डोक् उनिसुन्गेट्टुन्ना॥ उहिङ्ग्वाट् लिना येम् 35 खानि माड्डे कोइ नाड्डे पिक्युक् होला, “खोड्डेउङ् उसियागा याप्मिचि फेरि उहिङ्ग्वाट् उलियुक्ना, हिट्नुङ् हिट्नागाँगा खोड्डे पारिक्ना येम् लियुक्ना?” 36 नाड्डेना रिङ् कासिलाब्बा ठोनाबा याप्मि ए, ना रिङ् मिट्टानुम्, खानिङा आहिसुम्नाँ लालिक् रोग्नेट्नि भोने हिट्ना कोब्निना॥ 37 खानिङा गाहुँ आथाबा आरु चासोङ्ङाना लालिक् आहिसुम्नाँ लालिक् एडोक् आहिसुम्टुम्, टरो पाइले डोक् कोबाना उघुङ्मा आहिनिम्ना॥ 38 हिट्नुङ् माङ्हाङ्ङा उनिङ्ग्वा गाड्डे सोब्बे पारिक्ङागा लालिक्ङाना आ-आप्पे पारागा उभुङ्मा चोगुटु॥ 39 सोब्बे येम् ठिक्ए पारिक्ङाना लिनिना॥ याप्मिङाना येम् ठिक् पारिक्ङाना लियुक् भोने, जिवाट्चिगा आरको पारिक्ङाना लियुक्, हिट्नुङ् नुवाचिगा येम् आप्पे पारिक्ङाना हिट्नुङ् ङासा ओयेम् आप्पे पारिक्ङाना लियुक्॥ 40 हाट्ले टाङ्साङ्ङिगा नाम्छेमा, लालिक्माङ् हिट्नुङ् चोक्चिङ्गेचिगा आप्पे पारागा ओम्गा उन्चि रुप उलियुक्, हिट्नुङ् नाराङि उलिसागा याप्मिचि, जिवाट्चि हिट्नुङ् नुवाचिगा आप्पे पारागा येम् उलियुक्, टरो टाङ्साङ्ङिगा हिट्नुङ् नाराङि उलिसागा थोक्ङागा आप्पे-आप्पे पारागा रुप् उलियुक्॥ 41 नाम्छेमाङाना व्हाङ् आप्पे पाराना युङ्ग्वा, लालिमाङ्ङाना व्हाङ् आरको पाराना, हिट्नुङ् चोक्चिङ्गेट्ङाना व्हाङ् झान् आरको पाराना, हिट्नुङ् चा खाले-खाले चोक्चिङ्गेट्चिगा आप्पे-आप्पे पाराना व्हाङ् लियुक्॥ 42 हिट्नुङ् उसियागा याप्मिचि उहिङ्ग्वाट् उलिनाँ चा नाड्डे डोक् लियुक्॥ ना येम् सियुङ् उहुम्पाङि हुम्युक् हिट्नुङ् रोग्युक्, टरो ना येम् उहिङ्ग्वाट् लियुङ् फेरि कोब्नाँ खोना बेला चा जाखाम् लिनिना॥ 43 सियाना याप्मिङाना ओयेम् ओचाफेन्ना हिट्नुङ् बोल् बारगाट् मालेना लियुक्, टरो फेरि उहिङ्ग्वाट् लियुङ् कोब्युकाट्नाँ पुयुम्नाँ ओचेट्नुना हिट्नुङ् बोल् बारगाट्लोक्ना लियुक्॥ 44 याप्मिचिङा ना सारुॽवा लोक् साङाना येम् सियुङ् उहुम्पाङि उहुमुटु, टरो फेरि उहिङ्ग्वाट् लियुङ् कोब्नाँ टोनालोग्ङि लिना गाड्डेना येम् लियुक्॥ हाट्ले आनि येम् सारुॽवा लोक् साङाना लिसा गाड्डे, टोनालोग् लाउङ्सा खान्डुना पाराना आनि येम् चा लियुक्॥ 45 धारमाछाप्लाङि नाड्डे छेप्टेसे, “पाइलेना याप्मि आदाम उहिङ्ग्वाट् याप्मि लिसे॥” खिरिस्टम्बाक् आखेरिङिना आदाम ए, उन् चोला कापिबा हाङ्सा लिसे॥ 46 पाइले हाङ्साङाना येम् लिनिना, टरो सारुॽवा लोक् साङाना येम् लियुक्, हिट्नुङ् एडोक् हाङ्साङाना येम् लियुक्॥ 47 माङ्हाङ्ङा पाइलेना याप्मि आदाम नाराङिना खाम्लाम्मा चोगुए, टरो दोस्रो याप्मि खिरिस्टउम्बाक् टोनालोग्लाम्मा उङ्से॥ 48 नाराङिगा ख्वाप्पा याप्मिचिगा येम् नाराङिना खाम्लाम्मा चोक्बालाक् याप्मिङाना येम् गाड्डेना डोक् लियुक्, हिट्नाडेडोक् टोनालोग्ङि ख्वाप्पा याप्मिचिगा येम् टोनालोग्लाम्मा उङ्साना याप्मिङाना येम् गाड्डेना डोक् लियुक्॥ 49 हाट्ले आनि खाम्लाम्मा चोक्बालाक् याप्मि गाड्डेगा डोक्, हिड्नाडेडोक् हान्डेङ् आनि टोनालोग्लाम्मा उङ्साना याप्मि गाड्डेना डोक् लिसिटि॥ 50 आमायालु आम्भु-आन्झाचि हिट्नुङ् आनो-आन्झाचि, आङा खानि लोमा कोन्नानिगा रिङ्उम्बाक्, ना हेलिक् लोक् साङाना येम् सियुक्॥ हिट्नुङ् ना ओछोङ्गुवाट् मिले सोम्मा माङ्हाङ्ङाना खोना बेला चा लाट्निना मुलुक्ङि युङ्मा टोगुन्ना॥ 51 खेम्सानुम्, आङा खानिलाउङ्सा माङ्हाङ्ङाना ठोबाना रिङ् लोनाँनि, आनि बिस्वासिचि सोब्बेम्टे सिइन्गा, टरो आनिना सोब्बे येम्बाक् फेराँ लियुक्, 52 ना रिङ् आखेरि धुटुरिबाङाना सोरा मुक्नामे, छोप्मोङ्ङा डोक्, मिक् झिमिक्ङि लियुक्॥ पोङ्भोने हिट्ना बेला ढुटुरिबाङाना सोरा मुक्युक्, हिट्नुङ् उसियागा ख्वाप्पा याप्मिचि खोना बेला चा उसिनिलोक् उहिङ्ग्वाट् उलियुङ् ओकोब्युक्, हिट्नुङ् आनि ख्वाप्पा फेराँ लिसिटि॥ 53 पोङ्भोने ना सिना येम् हिट्नुङ् रोग्युङ् खाट्ना येम् खोना बेला चा सिनिना हिट्नुङ् रोग्निना येम्ङि फेराँ लियुक्॥ 54 जब ना रिङ् लियुक्, हिट्नुङ् ना सिना येम् खोना बेला चा सिनिना येम्ङि फेराँ लिनाँ, धारमाछाप्लाङि छेप्बालाक् ना रिङ् युयुक्, “माङ्हाङ् सिमाना रिङ्ङा मेप्मा हिडुवाट्टुन्, हिट्ना उन्ङा मेट्टुए॥” 55 “हाउ कासेट्बा, खोलो खान्ङा मेप्मा आहिडुएनि टे? हाउ कासेट्बा, खोलो खान्ङाना मेप्माना कापाइन्?” 56 पापङा चोगुनाँ आनि सिइटि, हिट्नुङ् धारमाबिधिङा चोगुनाँ पापङा आनि उठुङ्ङि सासान् चोगुटु॥ 57 टरो माङ्हाङ्लोङ्सा पोए-पोए उलियाक्, उन्ङा डोक् आनि टाङ्बा येसु खिरिस्टलाम्मा पाप लोक् सिइना रिङ् मेप्माना बोल् आपियुक्॥ 58 हिड्नाड्डेउङ् आमायालु आम्भु-आन्झाचि हिट्नुङ् आनो-आन्झाचि, खानिङा आचोगुम्ना बिस्वासङि निङ्ग्वा मिरिङे बोलियो लिसानिउङ् युङायाक्टानि॥ टाङ्बाङाना ओटोॽवा सोरोक् निङ्ग्वा पिडानुमुङ् चोगानुम्, पोङ्भोने खानिङा आचोगुम्ना सोब्बे थोक् उन्ङि खेरो खाट्निना नुङ् खानिलाउङ्सा ठाहा युङ्ग्वा॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.