१ कोरिन्थि 14 - आठपहरियाबारदानङा बिस्वासिचि बोल्लेउ चोगुचिचि 1 खानि निङ्ग्वाम्बाक् आरु माया चोक्माना रिङ्ङि पिडानुम्, हिट्नुङ् सेङ्सेङ्ना हाङ्सालाम्मा टोक्ना बारदान लाउङ्सा आड्डिक् निङ्ग्वा चोगानुम्॥ हिट्ना चा माङ्हाङ्लाम्माना रिङ् चेक्माना बारदान लोङ्सा निङ्ग्वा चोगानि॥ 2 पोङ्भोने आरु रिङ्ङि काचोक्बाङा याप्मिचिलोक् माखाक्, टरो माङ्हाङ्लोक् चेक्युक्॥ उन्ङा माट्टुना रिङ् साङा चा बुजा ओचोगुन्ना॥ उन्ङा सेङ्सेङ्ना हाङ्साङाना बोल् टोगुङ् ठोबाइसाना रिङ् एडोक् चेक्युक्॥ 3 टरो माङ्हाङ्लाम्माना रिङ् काचेक्बा याप्मिङा बुजा चोगुम्ना रिङ् डोक् चेक्युक्॥ हिट्नुङ् खोनाङा ना रिङ् चेक्युक् हिट्नाङा आरु बोल्लेउ चोगुचिचि, आँट् पिडुचिचि, हिट्नुङ् हाङ्हाङ् मेट्टुचिचि॥ 4 आरु रिङ् काचोक्बाङा उन् आप्पेलाउङ्सा बोल्लेउ चोगुटु, टरो माङ्हाङ्लाम्माना रिङ् काचोक्बाङा माङ्पाङ्ङिगा ख्वाप्पा याप्मिचि डोक् बोल्लेउ चोगुचिचि॥ 5 खानि सोब्बेङा आरु रिङ्ङि चेक्टानि नुङ् आङाना आनिङ्ग्वा युङ्ग्वा, टरो आझै याप्मा खानिङा माङ्हाङ्लाम्माना रिङ् चेक्टानि नुङ् आनिङ्ग्वा युङ्ग्वा॥ माङ्पाङ्ङिगा ओचेट्नु लाउङ्सा आरु रिङ्ङाना उल्था काचोक् वाइना भोने, माङ्हाङ्लाम्माना रिङ् चेक्मा डोक् नुयुक् ए॥ 6 आमायालु आम्भु-आन्झाचि हिट्नुङ् आनो-आन्झाचि, आङा खानि सोरि आरु रिङ् चेक्सा टायाङे भोने, खानि लाउङ्सा पाक् ओचेट्नु लियुक्ना टे? आहाँक् लिमा डोक् लिनिना॥ टरो आङा माङ्हाङ्ङा पारकाट् याङ्चोगाना रिङ्, ठोना आपिना रिङ्, माङ्हाङ्लाम्माना रिङ्, हिसिक्माना रिङ् टाडुङुङ् टाङा भोने गोलो खानिलोङ्सा ओचेट्नुयुक् टे॥ 7 मुरालि लोक् आङ्गोम्ङाना सोक्मा लिनिना, टरो कोइङा पारचिन्दा मुक्लोक् टेनुए भोने, खोना धुन् टेनुएना नुङ् याप्मिचिङा बुजा ओचोगुटु॥ 8 कोइङा भ्यालाउङ्सा धुटुरिबा पारचिन्दा मुक्लोक् उमुट्टुव्ट्टुन् भोने, साक्ङाम्बाक् भ्याङाना ढुटुरिबा उमुट्टुयाना रैछो नुङ् ठाहा ओटोगुटुना टे? 9 खानिङा बुजा चोक्निम्ना रिङ् आचेक्टिनाँ नाड्डे डोक् लियुक्॥ खानिङा पाक् आमाट्टुएट्टुम्ना हिट्ना रिङ् आरुङा बुजा ओचोग्वाट्टुन् भोने, हिट्नाउम्टे उन्चि नुभेक्ङि हिॽवा गाड्डे एडोक् मुक्युक्॥ 10 ना नाराङि खाले-खाले रिङ् उयुङ्ग्वा, हिट्नुङ् सोब्बे रिङ्ङाना उटुप् लियुक्॥ 11 टरो कोइङा माट्टुना रिङ् आङा बुजा चोक्नेएट्निङ् भोनेम्टे हिट्ना लोङ्सा आङा भाराना याप्मि लिङा, हिट्नुङ् हिट्ना चेक्नाम्बाक् आङाना भाराना याप्मि लियुक्॥ 12 हिट्नुङ् हिट्नाडेडोक् छेम्बा खानिङा सेङ्सेङ्ना हाङ्साङा आपिना बारदानचि टोक्माना आड्डिक् निङ्ग्वा आचोगुम्टुम् भोने, माङ्पाङ्ङिगा घुवार फाडुना बारदानचि कोलानुम्॥ 13 हिड्डेउङ् आरु रिङ् काचोक्बाङा पाक् माट्टुएना हिट्ना रिङ्ङाना उटुप् माप्मा हिमाना बारदान लोङ्सा बिन्टि चोक्मा कोन्युक्॥ 14 पोङ्भोने आङा आरु रिङ्ङि बिन्टि चोगुङ्टुङ् भोने, आहाङ्साङा बिन्टि चोगुटु, टरो आङा पाक् माट्टेट्टुङ्ना हिट्ना ठाहा टोक्निङ्ना॥ 15 हिड्डेउङ् हाट्ले आङा नाड्डे चोक्ङा, सेङ्सेङ्ना हाङ्साङा आङा याङ्लोडा गाड्डे बिन्टि चोगुङ्टुङ्, हिट्नुङ् आङा बुजा चोगुङ्ना रिङ्ङि चा बिन्टि चोगुङ्टुङ्॥ आङा आनिङ्ग्वालाम्मा सेङ्सेङ्ना हाङ्साङा याङ्लोडि गाड्डे छाम्लोमा ठाक्टुङ्टुङ्, हिट्नुङ् आङा बुजा चोगुङ्ना रिङ्ङि चा छाम्लोमा ठाक्टुङ्टुङ्॥ 16 खान्ङा कानिङ्ग्वालाम्मा डोक् हाङ्साङा माङ्हाङ् पोए-पोए आठाङ्सेट्टु, टरो आरु याप्मिचिङा खान्ङा पाक् आमाट्टेट्टुना नुङ् बुजा ओचोग्वाट्टुन् भोने, हिट्नागाँ खोड्डेउङ् “आमेन्” ओमाट्टुटुना टे? 17 खान्ङा पोए-पोए आड्डिक् ओचेट्नुलोक् माङ्हाङ् आठाङ्सु चा आरु याप्मिचिम्बाक् नाङा पाक्चा फाइदा पिडुन्चिन्गा॥ 18 आङा माङ्हाङ् पोए-पोए ठाङ्सुङ्टुङ्, पोङ्भोने आङा खानि सोब्बे नुङ्ना याप्मा आरु रिङ्ङि चेक्ङा॥ 19 टरो माङ्पाङ्ङि छुमिउङ् माङ्ध्यान् चोगिना बेला आरु रिङ्ङि हाजार ओटा साब्दाङि चेक्मा नुङ्ना आङा सोब्बेङा बुजा ओचोगुलोक् लेम्बोक् साब्दाङि एडोक् चेक्मा कोन्नाँ॥ 20 मायालु भुम्भु-झान्झाचि हिट्नुङ् नाना-झान्झाचि, पिच्छाचि गाड्डे नागा थोक् बारेङि निङ्ग्वा रिमा नाडानुम्॥ ओभेन्गा रिङ्ङि खानि पिच्छाचि गाड्डे लिमा कोन्युक्, पोङ्भोने पिच्छाचिङा ओभेन्गा रिङ् उमिट्टुन्गा, टरो नागा बारदानचि बारेङि खानि निङ्ग्वा रिमाना रिङ्ङि पासिङ् याप्मिचि गाड्डे डोक् लिसानि॥ 21 धारमाछाप्लाङि टाङ्बाङा नाड्डे माट्टुटु, “खाले-खाले रिङ् काचेक् भारागा याप्मिचिगा यासिलाम्मा नागा आयाप्मिचिलोक् आङा चेक्ङा॥ हिट्नुङ् चा हिट्नागाँ आरिङ् ओखेम्सुन्गा॥” 22 नाड्डेउङ् आरु रिङ्ङि चेक्माना बारदानम्बाक् बिस्वास काचोक्बाचिगा लोङ्सा चिन्ना माखाक्, टरो बिस्वास ओचोगुन्गा लाउङ्सा चिन्ना ए॥ हिट्नुङ् माङ्हाङ्लाम्माना रिङ् माप्माम्बाक् बिस्वास ओचोगुन्गा लोङ्सा ओचेट्नु लिमा माखाक्, टरो बिस्वास ओचोगुगा लोङ्सा ए॥ 23 छेम्बा डोक्, हाट्ले माङ्पाङ्ङि माङ्ध्यान् आचोगिना बेला खानि ख्वाप्पाङा आरु रिङ्ङि चेक्मा ठालाँ ओचोगुम्मे, हिट्नुङ् हिट्ना बेला बिस्वास काचोक्निबाचि आथाबा आरु याप्मिचि उलिगे भोने पाक् हिट्नागाँ खानि ङाङ्सुबाचि मालोडिन्गै टे? 24 टरो खानि सोब्बेङा माङ्हाङ्लाम्माना रिङ् आचेक्टेट्टिना बेला हिट्नि बिस्वास ओचोगुन्गेट्टुन्गा आथाबा आरु याप्मिचि ओटाए भोने, खानि सोब्बेङा आमाट्टुम्ना रिङ् ओखेम्सुङ् हिट्नागा आप्पेङा आन्याँ कायाङ्छाबा याप्मिचि रैछो नुङ् ठाहा ओटोगुटु, हिट्नुङ् उन्चि लाम्बो नोक्माना निङ्ग्वा ओचोगुटु॥ 25 हिट्नुङ् हिट्नागाँ उन्चि निङ्ग्वा भिट्रा ओठोबागा रिङ्चि चा ओमाट्टुटु, हिट्नुङ् हिट्नागाँ उन्चि टुम्बुट् ओयेप्टुङ् ओमाट्टुटु “छेम्बा डोक्, माङ्हाङ् नागा याप्मिचिलोक् युङ्ग्वा॥” माङ्ध्यान् चोक्माना पारा 26 आम्बु-आन्झाचि हिट्नुङ् आनो-आन्झाचि, हाट्ले आङा माप्मा कोलुङ्ना रिङ्म्बाक् ना ए, खानि माङ्पाङ्ङि माङ्ध्यान् चोक्ङा आछुमिनाँ, कोइलोक् छाम्लोमा ठाक्माना बारदान लिमा हियुक्, आरकोलोक् हिसिक्माना रिङ्, आरकोलोक् माङ्हाङ्ङा निमेट्टुना रिङ् माप्माना रिङ् लिमा हियुक्, कोइलोक् आरु रिङ्ङि चेक्माना बारदान लिमा हियुक् भोने, आरकोलोक् हिट्ना रिङ्ङाना उटुप् माप्माना बारदान लिमा हियुक्॥ नागा सोब्बे रिङ्ङा माङ्पाङ्ङिगा बिस्वासिचि बिस्वासङि दोरो चोक्मालाउङ्सा चोक्मा कोन्युक्॥ 27 कोइ आरु रिङ् चेक्मा कोन्युक् भोने, इप्पाङ् आथाबा सुम्भाङ्ङा एडोक् पालो पालो ओचेक्याक्, हिट्नुङ् कोइङाम्बाक् हिट्नागाँ ओमाट्टुना रिङ्ङाना उटुप् ओमाट्टुवाक्॥ 28 टरो हिट्नि रिङ् उटुप् माप्मा काहिबा साक्चा ओवाइगा भोने, बुजा चोक्निम्ना रिङ् काचेक् याप्मिचि माङ्पाङ्ङि स्वाक् उयुङ्याक्॥ हिट्नुङ् हिट्नागा आप्पे माङ्हाङ्लोक् एडोक् ओचेक्याक्॥ 29 माङ्हाङ्लाम्माना रिङ् काचेक्बाचिम्बाक् इप्पाङ् आथाबा सुम्भाङ् टेप्मा उलियाक्, हिट्नुङ् आरुङाम्बाक् हिट्नागाँ ओमाट्टुना रिङ् नुलोक् ओखेम्सुवाक्, हिट्नुङ् छेम्बाना इ माखाक् इ नुङ् बिचार ओचोगुवाक्॥ 30 कोइङा माङ्हाङ्लाम्माना रिङ् चेक्येट्ना बेला हिट्नि उयुङागा आरु कोइङा माङ्हाङ्लाम्मा रिङ् टोगुए भोने हिट्ना ओचेक्याक्, हिट्नुङ् हिट्ना चेक्येट्ना याप्मिम्बाक् चेक्मा ओनाडुवाक्॥ 31 नाड्डेडोक् खानि सोब्बेङा पालो पालो माङ्हाङ्लाम्माना रिङ् चेक्मा आहिडिटि, हिट्डेउङ् सोब्बे सिकाँ लिमा उहियुक्, हिट्नुङ् ख्वाप्पा बिस्वासङि बोल्लेउ उलियुङ् ओखाट्युक्॥ 32 माङ्हाङ्लाम्माना रिङ् माप्माना बारदान लिसाना याप्मिङा आप्पेलाउङ्सा काबुङि युङ्मा काहिबा लियुक्॥ हिट्ना चेक्मा चा हियुक्, चेक्मा चा नामा हिडुटु॥ 33 पोङ्भोने माङ्हाङ् हाङ्हाङ् कापिबा माङ्हाङ् ए, आफाम्ना माखाक्॥ सोब्बे याप्मिचि उछुमाउङ् माङ्हाङ् ओयाप्मिचि माङ्पाङ्ङि माङ्ध्यान् ओचोगु गाड्डे खानिङा चोक्मा कोन्युक्॥ 34 जब माङ्पाङ्ङि साङ्गाटि चोक्येट्ना बेला मेन्झेमाचि मिचेक्ए युङ्मा कोन्युक्॥ धारमाबिधिङि छेप्टि गाड्डे हिट्नागा स्वाक् हिट्नुङ् आधिन्ङि युङ्मा कोन्युक्॥ 35 मेन्झेमाचिङा आम्टेप्मा रिङ् सिलाप्माना निङ्ग्वा ओचोगुए भोने, हिट्नागाँ हिट्नि उछुमाना ठोङ्ङि सिलाप्मा लिनिना, टरो हिट्नागाँ उन्चि पाङ्ढाङ्बाचि पाङ्ङि ओनोक्युङ् सिलाप्मा उहिडुचिचि, पोङ्भोने माङ्पाङ्ङि उछुम्नाँ मेच्छेमाचि चेक्माम्बाक् मोम्मासिमाना रिङ् लियुक्॥ 36 पाक् खानि कोरिन्थिङिगा याप्मिचिलाम्मा माङ्हाङ्ङाना रिङ् उटुम् लिसेनि नुङ् आमिट्टुम्टुम्गि? पाक् खानिङि एडोक् माङ्हाङ्ङाना रिङ् टाएनि टे? 37 खानिङि कोइङा आप्पेलोङ्सा माङ्काटा आथाबा सेङ्सेङ्ना हाङ्साङा याङ्पिडाना बारदान युङ्ग्वा नुङ् मिट्युक् भोने, आङा छेप्टुङ्ना नागा रिङ् टाङ्बाङाना आग्याँ डोक् नुङ् हिट्नाङा ठाहा टोक्मा कोन्युक्॥ 38 टरो हिट्नाँ आङा नाहि छेप्टुङ्ना रिङ् बिस्वास चोगुन्ना भोने, हिट्ना चा बिस्वास चोक्नेनुम्॥ 39 हिड्नाड्डेउङ् आम्बु-आन्झाचि हिट्नुङ् आनो-आन्झाचि, माङ्हाङ्लाम्माना रिङ् चेक्माउङ्सा आड्डिक् निङ्ग्वा चोगानुम्, हिट्नुङ् आरु रिङ् ओचेक्गा चेक्मा छाक्नेनुम्चिम्॥ 40 टरो सोब्बे थोक् ओचेट्नुलोक् हिट्नुङ् माहामा पारा चोगानुम्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.