१ कोरिन्थि 13 - आठपहरियासोब्बे नुङ्ना ठेना बारदान 1 आङा याप्मिचिगा पारिक् पारिक्गा रिङ् लोक् माङ्हाङ् रिङ् काउग्बाचिगा रिङ् चेक्ङा चा आङा आरु माया चोक्निङ्चिङ्गा भोने, आङा चेक्टाङ्ना रिङ्म्बाक् टिङ् टिङ् मुक्ना पोङ्गे हिट्नुङ् छ्याङ् छ्याङ् मुक्ना झ्याम्टा गाड्डे एडोक् मुक्युक्॥ 2 आङालोक् माङ्हाङ्लाम्माना माप्माना रिङ्ङाना बारदान युङ्ग्वा, हिट्नुङ् माङ्हाङ्ङाना ठोबाना रिङ्चि हिट्नुङ् सोब्बे ठोनाचि बुजा चोक्माना बोल् युङ्ग्वा, हिट्नुङ् झोन्झोबा सोम्माहिमाना आङालोक् बिस्वास चा युङ्ग्वा, टरो आङा आरु माया चोक्निङ्चिङ्गा भोने, आङा पाक्चा माखाक्॥ 3 हिट्नुङ् आङा ख्वाप्पा माक्फेन्सुबेन् पाक्चा ओवानिगालोङ्सा हान्डुङ्टुङ्, हिट्नुङ् आयेम् चा मिङि टुम्माउङ्सा पिडुएट्टुङ्, टरो आङा आरु माया चोक्निङ्चिङ्गा भोने, आङा पाक्चा टुप्मा हिनिङ्ना॥ 4 माया काचोक्बा याप्मिलोक् आङ्मा हिमाना बोल् लियुक् हिट्नुङ् दाया चा चोगुटु॥ माया काचोक् याप्मिङा रेक् काप्माना रिङ् चोगुन्ना, ठेलोक् चोक्निना हिट्नुङ् आरुलाम्मा मान् कोलुन्ना॥ 5 हिट्नुङ् माया काचोक्बा याप्मिङा आरु ओचाफेन्लोक् मेट्टुन्चिन्गा, आप्पेङाना ओचेट्नु लिना रिङ् एडोक् चा कोलुन्ना, एला उसिरिबा काट्निना, ओचाफेम्मा रिङ् यान्दा डोक् चोगुन्ना॥ 6 माया काचोक् याप्मि भेन्ना रिङ्ङि ओचाप् टानिना, टरो छेम्बाना टोॽवाङि हारका लियुक्॥ 7 माया काचोक् याप्मिङा सोरोक् आङ्डुटु, हिट्नुङ् सोरोक् बिस्वास चोगुटु, सोरोक् आसा युङ्सुटु, हिट्नुङ् सोरोक् सुरेक्छे चोगुटु॥ 8 माया खोना बेला चा आन्ते लिनिना, टरो माङ्हाङ्लाम्माना माप्माना रिङ्ङाना बारदानचि ओमेक्यु ओखाट्युक्, हिट्नुङ् खाले-खाले रिङ्ङागा बारदानचि ओछोप्युक् हिट्नुङ् ठोनाङाना बारदानचि चा ओलाट्युक्॥ 9 आनि खाट्टिप्मा एडोक् बुजा चोगुम्टुम्, हिट्नुङ् माङ्हाङ्लाम्माना रिङ् चा खाट्टिप्मा एडोक् चेक्टिटि॥ 10 टरो जब पुरो काचोक्बा टायुक्, पुरो उलिनिगा थोक्चि ओमायुङ् ओखाट्युक्॥ 11 आङा ओओ लिसाङ्नाङा ओओचि गाड्डे डोक् चेक्टाङे, हिट्नुङ् ओओ गाड्डे मिट्टुङे, हिट्नुङ् ओओ गाड्डे निङ्ग्वा रिसुङे॥ टरो जब आङा पोसा खाडाङे हिट्नुङ् ओओ गाड्डे चोक्माना पारा नाडुङे॥ 12 हाट्ले आनि खिम्बाराङ् आइनाङि पुयुम् गाड्डे एडोक् निसुम्टुम्, टरो हिट्ना बेलाम्बाक् सोब्बे थोक् पारचिन्दा निसुम्टुम्॥ हाट्ले आङा खाट्टिप्मा एडोक् बुजा चोगुङ्टुङ्, टरो हिट्ना बेलाम्बाक् माङ्हाङ्ङा आङाना बारेङि सोब्बे रिङ् निसु गाड्डे डोक् आङा चा सोब्बे थोक् ठाहा टोगुङ्टुङ्॥ 13 हाट्ले बिस्वास, आसा लोक् माया नागा सुम्बोक् रिङ्चिम्बाक् सोरोक् उलियुयाक्युक्, टरो नागा माड्डेङि सोब्बे नुङ्ना ठेनाम्बाक् माया डोक् ए॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.