१ कोरिन्थि 12 - आठपहरियासेङ्सेङ्ना हाङ्साङाना बारदानचि 1 हाट्ले आम्भु-आन्झाचि हिट्नुङ् आनो-आन्झोचि, सेङ्सेङ्ना हाङ्साङाना बारदान बारेङि खानिङा पारचिन्दा ठाहा टोगानुम् नुङ् आनिङ्ग्वा युङ्ग्वा॥ 2 टाङ्बाङि बिस्वास चोक्मा पाइले खानि खोनालोक् खोना पाराङा चेक्मा डोक् ओचेक्निगा साम्माङ्चि साम्माङ् चोक्सा आवासिजाइगा रिङ् खानिङा ठाहा आटोगुएसुम्मे॥ 3 हिड्नाड्डेउङ् ना रिङ् खानिङा बुजा चोगानुम् नुङ् लोनाँनि, माङ्हाङ्ङाना ओहाङ्सालाम्मा काचेक् याप्मि येसुङाना बिरुद्दाङि चेक्निना, हिट्नुङ् सेङ्सेङ्ना हाङ्सालाम्मा एडोक् येसु डोक् आङाना टाङ्बा नुङ् माप्मा हिडुटु॥ 4 सेङ्सेङ्ना हाङ्साङाना बारदानचि याप्मा पारिक्गा उयुङ्ग्वा, टरो सेङ्सेङ्ना हाङ्साम्बाक् ठिक् एना ए॥ 5 नाड्डेउङ् टाङ्बा आनि पारिक् पारिक्लाम्मा सेवा चोक्मा हिडुम्टुम्, टरो आनि सेवा चोगुम्ना टाङ्बाम्बाक् ठिबाङ् एना॥ 6 हिट्नुङ् आनि पारिक् पारिक्गा टोॽवाचि चोक्मा हिडुम्टुम्, टरो ठिबाङ् एना माङ्हाङ्ङा आनि ख्वाप्पालोङ्सा हिट्नागा टोॽवाचि चोक्माना बोल् आपियुक्॥ 7 सोब्बेङाना ओचेट्नु लिमाउङ्सा सेङ्सेङ्ना हाङ्साङाना ओटोॽवा ओठेट्याक् नुङ् ख्वाप्पालाउङ्सा माङ्हाङ्ङा बारदानचि आपिडाइसे॥ 8 हिट्नुङ् ठिबाङ् लाउङ्सा सेङ्सेङ्ना हाङ्सालाम्मा ठोनाङाना रिङ् चेक्माना, हिट्नुङ् आरकोलोङ्सा हिट्ना सेङ्सेङ्ना हाङ्साङा डोक् ठाहा टोक्मा हिमाना रिङ् पिडुचिचि॥ 9 हिट्ना सेङ्सेङ्ना हाङ्साङा डोक् कोइम्बाक् बिस्वासङि बोल्लेउ लिमा हिट्नुङ् कोइम्बाक् उटुक्गा याप्मिचि नुमानिङ् चोक्माना बारदान पिडुचिचि॥ 10 हिट्नुङ् कोइम्बाक् डोङ् ठोङ्डिगा टोॽवा चोक्माना, कोइम्बाक् माङ्हाङ्ङाना रिङ् चेक्माना बारदान, कोइम्बाक् छेम्बाना आथाबा माङ्जोना हाङ्साचि साम्मा काहिबा बारदान, कोइम्बाक् खाले-खाले रिङ्ङि चेक्माना बारदान, हिट्नुङ् कोइम्बाक् हिट्नागा रिङ्ङाना उटुप् माप्मा हिमाना बारदान उन्ङा पिडुचिचि॥ 11 टरो नागा सोब्बे ठिक्ए सेङ्सेङ्ना हाङ्साङाना टोॽवाचि ए॥ हिट्नुङ् उन्ङा ख्वाप्पा लाउङ्सा आप्पे उनिङ्ग्वालाम्मा नागा बारदानचि पिडुचिचि॥ ठिक्ए येम्, जोम् आङ्गाचि 12 याप्मिङाना ठिक्ए येम्ङि याप्मा आङ्गाचि उयुङ्ग्वा, हिट्नुङ् नागा पारिक् पारिक्गा आङ्गाचि ओटोङ्युङ् ठिक्ए येम् लियुक्॥ हिड्डे डोक् खिरिस्ट चा नाडेना डोक् ए॥ 13 आनि याहुदि नुङ् चा, पानिछोङ्बा नुङ् चा, कामारा नुङ् चा, कामारा माखाक् नुङ् चा, आनि सोब्बेङा ठिक्ए सेङ्सेङ्ना हाङ्सालाम्मा ठिक्ए येम्ङि बाप्टिस्मा लिसेसिए, हिट्नुङ् आनि सोब्बेङि ठिक्ए सेङ्सेङ्ना हाङ्सा युङैसे॥ 14 हिट्नुङ् याप्मिङाना ओयेम् ठिक्ए आङ्गालाम्मा एडोक् लिसाना माखाक्, टरो जोम् आङ्गा ओटोङाउङ् लिसाना ए॥ 15 हाट्ले लाङ्ङा, “आङा मुक् माखाक्, नाड्डेउङ् आङा येम्ङिना आङ्गा माखाक्” माट्टुनाँ, पाक् हिट्ना येम्ङिना आङ्गा लिनिनै टे? 16 हिट्नुङ् नुभेक्ङा, “आङा मिक् माखाक्, नाड्डेउङ् आङा येम्ङिना आङ्गा माखाक्” माट्टुनाँ, पाक् हिट्ना येम्ङिना आङ्गा लिनिनै टे? 17 ख्वाप्पा येम्ङि मिक् एडोक् लिसे भोने खोनालाम्मा खेम्माना? हिट्नुङ् नुभेक् एडोक् लिसे भोने पाक् लाम्मा नाम्माना? 18 हिट्नुङ् येम्ङि उलिसागा ख्वाप्पा आङ्गाचि माङ्हाङ् आप्पे उनिङ्ग्वाङा टोङ्सुङ् युङ्सुएसुए॥ 19 हिट्नुङ् ठिक्ए आङ्गा ख्वाप्पा येम्टेप् लिसे भोने येम् लिमा डोक् बे लिनेट्नि॥ 20 टरो आङ्गाचि जोम् उयुङ्ग्वा, टरो चा येम्उम्बाक् ठिक् एना॥ 21 मिक्ङा मुक् “आङा खान् चाहाब् लिनिङ्ना” लोमा हिडुन्ना॥ हिड्नाड्डे डोक् टेहेक्ङा लाङ् चा “आङा खान् चाहाब् लिनिङ्ना” लोमा हिडुन्ना॥ 22 नाङाना ओसाट्टोङि आनि येम्ङिना सोब्बे नुङ्ना निम्छारो उलिसागा आङ्गाचि डोक् मिलिङे लिनिना॥ 23 हिट्नुङ् आनि येम्ङिना आङ्गाचि याप्मिचिङा उनिसुन्चा नुङ् मिट्टुम्गा आङ्गाचि डोक् आनि आड्डिक् यान्दा चोगुम्टुम्॥ हिट्नुङ् मोन्डिसिइगा आङ्गाचिम्बाक् आनि टेप्टुम्चिम्चिम्॥ 24 हिट्नुङ् आरु निमेप्मा लिना आङ्गाचि आनि टेप्निम्ना॥ आनि यान्दा चोक्निम्चिम्गा आङ्गाचि आड्डिक् आदार पिमाउङ्सा माङ्हाङ्ङा हिट्नागा आङ्गाचि टोङ्सुङ्चिउङ् एक्केउ युङ्सुएसुचे॥ 25 हिड्डेउङ् येम् साम्मा लिनिना, टरो ठिक् आङ्गाङा आरको आङ्गा बोरोबोर यान्दा चोक्मा कोन्युक्॥ 26 ठिक् आङ्गा टुगे भोने सोब्बे येम् डोक् टुग्युक्॥ हिट्नुङ् ठिक् येम्ङिना आङ्गाङा मान् टोगुए भोने, सोब्बे येम् डोक् हारका लियुक्॥ 27 हाट्लेउम् खानि खिरिस्टङाना ओयेम्, हिट्नुङ् खानि सोब्बे उन्ङाना ओयेम्ङाना ओआङ्गाचि ए॥ 28 हिट्नुङ् माङ्हाङ्ङा डोक् माङ्पाङ्ङि– पाइले मुलिचेलाचि, दोस्रोम्बाक् माङ्काटाचि, तेस्रोम्बाक् काहिसिक्बाचि, हिट्नुङ् डोङ् ठोङ्डिगा टोॽवा काचोक्चि, हिट्नुङ् उटुगागा नुमानिङ् चोक्माना बारदान काटोक्चि, आरु घुवार काफाबाचि, माङ्पाङ् चालाँ काचोक् ओठेडोङ्चि हिट्नुङ् खाले-खाले रिङ्ङि चेक्माना बारदान ओटोगुगा याप्मिचि युङ्सुएसुचे॥ 29 पाक् सोब्बे मुलिचेलाचि इ? पाक् सोब्बे माङ्काटाचि इ? पाक् सोब्बे काहिसिक्बाचि इ? माखाक्, सोब्बेङा डोङ् ठोङ्डिना टोॽवा चोक्मा उहिडुन्ना॥ 30 हिट्नुङ् सोब्बेलोक् नुमानिङ् चोक्माना बारदान लिनिना॥ सोब्बेङा खाले-खाले रिङ् चेक्मा उहिडुन्गा॥ हिट्नुङ् सोब्बेङा खाले-खाले रिङ्ङाना उटुप् माप्मा उहिडुन्गा॥ 31 टरो सेङ्सेङ्ना हाङ्साङा आपिना सोब्बे नुङ्ना नुना बारदानचि टोग्माना निङ्ग्वा युङ्सानुम्॥ हिट्नुङ् हाट्ले आङा आझै सोब्बे नुङ्ना नुना लाम्भो खानि लोनाँनि॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.