१ कोरिन्थि 11 - आठपहरिया1 आङा खिरिस्टङाना योॽवा चोगुङ् गाड्डे डोक् खानिङा चा आङाना योॽवा चोगानुम्॥ माङ्ध्यान् चोक्माना पारा 2 हाट्ले खानिलोक् आड्डिक् आङाना आचाप् टायाइसे, पोङ्भोने सोब्बे रिङ्ङि खानिङा आङा याङ्आमिट्टिटिङा, हिट्नुङ् आङा हिसिक्नानिगा हिसिक्मा पालान् आचोगुएट्टुम्॥ 3 हिट्नुङ् खिरिस्टउम्बाक् ख्वाप्पा येम्बेछाचिगा खेन् ए, पाङ्ढाङ्माङाना ओखेन् ओपाङ्डाङ्बा, हिट्नुङ् खिरिस्टङाना ओखेन् माङ्हाङ् नुङ् खानिङा ठाहा टोगानुम्॥ 4 ओटेहेक् टेप्टुङ् बिन्टि काचोक्बा याप्मिङा, आथाबा माङ्हाङ्लाम्माना रिङ् कामाप्बा येम्बेछाङा ओखेन्ङाना ओचाफेन्ना चोगुटु॥ 5 टरो ओटेहेक् मिटेप्मे बिन्टि काचोक्बा, आथाबा माङ्हाङ्लाम्माना रिङ् कामाप्बा मेन्झेमाङा ओयेम्बेछाङाना ओचाफेन्ना चोगुटु, पोङ्भोने हिट्डेना मेन्झेमाउम्टे ओफ्याक् खोक्टुना मेन्झेमा गाड्डेना डोक् लियुक्॥ 6 कोइ मेन्झेमाङा ओटेहेक् टेप्टुन्ना भोने, हिट्नाङा ओफ्याक् ओखोक्टुवाक्॥ टरो मेन्झेमाङा फ्याक् खोक्मा ओचेट्नुना माखाक् भोने, हिट्नाङा ओटेहेक् टेप्मा डोक् कोन्युक्॥ 7 येम्बेछाङा ओटेहेक् टेप्मा कोन्निना, पोङ्भोने येम्बेछा माङ्हाङ्ङा उन् गाड्डेना डोक् चोगुए, हिट्नुङ् येम्बेछाम्बाक् माङ्हाङ् मान् पिमाउङ्सा चोक्बालाक्, हिट्नुङ् मेन्झेमाम्बाक् येम्बेछा मान् पिमाउङ्सा चोक्बालाक्॥ 8 पोङ्भोने येम्बेछा मेन्झेमालाम्मा चोक्बालाक् माखाक्, टरो मेन्झेमाम्बाक् येम्बेछालाम्मा सिरिस्टि लिसाना ए॥ 9 हिट्नुङ् येम्बेछा मेन्झेमा लोङ्सा सिरिस्टि लिसाना माखाक्, टरो मेन्झेमा येम्बेछा लोङ्सा सिरिस्टि लिसाना॥ 10 हिड्डेउङ् माङ्हाङ् रिङ् काउग्बाचि टोकानाङि मेन्झेमाङा आयेम्बेछाङाना आधिन्ङि वाङेट्ना नुङ् चिन्ना निमेट्माउङ्सा ओटेहेक् टेप्मा कोन्युक्॥ 11 टरो टाङ्बा ओटोकानाङि मेन्झेमा लोङ्सा येम्बेछा चाहाब् लियुक्, हिट्नुङ् येम्बेछा लोङ्सा मेन्झेमा चाहाब् लियुक्॥ 12 पोङ्भोने मेन्झेमा येम्बेछालाम्मा सिरिस्टि चोग्बालाक्, हिट्नुङ् येम्बेछा चा मेन्झेमालाम्मा डोक् पोङ्युक्॥ टरो सोब्बे थोक्ङाना उपुन्बाक् माङ्हाङ् डोक्॥ 13 खानि आप्पेङा निङ्ग्वा रिसानुम्, मेन्झेमालोङ्सा ओटेहेक् मिटेप्ए माङ्हाङ् बिन्टि चोक्मा खान्डुटुनि टे? 14 येम्बेछाङा केना फ्याक् ओम्डुए भोने हिट्ना लोङ्सा मोम्मासिमाना रिङ् लियुक् नुङ् पाक् पारचिन्दा वाइना इ टे? 15 टरो मेन्झेमाङाना ओफ्याक् केना युङ्ग्वा भोनेम्टे हिट्ना उन्ङाना लोङ्सा आदार ए, पोङ्भोने मेन्झेमाङाना ओफ्याक् ओटेहेक् टेप्माउङ्सा ए॥ 16 टरो कोइ याप्मिङा ना रिङ्ङि चोसेक् वासेक् चोक्मा कोलुटु भोने आङा माट्टुङ्टुङ्, ना माले आन्याँलोक् आरको खोना चा चालान् वाइना हिट्नुङ् आरु माङ्पाङ्ङि खोना चा रितिथिति वाइना॥ माङ्खोइ ( मात्ति २६:२६-२९ ; मारकुस १४:२२-२५ ; लुका २२:१४-२० ) 17 हाट्ले आङा ना रिङ् लोनानिनाँ खानिगा निङ् चोन्निङ्ना, पोङ्भोने खानि एक्केउ आछुमिनाँ ओचेट्नुना रिङ् माखाक् हिट्ना ओसाट्टोङि ओचाफेन्ना रिङ् आचोगुम्गा॥ 18 पोङ्भोने सोब्बे नुङ्ना पाइलेना रिङ्, माङ्पाङ्ङि आछुमिनाँ खानि निङ्ग्वा टोङ्निना नुङ् आङा खेम्सुएसुङे॥ हिट्नुङ् ना रिङ् आङा खाटिटिउम् बिस्वास चा चोगुङ्टुङ्॥ 19 पाक् खानि माझाङि लिसाना खेमाबुङ्मालाम्मा आरु याप्मिचिङा माङ्हाङ् साइना नुङ् मिसेन् उनिसुटुनि नुङ् खानि आमिट्टिटिगि? छेम्बा डोक्, हिट्नागाँ ठाहा ओटोगुन्ना॥ 20 जब खानि एक्केउ आछुमिउङ् चामा-ठुङ्मा आचोगिटि हिट्नाम्बाक् माङ्खोइ माखाक्॥ 21 पोङ्भोने चामा चासिङा उयुङ्गा सोब्बेङा उन्चिङा ओटाडुगा थोक् साक्चा मिहाङ्ङे चामा ठालाँ ओचोगुटु, टरो पाक्चा वानिगाम्बाक् पाक्चा ओचोन्गा, हिट्नुङ् वागाठागाम्बाक् ओटेडुचिलोक् इमालिङ् उठुङुटु॥ 22 पाक् चामा-ठुङ्माउङ्सा खानिगा आ-आप्पे पाङ् वाइना इ टे? आथाबा पाक् खानिङा माङ्हाङ् माङ्पाङ् चिम्मा आफुट्टुम्टुम्नि? हिट्नुङ् पाक्चा वानिगालोङ्सा मोम्मासिमा चोक्मा आकोलुएट्टुम्चिम्गि? ना बारेङि खानिलोङ्सा आङा पाक् लोनानिगा? पाक् ना रिङ्ङि खानिङा ओचेट्नु ओचोगुम्मे नुङ् माट्टुङ्नि? माखाक्, खानिङा ओचेट्नु ओचोगुमे नुङ् आङा माट्निङ्ना॥ 23 हाट्ले टाङ्बालाम्मा आङा जे सिकाँ लिसाङे, हिट्ना डोक् खानि हिसिक्नानिगा ए, हिट्नुङ् टाङ्बा येसु ओलाबुना युसा उन्ङा चालेपा याङुए, 24 हिट्नुङ् माङ्हाङ् पोए-पोए ठाङ्सुङ् उन्ङा चालेपा एगुए, हिट्नुङ् माट्टुए, “ना खानि लोङ्सा पिनानिगा आयेम् ए, ना आङा मिप्मा लाउङ्सा चोगानुम्॥” 25 हिट्नाडेडोक् चालेप्पा चामा उहिडुङ् खोरे याङुङ् माट्टुए, “ना खोरेउम्बाक् आहेलिक्ङि हुप्बालाक् ओछोङ्ग्वाट् माङ्हुप् ए॥ खोना खोना बेला खानिङा ना आठुङुम्टुम्, आङा मिप्माउङ्सा नाड्डे डोक् चोगानुम्॥” 26 पोङ्भोने खोना खोना बेला खानिङा ना चालेपा आचाम्टुम् हिट्नुङ् ना खोरेलाम्मा आठुङुम्टुम्, खानिङा टाङ्बा उङ्निलोक् सोम्मा उन् सियाना बारेङि आमाट्टुम्टुम् 27 हिड्नाड्डेउङ् खोना खोनाङा मान् मिचोक्ङे टाङ्बाङाना चालेपा चोटु हिट्नुङ् खोरेलाम्मा ठुङुटु, हिट्ना याप्मिङा टाङ्बाङाना ओयेम् लोक् ओहेलिक्ङाना बिरुद्दाङि पाप चोगुटु॥ 28 ख्वाप्पा याप्मिङा चालेपा चामा हिट्नुङ् खोरेलाम्मा ठुङ्मा पाइले आप्पेलोङ्सा जाँच चोक्मा कोन्युक्॥ 29 पोङ्भोने जुन्ङा आनि टाङ्बाङाना ओयेम् नुङ् ठाहा मिटोक्ए चालेपा चोटु हिट्नुङ् खोरेलाम्मा ठुङुटु भोने, हिट्नाङा आप्पे उठुङ्ङि साजाए टाडुटु॥ 30 नाड्डेउङ् खानि माड्डे याप्मा जाना निम्छारो हिट्नुङ् रोगिचि आलिसेसिए, हिट्नुङ् आम्टेप्माम्बाक् उसिए चा॥ 31 टरो आनि आप्पेङा आप्पेलोङ्सा ओचेट्नुलोक् आनि निङ्ग्वा छिक्टुएसुम्मे भोने, माङ्हाङ्ङा न्याए आचोक्निना॥ 32 टाङ्बाङा आनि न्याए आचोक्ना बेला नाराङिगा याप्मिचिलोक् फाट्टुर आलाब्निचा नुङ् उन्ङा आनि सोज्याँ चोक्मा साजाए चा आपियुक्॥ 33 हिड्नाड्डेउङ् बिस्वासि आम्भु-आन्झाचि, माङ्खोइ चामा आछुमिनाँ हाङ्गा हाङ् चायानि॥ 34 खानिङि कोइङाना ओसाॽवासेसे भोने हिट्नाँ ओपाङ्ङि डोक् ओचोवाक्, नाड्डेउङ् खानि माङ्खोइङि चामा आछुमिनाँ माङ्हाङ्ङाना साजाएङि आठाइन्गा॥ आरु रिङ्ङाना बारेङि आङा हिट्नि आप्ङाना बेला खानि लोनाँनि॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.