१ कोरिन्थि 10 - आठपहरियामुरति साम्माङ् मिचोक्माना रिङ् 1-2 आम्बु-आन्झाचि हिट्नुङ् आनो-आन्झाचि, याप्मा बारखा पाइले आनि टुबाठेबाचि साक्चा उयुङ्निना डेन्ङि ओवासागा रिङ् मुन्नेनुम् नुङ् लोनाँनि, हिट्नागा सामुन्दरा माझालाम्मा मोसा रोक् उरिक्टुए हिट्नुङ् हिट्नागा खिमेमाङा लाम्बेट्टुचे॥ नाम्बाक् हिट्नागाँ बाप्टिस्मा ओलाडुगा गाड्डे डोक् डाना॥ 3 हिट्नुङ् हिट्नागा सोब्बेङा माङ्हाङ्ङा पिडुचिगा ठिक्ए पारिक्ङाना चामा ओचोए॥ 4 हिट्नुङ् हिट्नागा सोब्बेङा माङ्हाङ्ङा पिडुचिगा ठिक्ए पारिक्ङाना चुवा उठुङुए, पोङ्भोने हिट्नागा जाहि ओखाडाचा माङ्हाङ्ङा पिडुचिगा लिङ्गेॽवालाम्मा होन्डाना चुवा डोक् उठुङुए॥ ना लिङ्गेॽवाम्बाक् खिरिस्ट आप्पे डाना॥ 5 टरोचा हिट्नागा माड्डे याप्मालोक् माङ्हाङ्ङाना ओचाप् टानेयाट्नि, हिट्नुङ् हिट्नागा साक्चा उयुङ्निना डेन्ङि फ्याङ् जाखाम् उलिसे॥ 6 नागा याप्मिचि गाड्डे डोक् आनि निङ्ग्वा ओचाफेम्मा चोक्निम्चा नुङ् नागा रिङ् आनि हिसिक्मा लाउङ्सा लिसे॥ 7 हिट्नागा माड्डे आम्टेप्माङा मुरति साम्माङ् ओचोगु गाड्डे खानिङा मुरति साम्माङ् चोक्नेनुम्॥ धारमाछाप्लाङि नाड्डे छेप्टेसे, “याप्मिचि चामा-ठुङ्मा उयुङे हिट्नुङ् जे चोक्मा उमिट्टे हिट्ना चोक्मा ओकोबे॥” 8 आनि इम्मेप्माजामा टोॽवा चोक्मा लिनिना, हिट्नागा माड्डे आम्टेप्माङा हिड्डे ओचोगे हिट्नुङ् हिट्नागा ठिक् लेम्बा डोक् तेइस हाजार उसिए॥ 9 हिट्नागा माड्डे आम्टेप्माङा टाङ्बाङाना उनिङ्ग्वा ओकोलु गाड्डे टाङ्बाङाना उनिङ्ग्वा आनि कोन्निम्चा॥ हिट्नागाँ टाङ्बाङाना उनिङ्ग्वा ओकोलुङ्डोक् बिखालु ओप्पुङा ठोगुचिउङ् उसिए॥ 10 हिट्नागा माड्डे आम्टेप्माङा गिन्गिन् ओचोगा गाड्डे डोक् आनि गिनिङ्गिनिङ् चोक्मा लिनिना, हिट्नुङ् हिट्नागा जाखाम् काचोक्बा माङ्हाङ् रिङ् काउग्बाङा जाखाम् चोगुचे॥ 11 नागा सोब्बे रिङ् याप्मिचिङा सिकाँ उलियाक् नुङ् डोक् आनि टुबाठेबाचिङि लिसे, हिट्नुङ् नागा थोक् आनि चा हिट्नागाँ ओचोगु गाड्डे चोक्निम्चा नुङ् धारमाछाप्लाङि छेप्टाना, पोङ्भोने हाट्ले आनि ना जुगङाना आन्तेङि वासेट्टि॥ 12 नाड्डेउङ् कोइङा बिस्वासङि दोरो वाङेट्ङा नुङ् मिट्युक् भोने, हिट्ना पापङि ठामालाम्मा ओछेक्छेक् उलियाक्॥ 13 खानि चोलाङि आरु याप्मिचि निङ्ग्वा छिक्माङि ओठाया गाड्डे डोक् खानि चा आठाइसे॥ टरो माङ्हाङ् बिस्वासयोग्ए वाहेट्, हिट्नुङ् उन्ङा खानिङा आङ्मा डोक् आहिनिम्लोक् निङ्ग्वा छिक्माङि ठामा मापिडिन्गा॥ टरो खानिङा आङ्मा हिडानुम् नुङ् उन्ङा निङ्ग्वा छिक्मालाम्मा भारा होम्माना लाम्भो चा माचोगिबिडिटि॥ 14 हिड्नाड्डेउङ् मायालु आसाइबाचि, मुरति साम्माङ् चोक्मा नाडानुम्॥ 15 खानि ठोना आलिसिगा याप्मिचि नुङ् आङा लोनेट्नानि, आङा लोनाँनिगा रिङ् खानि आप्पेङा जाँचा चोगानुम्॥ 16 जब आनि माङ्खोइङाना खोरे याङुमुङ् माङ्हाङ् पोए-पोए ठाङ्सुम्टुम्, हिट्नुङ् खोरेलाम्मा ठुङुमुङ् खिरिस्टङाना ओहेलिक् लाडुम्टुम्, माखाक् इ माइना इ टे? जब आनि चालेप्पा एगुम्टुम् हिट्नुङ् चाम्मुङ् खिरिस्टङाना ओयेम् लाडुम्टुम्, माखाक् इ माइना इ टे? 17 पोङ्भोने चालेप्पाम्बाक् ठिक् एना ए, हिट्नुङ् आनि याप्मा लिसि चा ठिक् एना येम्, पोङ्भोने आनि सोब्बेङा ठिक्ए चालेप्पालाम्मा चाम्टुम्॥ 18 इस्राएलङिगा याप्मिचि मिट्टानुम्चिम्, जुन्ङा भोक् ठाङ्बालाक् थोक् ओचोटु, हिट्नागा माङ्हाङ्ङाना सेवा चोक्माउङ्सा एक्केउ साहाभागि उलियुक्॥ 19 हिड्डे भोने आङा पाक् माट्टुङ्गेट्टुङ्ना टे? आङा माप्मा कोलुङ्ना रिङ्म्बाक् मुरतिङि ठाङ्बालाक् चेचे आरु चेचे नुङ्ना पाक्चा माखाक् आथाबा मुरतिम्बाक् मुरति नुङ्ना पाक्चा माखाक्॥ 20 टरो आङा खानि ना रिङ् लोनागेट्नाँनि, पाक् भोने मुरति साम्माङ् काचोक् याप्मिचिङा माङ्हाङ्लाउङ्सा माखाक्, टरो टोम्गाचिगा लोङ्सा भोक् ओठाङ्सुटु॥ हिड्नाड्डेउङ् खानि टोम्गाचिगालोक् एक्केउ नाराँ लिसानि नुङ् आनिङ्ग्वा वाइना॥ 21 हिट्नुङ् खानिङा टाङ्बाङाना ओखोरेलाम्मा हिट्नुङ् टोन्डेबाङाना ओखोरेलाम्मा ठुङ्मा आहिनिम्ना॥ हिड्डे डोक् खानिङा टाङ्बाङाना टेबुललाम्मा हिट्नुङ् टोन्डेबाङाना टेबुललाम्मा चामा आहिनिम्ना॥ 22 पाक् खानिङा हिट्नागा इस्राएलि याप्मिचि गाड्डे माङ्हाङ् टाङ्बाङाना ओयाक्लेप्मा आमेट्टुम्टुनि टे? पाक् उन्ङाना साजाए आङ्मा हिडुम्टुम् नुङ् खानि आमिट्टिटिगि? 23 खानि माड्डे आम्टेप्माङा आमाट्टुम्टुम्, “आनि सोब्बे थोक् चोक्मा लियुक्॥” ठिक्का डोक्, टरो सोब्बे रिङ् आनि लाउङ्सा ओचेट्नुना लिनिना॥ खानि आपिगिटि, “आनि सोब्बे थोक् चोक्मा लियुक्॥” छेम्बा डोक्, टरो ख्वाप्पा रिङ्ङा आरु बिस्वासिचि बोल्लेउ चोगुन्चिन्गा॥ 24 साङा चा आप्पे लोङ्सा नुलोक् लिमा ओकोलुन्चा, टरो आरु याप्मि नुलोक् लिमाना रिङ्ङि निङ्ग्वा उपिडुवाक्॥ 25 ना आङाना साल्लाह ए, खालाङ्गाङि छोङ्सिङा उयुङ्सुना चेचे खोनिलाम्मा टाप्बालाक् चामालिना इ लिनिना इ नुङ् मिसिलाप्मे खानिङा चामा आहिडुम्टुम्॥ 26 पोङ्भोने धारमाछाप्लाङि नाड्डे छेप्टेसे, “नाराङि हिट्नुङ् नाहि उलिसागा सोब्बे थोक् टाङ्बाङाना डोक् ए॥” 27 कोइ बिस्वास चोगुन्गेट्टुना याप्मिङा खानिलोङ्सा उपाङ्ङि चामा चासिङा माछेम्डिनाँ खाप्माना निङ्ग्वा लिसे भोने खाडानि, हिट्नुङ् खानि टोकानाङि जे युङ्ग्वा हिट्ना खोनिलाम्मा टाप्बालाक्, चामा लियुक्नि लिनिना इ नुङ् मिसिलाप्मे चायानुम्॥ 28 टरो कोइ याप्मिङा “नाम्टे भोक् ठाङ्बालाक्” नुङ् माट्टुटु भोने, हिट्ना याप्मिङाना लोङ्सा हिट्नुङ् ओचेट्ङाना लाउङ्सा चानेनुम्॥ 29 खानिङा ना गाल्ति लिसे नुङ् आपिगिटि नुङ् आङा माप्मा कोलुङ्ना माखाक्, टरो आरु याप्मिचिङा माप्मा उहिडुटु॥ टरो हाट्ले कोइङा नाड्डे आमाट्टुम्टुम्, “पोङ् आरु याप्मिङाना चेट्ङा आङाना आधिकार बारेङि न्याए चोगुटुना? 30 आङा माङ्हाङ् पोए-पोए ठाङ्सुङुङ्टुङ् भोने, हिट्ना पोए-पोए ठाङ्सुङ् चाङ्ना थोक्ङि आरुङा लोमाजामा कोन्निना॥” 31 नाड्डेउङ् आङा लोनाँनि, खानिङा आचाम्चा, आठुङुम्चा, जे सुके आचोगिचा, सोब्बे माङ्हाङ्ङाना उनिङ् चोन्मा लोङ्सा चोगानुम्॥ 32 खानिङा याहुदिचि उलियाक्, आथाबा पानिछोङ्बाचि उलियाक्, आथाबा माङ्हाङ्ङाना माङ्पाङ्ङिगा उलियाक्, साङाना चा निङ्ग्वा टुग्मेप्माना टोॽवा चोक्नेनिन्॥ 33 आङा चोगुङ् गाड्डे डोक् चोगानुम्॥ जोसो नुङ् चा आङा चोगुङ्ना सोब्बे टोॽवालाम्मा सोब्बे याप्मिचिगा उन्चि चाप् उटायाक् नुङ् कोसिस चोगुङ्टुङ्, आङा आप्पे लोङ्सा नुलोक् लिमाना रिङ् कोन्निङ्ना॥ टरो सोब्बे याप्मिचिङा मुक्टि ओटोगुवाक् नुङ् सोब्बेङाना नुलोक् लिमाना रिङ् कोलुङ्टुङ्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.