१ कोरिन्थि 1 - आठपहरिया1 माङ्हाङ् उनिङ्ग्वालाम्मा खिरिस्ट येसुङाना मुलिचेला लिमा याङ्सेगाना आङा पावाल हिट्नुङ् आनि झान्झा सोस्थेनेसलाम्मा ना चिट्ठि छेप्टाचुङाना ए॥ 2 ना चिट्ठि आङा कोरिन्थिङि आलिसिगा माङ्हाङ्ङाना माङ्पाङ्ङिगा लाउङ्सा छेप्टुएटुङ्, खानिम्बाक् खिरिस्ट येसुङि सेङ्सेङ् लिमा माछेम्डिगा याप्मिचि ए॥ खिरिस्ट येसुङाना उनिङ् ओलाडुगा ख्वाप्पा याप्मिचि सेङ्सेङ् लिमा उन्ङा छेम्डुचि गाड्डे खानि ख्पाप्पालाउङ्सा येसु खिरिस्टलाम्मा सेङ्सेङ् माचोगिएसिए॥ खिरिस्टम्बाक् आनिना हिट्नुङ् हिट्नागाँगा टाङ्बा ए॥ 3 आनि माङ्हाङ् पाबा हिट्नुङ् टाङ्बा येसु खिरिस्टङा खानि मायादाया लोक् हाङ्हाङ् मापिड्याक्॥ पावालङा माङ्हाङ् पोए-पोए ठाङ्सुटु 4 खानि लाउङ्सा आङा माङ्हाङ्ङि सोरोक् पोए-पोए ठाङ्सुङ्टुङ्, पोङ्भोने खानि खिरिस्ट येसुङाना ओयाप्मिचि आलिसिनाँ माङ्हाङ्ङा ओमायादाया खानि मापिडिएसे॥ 5 हिट्नुङ् खिरिस्टङि खानि ख्वाप्पा रिङ्ङि बोल्लेउ आलिसिएसिए, हिट्डेउङ् खानिलोक् चोक्मा हिमाना रिङ् हिट्नुङ् ख्वाप्पा रिङ् माप्मा हिमाना ठोना युङ्ग्वा॥ 6 हाट्ले आन्याँ खिरिस्टङाना बारेङि सोब्बे रिङ् लोनाँने हिट्ना छेम्बाना नुङ् खानि ढुक्का आलिसिएसिए॥ 7 हिड्नाड्डेउङ् आनि टाङ्बा येसु खिरिस्ट उङ्ना लाम्बो आहाङ्सुम्नाँ खानिलाउङ्सा खोना चा आत्मिक् बारदानङाना खाँचो लिनिना॥ 8 आनि टाङ्बा येसु खिरिस्ट उङ्ना लेम्बाङि खानि फाट्टुर माले लिसानि नुङ् उन्ङा खानि आन्ते सोम्मा बोल्लेउ माचोगिटि॥ 9 माङ्हाङ्ङा ना रिङ् चोगुटु, पोङ्भोने उन् बिस्वासयोग्ए वाहेट्॥ उन्ङा डोक् उन्ङाना छा आनि टाङ्बा येसु खिरिस्टलोक् साङ्गातिङि युङ्माउङ्सा खानि माछेम्डिएसिए॥ माङ्पाङ्ङि खेमाबुङ्मा 10 आम्भु-आन्झाचि, आनि टाङ्बा येसु खिरिस्टङाना उनिङ्ङि आङा खानिलाउङ्सा बिन्टि चोगुएट्टुङ्, खानि सोब्बे टोङानिउङ् युङानि, हिट्नुङ् खानिङि साम्माना रिङ् उलिनि चा॥ टरो खानिङा ठिक्ए निङ्ग्वा हिट्नुङ् ठिक्ए रिङ्ङि निङ्ग्वा पिडानुम्॥ 11 पोङ्भोने आम्भु-आन्झाचि, खानि आप्पे-आप्पे आखेएट्टिगा रिङ् क्लोए पाङ्ङिगा जाहान्चिङा आङा याङ्ओलाडाइसे॥ 12 आङा खेम्सुङ्ना रिङ्उम्बाक् नाड्डेना ए, खानि माड्डे आम्टेप्माङा “आङा पावालङाना ओयाप्मि” कोइङाम्बाक् “आङा आपोल्लोसङाना ओयाप्मि” कोइङाम्बाक् “आङा पाटरुसङाना ओयाप्मि” कोइङाम्बाक् “आङा खिरिस्टङाना ओयाप्मि” नुङ् आमाट्टुम्गा बो॥ 13 पाक् खिरिस्ट साम्डेनि टे? पाक् पावाल खानि लाउङ्सा खाप्चेङि भोक् लिसेनि टे? पाक् खानिङा पावालङा उनिङ्ङि बाप्टिस्मा आलाडुम्मेगि टे? 14 माङ्हाङ् पोए-पोए ठाङ्सुङ्टुङ्, आङा किरिस्पास लोक् गायास माले आरु साक्चा बाप्टिस्मा पिनिङ्गेट्निङ्चिङ्गा॥ 15 हिड्डेउङ् खानि साङा चा आनिङ्ङि बाप्टिस्मा लिसिङे नुङ् माप्मा आटोग्निम्ना॥ 16 (छेम्बा डोक्, आङा इस्तिफानास ओपाङ्ङिगा जाहान्चि चा बाप्टिस्मा पिडुङ्चिङे॥ नाउङ् आङा आरु बाप्टिस्मा पिडुङ्चिङेनि माइना हिट्ना रिङ् आङा ठाहा टोक्निङ्ना॥) 17 खिरिस्टङा आङा बाप्टिस्मा पिमा माखाक्, टरो नुना खाबोर पारचार चोक्ङा याङ्पाङ्साङ्ना॥ आङा याप्मिचि लेगालाप्माना रिङ्ङि नुना खाबोर पारचार चोक्नेयाट्निङ्, हिड्नाड्डे चोगुङ्ना बे, खाप्चेङि लिसाना खिरिस्टङाना भोक् साक्ति माले लिसाना खाबोर गाड्डे डोक् बे लिसे॥ माङ्हाङ् ओठोना 18 पोङ्भोने खिरिस्ट खाप्चेङि सियाना बारेङिना खाबोर हान्डेङ् जाखाम् उलिगा लाउङ्सा मुरखा रिङ् ए, टरो आनि उद्दार टोगुएट्टुम्गा लाउङ्सा माङ्हाङ्ङाना ओबोल् ए॥ 19 धारमाछाप्लाङि नाड्डे छेप्टेसे, “ठोना उलिसागा याप्मिचिगा ठोना जाखाम् चोगुङ्टुङ्, हिट्नुङ् ओचाप्पाङ्चिगा उन्चि चाप्पाङ् खेरोक् चोगुङ्टुङ्॥” 20 खोलो, ठोना उलिसागा याप्मि खोनि ओवाहेट्गा? खोलो धारमाबिधि काहिसिक्बाचि? ना जुगङि ओचाप्पाङ्लोक् ओचेक्गा याप्मिचि खोलो टे? माङ्हाङ्ङा नाराङिगा ठोना खेडोक् लिसा गाड्डे डोक् चोगुए॥ 21 नाराङिगा याप्मिचिङा आप्पे उन्चि ठोनाङा माङ्हाङ् मिसेन् निमा उहिडुन्ना रिङ् माङ्हाङ्ङाना ओठानाङा निरनाए चोगुए, हिट्ना ओसाट्टोङि आन्याँ पारचार चोगुम्माना मुरखा रिङ्लाम्मा डोक् बिस्वास काचोक् याप्मिचि हिङ्माना निङ्ग्वा चोगुए॥ 22 याहुदि याप्मिचिङा डोङ् ठोङ्डिना टोॽवाङाना पारमान् ओकोलुगा हिट्नुङ् पानिछोङ्बाचिङा ठोना ओकोलुगा॥ 23 टरो आन्याँम्बाक् खाप्चेङि छुडाना खिरिस्टङाना खाबोर पारचार चोगुम्टुम्मा॥ याहुदिचिङा ना खाबोर लाड्मा चिम्मा उफुट्टुए, हिट्नुङ् पानिछोङ्बाचिङा ना खाबोर काम लाहाब् लिनिना नुङ् उमिट्टुए॥ 24 टरो माङ्हाङ्ङा छेम्डुचिगा याहुदि याप्मिचि आथाबा पानिछोङ्बाचि उलियाक् हिट्नागा लोङ्सा खिरिस्टङा माङ्हाङ्ङाना ओबोल् हिट्नुङ् माङ्हाङ्ङाना ठोना पारकाट् चोगुचिचि॥ 25 पोङ्भोने माङ्हाङ्ङाना मुरखाता याप्मिङाना ठोना नुङ् चा माङ्ठेना, हिट्नुङ् माङ्हाङ्ङाना निम्छारो याप्मिङाना बोल् नुङ्ना चा माङ्बोल्लेउ ए॥ 26 मायालु बिस्वासि साइबाचि, माङ्हाङ्ङा माछेम्डिना बेला खानि खोट्डेगा याप्मिचि आवासेट्टिगा? हिट्ना रिङ् खानिङा मिट्टानुम्॥ हिट्नुङ् नाराङिगा याप्मिचिङा खानि माड्डे खाट्टिप्मा एडोक् ठोना उलिसागा याप्मिचि, खाट्टिप्मा एरोक् सासान् काचोक्बाचि हिट्नुङ् खाट्टिप्मा एडोक् वागाठागा याप्मिचि आवासेट्टिगा नुङ् निङ्ग्वा ओचोगुगा डागा॥ 27 टरो ठोना उलिसागा याप्मिचि मोम्मासिमा मेट्सिङा माङ्हाङ्ङा नाराङिगा याप्मिचिङा मुरखा ओलोडुचिगा याप्मिचि सेगुचे, हिट्नुङ् बोल्लेउ याप्मिचि मोम्मासिमा मेट्सिङा नाराङिगा निम्छारो याप्मिचि सेगुचे॥ 28 नाराङिगा याप्मिचिङा काम लाहाब् लिना नुङ् ओमाट्टुना रिङ् जाखाम् चोक्ङा माङ्हाङ्ङा नाराङिगा याप्मिचिङा काम लाहाब् लिनिना हिट्नुङ् चिम्मा उफुट्टुना थोक् माङ्हाङ्ङा सेगुए॥ 29 माङ्हाङ् ओटोकानाङि खोनाङा चा ठेना लिमाना रिङ् ओचोगुन् नुङ् उन्ङा नाड्डे चोगुए॥ 30 माङ्हाङ्ङा आनि खिरिस्ट येसुलोक् ठिक्ए आचोगाइसे, हिट्नुङ् आनिना ओचेट्नु लाउङ्सा माङ्हाङ्ङा खिरिस्ट डोक् आनिना ठोना आचोगाबिडे॥ खिरिस्टङा आनि माङ्हाङ् ओटोकानाङि धारमोति आचोगाइसे, हिट्नुङ् आनि चोखो लोक् सेङ्सेङ् आचोगाइसे, हिट्नुङ् पापलाम्मा आनि छुट्कारा आचोगाइसे॥ 31 हिट्नाड्डेउङ् धारमाछाप्लाङि नाड्डे छेप्टेसे, “कोइङा ओनाभुक् ठेलोक् चोगुटु भोने, टाङ्बाङा चोगुना टोॽवाङि एडोक् ठेलोक् ओचोगुवाक्॥” |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.