تِيطُس 3 - كِتاب العَهد الجَّديد مِن الكِتاب المُقَدَّس

عَمَل الخير

¹ زَكِّرُم يَكونو تِحِت سُلطَة الرّؤساء و السَّلاطين، و يَطيعو و يَكونو جاهِزين لِكُلّو عَمَل طَيب.

² و ما يَقولو حاجَه بَطّالَه عَن أي واحِد، و ما يَشاكلو لَكِن يَكونو عِندَهُم صَبر، و يَوَرّو كُلّو وَداعَه لِكُل النّاس.

³ عَشان نِحنا كَمان كُنّا مِن قُبّال بَليدين، و ما طيعنا، و غَشّونا، و خَدَمنا شَهوات مُختَلِفَه و السُّرور. و كُنّا نَعيش في الفِكر البَطّال و الحَسَد، مَكروهين و كارِهين بَعَضَنا بَعض.

⁴ و لَكِن لَمّا لُطف الله مُخَلِّصنا و مَحَبَّتو ظَهَرو لِلنّاس،

⁵ هو خَلَّصنا، مُش بِأعمال البِر النِحنا عَمَلناها، لَكِن بِرَحمَتو. هو خَلَّصنا بِغَسيل الوِلادَه التّانيَه، و بِالرّوح القُدُس العَمَلنا ناس جُداد.

⁶ و الله كَبَّ الرّوح القُدُس عَلينا بِغِني بِيَسُوع المَسيح.

⁷ حَتّى عَشان إتبَرَّرنا بِنِعمَتو، نَبقى وُرّاث حَسَب رَجاء الحَياة الأبَديَّه.

⁸ الكِلمَه دي أمينَه. و أنا عاوزَك تَشهَد بِتأكيد لِلحاجات دي، عَلَشان ديل، الآمَنو بِالله، بِهتَمّو عَشان يَعمِلو أعمال كوَيسَه. و الحاجات دي طَيبَه و عِندَها فايدَه لِلنّاس.

⁹ لَكِن كون بَعيد مِن الأسئلَه البَليدَه، و حِسابات الأجيال، و الحَرب بِالكَلام، و الشَّكلات عَن القانون، عَلَشان ديل باطِلَه و بِدون فايدَه.

¹⁰ و الرّاجِل البِحِب يَقَسِّم النّاس، حَزِّرو مَرَّه و مَرَّتين. و بَعَد دا، كون بَعيد مِنّو.

¹¹ و إنتَ بِتَعرِف راجِل زي دا خَربان و هو يَعمِل الخَطيَّه، و يَحكُم عَلى نَفسو.

¹² و وَكِت ما بَرَسِّل ليك أرتيماس ولّا تِيخِيكُس، أعمِل الأحسَن أن تَجي لَي لِنِيكُوبُولِيس، عَلَشان أنا قَرَّرتَ أقعُد هِناك في الشِّتا.

¹³ أعمِل زي ما بِتَقدَر عَشان تَجَهِّز زيناس، المِتعَلِّم في القانون، و أَبُلُّوس لِلسَّفَر حَتّى ما بِحتاجو لِحاجَه.

¹⁴ و خَلّي أهَلنا يِتعَلَّمو أن يَدّو نُفوسُم لِلأعمال الكوَيسَه لِلإحتِياجات الضَّروريَه. و كِدا هُم ما بِعيشو حَياة بِدون فايدَه.

¹⁵ كُل النّاس المَعاي يَسَلِّمو عَليك. سَلِّم عَلى البِحِبّونا في الإيمان. النِّعمَه مَعَ كُلُّكُم.