تِيطُس 1 - كِتاب العَهد الجَّديد مِن الكِتاب المُقَدَّس

¹ مِن بُولُس، خَدّام الله و رَسول يَسُوع المَسيح، حَسَب إيمان مُختارين الله و مَعرِفَة الحَق البِقود لِخوف الله.

² و في رَجاء الحَياة الأبَديَّه، الوَعَد بيها الله قُبّال زَمَن أبَدي. و الله ما بِقدَر يَكَضِّب.

³ لَكِن هو وَرّا كلمَتو في وَكتا. و هو إتَّكَل عَلي أن أبَشِّر بِحَسَب أمر مُخَلِّصنا الله.

⁴ لِتِيطُس، وَلَدي الحَقيقي في الإيمان العِندَنا سَوا. نِعمَه و سَلام مِن الله الأبو و المَسيح يَسُوع مُخَلِّصنا.

⁵ أنا سيبتَك في كَريت لِلسَّبَب دا، عَلَشان تَرَتِّب الحاجات النّاقصَه، و تَختار شُيوخ في كُلّو مَدينَه زي ما أمَرتَك.

⁶ الشّيخ لازِم يَكون بِدون لوم، راجِل عِندو مَرَه واحدَه، و أولادو مؤمِنين و ما يَشتَكو مِنَّهُم بيَعمِلو الدَوشَه ولّا ما بِطيعُو.

⁷ و المُلاحِظ يَكون بِدون لوم عَلَشان هو وَكيل الله. و هو ما لازِم بِكون مِتكَبِّر و ما بِزعَل قَوام، و ما بِسكَر، و ما بِضرُب، و ما طَمّاع في قُروش وَسخان.

⁸ لَكِن هو بِفتَح بيتو لِلغَريبين، و بِحِب الخير، و يَكون عاقِل، و عَديل، و مُقَدَّس، و بِقدَر يَمسِك نَفسو.

⁹ و هو ماسِك بِالكَلام الأمين حَسَب التَّعليم، عَلَشان هو يَقدَر يَدّي الشَّجاعَه بِالتَعليم الحَقيقي و يَوَبِّخ البِقاوِمو.

¹⁰ عَشان في ناس كَتيرين الما بِطيعُو، البِتكَلَّمو بِدون فايدَه و بِغِشّو، و خُصوصاً مِن النّاس المُطَهَّرين.

¹¹ و لازِم يَبَطِّلو كَلامُم، عَلَشان هُم يَقلِبو كُلّو أهل البُيوت بِالتَّمام بِتَعليمُم الما بِالقانون فِشان قُروش وَسخان.

¹² و واحِد مِنَّهُم، و هو النَّبي بِتاعُم، قال: ”ناس كَريت دايماً كَضّابين، وحوش بَطّالين، بُطونيين كَسلانين.“

¹³ و الشَّهادَه دي الحَق. عَلَشان كِدا وَبِّخُم شَديد عَشان إيمانُم بِكون صَحيح.

¹⁴ و عَشان هُم ما بِخَلّو بالُم لِحِكايات اليَهود و أوامِر النّاس البِرَجِعو عَن الحَق.

¹⁵ لِلنّاس قُلوبُم نَضيفَه، كُلّو حاجَه نَضيفَه ليهُم. لَكِن لِلنَّجِسين و الما مؤمِنين، ما في حاجَه نَضيفَه ليهُم. لَكِن أفكارُم و ضَميرُم خَربانين.

¹⁶ هُم بِقولو إنَّهُم بِيَعرِفو الله، و لَكِن هُم بِنكُروهو بِأعمالُم. و هُم مَكروهين، و ما بِطيعُو، و ما عِندَهُم فايدَه لِأي عَمَل كوَيس.