رُومِيَه 9 - كِتاب العَهد الجَّديد مِن الكِتاب المُقَدَّس

إختِيار الله حَسَب سُلطتو

¹ أقول الحَق في المَسيح. ما بَكَضِّب. و ضَميري شاهِد لَي بِالرّوح القُدُس.

² أنا عِندي حُزن شَديد في قَلبي و عِندي وَجَع ما بِقيف.

³ عَشان انا كُنتَ بَدور أكون أنا نَفسي مَلعون و مَقطوع عَن المَسيح عَشان خاطِر أخواني، جِنسي حَسَب الجِّسِم،

⁴ الهُم ناس إِسْرَائِيل. هو عَمَلُم أولادو، و ليهُم المَجد و الإتِّفاقات. و هو أدّاهُم القانون و الخِدمَه و الوُعود.

⁵ و ليهُم الأبَهات، و مِنَّهُم المَسيح بِحَسَب الجِّسِم، الهو فوق الكُل. الله مُبارَك لِلأبَد. آمين.

⁶ أنا ما بَقول الله ما عَمَل زي ما هو قال. عَلَشان مُش كُلُّهُم المِن إِسْرَائِيل هُم ناس إِسْرَائِيل بِالحَق.

⁷ مُش كُلُّهُم أولاد بِالحَق عَشان هُم مِن أهل بيت إِبْرَاهِيم. لَكِن، زي ما مَكتوب: ”بِإِسْحَاق أولادَك بِجو.“

⁸ يَعني مُش أولاد الجِّسِم هُم أولاد الله، لَكِن أولاد الوَعَد يَحسِبوهُم أولاد.

⁹ عَشان دي هي كِلمَة الوَعَد: ”أنا بَجي زي الوَكِت دا، و سَارَه تَجيب وَلَد.“

¹⁰ و مُش دا بَس، لَكِن رِفقَه كَمان حِملَت مِن واحِد، و هو إِسْحَاق، أبونا.

¹¹ قُبّال ما الوَلَدين إتوَلَدو و لِسَّع ما عَمَلو كوَيس ولّا بَطّال قالو ليها: ”الكَبير ماشي يَخدِم الصَّغَير.“

¹² عَلَشان تَرتيب الله بِحَسَب الإختِيار يَكون ثابِت، ما مِن الأعمال، لَكِن مِن الِبِنادي.

¹³ زي ما مَكتوب: ”حَبيت يَعْقُوب و كِرِهتَ عِيسُو.“

¹⁴ عَلَشان كِدا بِنقول شِنو؟ يِمكِن الله ما عادِل؟ أبَداً!

¹⁵ عَشانو يَقول لِمُوسَى: ”بَرحَم البَدور أرحَم، و بَشفِق عَلى البَدور أشفِق.“

¹⁶ عَلَشان كِدا هو ما سؤَال عَن إرادَة إنسان ولّا عَن تَعبو، لَكِن عَن رَحمَة الله.

¹⁷ عَشان الكِتاب يَقول لِفِرعون: ”أنا عَمَلتَك مَلِك بِالسَّبَب دا زاتو، عَلَشان أوَرّي قوَّتي فيك، و عَلَشان بِنادو بِإسمي في كُل الأرض.“

¹⁸ عَلَشان كِدا، الله يَرحَم الزّول الهو بِدور يَرحَمو، و يَقَوّي راس الزّول الهو بِدور يَقَوّيهو.

¹⁹ فِشان كِدا، واحِد بِقول لَي: ”لِشِنو الله يَقول عِندَنا غَلَط بَعَد دا؟ عَشان مِنو يَقدَر يَعاكِس إرَادَتو؟“

²⁰ و لَكِن مِنو إنتَ، يا زول، حَتّى تَرُد عَلى الله كِدا؟ البُرمَه بِتقول ليهو العَمَلا: ”لِشِنو عَمَلتَني كِدا؟“

²¹ دَقّاق البُرام ما عِندو سُلطَه عَلى الطّين عَشان يَعمِل مِن حِتَّت طين حاجَه واحدَه لِلإحتِرام و تانيَه لِفايدَه يوميَّه؟

²² و كِدا كَمان بِالشّي العَمَلو الله. الله كان داير يَوَرّي زَعلو و يَبَيِّن قُوَّتو. و كِدا، هو إتحَمَّل بِصَبر كَتير بُرام غَضَبو جاهِزَه لِلخَراب.

²³ و عَمَل دا عَلَشان يَوَرّي غِنى مَجدو عَلى بُرام رَحمَه جَهَّزا مِن قُبّال لِلمَجد،

²⁴ و عَلينا نِحنا الهو نادانا، مُش مِن اليَهود بَس، لَكِن مِن الأُمَم كَمان.

²⁵ زي ما يَقول في هُوشَع: ”بَسَمّيهُم شَعبي الما كان شَعبي، و بَسَمّيها مَحبوبَه الما كانَت مَحبوبَه.“

²⁶ و: ”في المَكان القالو ليهُم فيهو: إنتو ما شَعبي، هُم هِناك بِسَمّوهُم أولاد الله الحَي.“

²⁷ و إِشَعْيَاء يَنادي بِخُصوص إِسْرَائِيل: ”إذا كان عَدَد أولاد إِسْرَائِيل زي رَمل البَحَر، ما بِخلَص مِنَّهُم إلّا جُزو صَغَيِر.

²⁸ عَشان الرَّب بِكَمِّل بِالتَّمام و بِسُرعَه حُكمو عَلى الأرض.“

²⁹ زي ما إِشَعْيَاء مِن قُبّال قال: ”إذا كان الرَّب، القادِر عَلى كُلّو شي، ما خَلّى لينا أولاد، كُنّا بِقينا زي سَدوم و زي عَمورَه.“

إِسْرَائِيل و الإنجيل

³⁰ عَلَشان كِدا بِنقول شِنو؟ الأُمَم الما يَطلُبو البِر، هُم حَصَّلو عَلى البِر، يَعني البِر البِإيمان.

³¹ لَكِن إِسْرَائِيل و هُم طَلَبو البِر بِحَسَب القانون ما حَصَّلو عَليهو.

³² و لِشِنو؟ عَشانُم ما طَلَبو داك بِالإيمان، لَكِن زي ما كان بِالأعمال. و وَقَعو عَلى حَجَر العَترَه.

³³ مِثِل ما مَكتوب: ”شوف! أنا بَخُت في صِهيون حَجَر وقوع و صَخرَه نُزول، و البِآمِنو بيهو ما بِكون خَجلان.“