رُومِيَه 7 - كِتاب العَهد الجَّديد مِن الكِتاب المُقَدَّس

مَثَل مِن الزَّواج

¹ يا أخوان، أنا بَكَلِّم النّاس البِعرِفو القانون. ما بِتَعرِفو، القانون عِندو سُلطَه فوق الزّول و هو حَي؟

² عَشان المَرَه المِتزَوِّجَه مَربوطَه بِالقانون لِراجِلا و هو حَي. و لَكِن إذا راجِلا مات، هي حُرَّه مِن قانون العِرِس.

³ عَلَشان كِدا، إذا بِقَت لِراجِل تاني و راجِلا لِسَّع حَي، يَسَموها زانيَه. و لَكِن إذا راجِلا مات، هي حُرَّه مِن القانون، و ما تَكون زانيَه إذا إتزَوَّجَت راجِل تاني.

⁴ كِدا يا أخوان، إنتو كَمان مُتّو لِلقانون بِجِسِم المَسيح عَلَشان تَبقو لِتاني، ليهو القام مِن بين المَيِّتين، فِشان نَجيب ثِمار لِلَّه.

⁵ لَمّا كُنّا في الجِّسِم، القانون حَرَّك شَهوات الخَطيَّه الكانَت تَشتَغِل في أعضاء أجسامنا عَلَشان نَجيب ثِمار لِلموت.

⁶ لَكِن هَسَّع، نِحنا حُرّين مِن القانون، عَلَشان مُتنا لِلشّي الكان يَربُطنا. و فِشان دا، نَخدِم بِالطَّرِيق الجَّديد بِتاع الرّوح، ما بِالطَّرِيق القَديم بِتاع القانون المَكتوب.

القانون و الخَطيَّه

⁷ بِنقول شِنو؟ القانون خَطيَّه؟ ما مُمكِن! لَكِنّي ما عِرِفتَ الخَطيَّه شِنو، إلّا بِالقانون. ما كُنتَ عِرِفتَ الطَّمَع، إذا القانون ما كان قال: ”ما تَطمَع.“

⁸ لَكِن الخَطيَّه آخَدَت فُرصَه بِالأمر، و عَمَلَت فِيني كُلّو نوع الشَّهوَه. عَشان الخَطيَّه بِدون القانون مَيِّتَه.

⁹ كُنتَ حَي مِن قُبّال، بِدون القانون. لَكِن، لَمّا الأمر جا، الخَطيَّه قامَت و أنا مُتَّ.

¹⁰ و الأمر، الكان لِلحَياة، هو جاب لَي الموت.

¹¹ عَشان الخَطيَّه آخَدَت فُرصَه بِالأمر، و غَشّاني، و بيهو كَتَلني.

¹² عَلَشان كِدا، القانون مُقَدَّس، و الأمر مُقَدَّس، و عادِل، و طَيب.

¹³ الطَّيب بِقى لَي موت؟ أبَداً! لَكِن الخَطيَّه آخَدَت الطَّيب، و جابَت لَي موت، عَلَشان تَوَرّي هي خَطيَّه. و كِدا بِالأمر، الخَطيَّه تَبقى خَاطيَه جِدّاً.

¹⁴ بِنَعرِف القانون روحي، و لَكِن أنا ما روحي، و باعوني تِحِت الخَطيَّه.

¹⁵ أنا ما بَفهَم الأنا بَعمِلو. عَشان أنا ما بَعمِل البَدورو، لَكِن البَكرَهو، داك أنا أعمِلو.

¹⁶ لَمّا بَسَوّي الما بَدورو، بَتَّفِق أن القانون طَيب.

¹⁷ عَلَشان كِدا، ما أنا بَعدو البَسَوّي كِدا، لَكِن الخَطيَّه السّاكنَه فِيني.

¹⁸ بَعرِف ما في حاجَه طَيبَه تَعيش فِيني، يَعني في جِسمي. عَشان عِندي الإرادَه أسَوّي الطَّيب، لَكِن ما بَقدَر أسَوّيهو.

¹⁹ أنا ما بَعمِل الخير البَدور أعمِلو، لَكِن بَعمِل الشَّر، الما بَدور أعمِلو.

²⁰ و إذا كان بَعمِل الما عاوِز أعمِلو، بَعَد دا، مُش أنا البَعمِلو، لَكِن الخَطيَّه السّاكنَه فِيني.

²¹ كِدا، ألقى القانون دا، في نَفسي، لَمّا عاوِز أعمِل الخير، الشَّر في قِدامي.

²² عَشان بَكون مَبسوط بِقانون الله في جُوَّه نَفسي،

²³ لَكِنّي أشوف قانون تاني في أعضائي. و هو يَحارِب قانون فِكري، و يَحبُسني لِقانون الخَطيَّه البِشتَغِل في أعضائي.

²⁴ يا مُصيبتي! أنا الزّول المِسكين! مِنو بِخَلِّصني مِن الجِّسِم البِسوقني لِلموت دا؟

²⁵ شُكراً لِلَّه بِرَبَّنا يَسُوع المَسيح! عَلَشان كِدا، مِن نَفسي أخدِم قانون الله بِعَقلي، و لَكِن بِالجِّسِم، أخدِم قانون الخَطيَّه.