رُومِيَه 6 - كِتاب العَهد الجَّديد مِن الكِتاب المُقَدَّس

نِحنا مَيِّتين لِلخَطيَّه، حَيين في المَسيح

¹ بَعدين بِنقول شِنو؟ نِستَمِر نَعيش في الخَطيَّه عَلَشان النِّعمَه تَزيد؟

² أبَداً! نِحنا مُتنا لِلخَطيَّه، كيف نَعيش فيها بَعَد دا؟

³ ما بِتَعرِفو كُلُّنا الإتعَمَّدنا بِالمَسيح يَسُوع، إتعَمَّدنا لِموتو؟

⁴ و كُنّا مَدفونين مَعاهو بِالمَعموديَّه لِلموت، عَلَشان زي ما المَسيح قام مِن بين المَيِّتين بِمَجد الأبو، نِحنا كَمان نَعيش حَياة جَديدَه.

⁵ إن بِقينا واحِد مَعاهو في موتو نِحنا كَمان بِنكون واحِد مَعاهو في قيامَتو.

⁶ عَشانّا بِنَعرِف دا، نَفسَنا القَديمَه إنصَلَبَت مَعاهو، عَلَشان يَوَقِّف قُوَّة جِسم الخَطيَّه، عَشان ما بِنكون خَدّامين لِلخَطيَّه بَعَد دا.

⁷ عَلَشان لَمّا واحِد يَموت، هو يَكون حُر مِن الخَطيَّه.

⁸ إذا مُتنا مَعَ المَسيح، نآمِن نِحنا بِنعيش كَمان مَعاهو.

⁹ بِنَعرِف المَسيح قام مِن بين المَيِّتين، و هو ما بِموت مَرَّه تانيَه أبَداً. الموت ما عِندو سُلطَه فوقو بَعَد دا.

¹⁰ الموت الهو مات، هو مات لِلخَطيَّه مَرَّه واحدَه، و الحَياة الهو يَعيشا، هو يَعيشا لِلَّه.

¹¹ و كِدا كَمان، أحسِبو نُفوسكُم مَيِّتين لِلخَطيَّه، و لَكِن حَيين لِلَّه بِالمَسيح يَسُوع رَبَّنا.

¹² عَلَشان كِدا، ما تَخَلّو الخَطيَّه تَملِك في جِسِمكُم البِموت فِشان تَطيعو شَهوَتو.

¹³ و ما تَدّو أعضاء جِسِمكُم لِلخَطيَّه عَشان تَعمِلو الشَّر، لَكِن أدّو نُفوسكُم لِلَّه زي ناس حَيين بَعَد ما كُنتو مَيِّتين. و أدّو أعضاء جِسِمكُم عَشان تَعمِلو بِر الله.

¹⁴ الخَطيَّه ما بِتكون سَيِدكُم، عَلَشانكُم ما تَعيشو تِحِت القانون، لَكِن تِحِت النِّعمَه.

¹⁵ بَعدين شِنو؟ بِنَعمِل خَطيَّه عَلَشان ما نَعيش تِحِت القانون، لَكِن تِحِت النِّعمَه؟ أبَداً!

¹⁶ ما بِتَعرِفو لَمّا تَدّو نُفوسكُم زي خَدّامين عَشان تَطيعو واحِد، إنتو بِالحَق خَدّامين ليهو التَطيعوهو؟ يا لِلخَطيَّه البِسوق لِلموت ولّا لِلطّاعَه البِسوق لِلبِر.

¹⁷ لَكِن شُكراً لِلَّه! إنتو الكُنتو خَدّامين لِلخَطيَّه قُبّال دا، طِعتو بِقُلوبكُم حَق التَّعليم القِبِلتوها.

¹⁸ عِندَكُم حُريّاتكُم مِن الخَطيَّه، و بِقيتو خَدّامين لِلبِر.

¹⁹ بَتكَلَّم بِكِلمات الزّول، عَلَشان، الضُّعف الفي جِسِمكُم. كُنتو تَدّو أعضاءكُم خَدّامين لِلنَّجاسَه و الشَّر الكَتير. كِدا كَمان هَسَّع أدّو أعضاءكُم خَدّامين لِلبِر و لِلقَداسَه.

²⁰ لَمّا كُنتو خَدّامين لِلخَطيَّه، كُنتو حُرّين مِن البِر.

²¹ ياتا فايدَه كانَت عِندَكُم في الوَكِت داك مِن الحاجات الإنتو تَكونو خَجلانين مِنَّها هَسَّع؟ عَشان نِهايَة الحاجات دي، هي الموت.

²² لَكِن هَسَّع بِقيتو حُرّين مِن الخَطيَّه، و بِقيتو خَدّامين لِلَّه. و عِندَكُم فايدَه في القَداسَه، و النِّهايَه، حَياة أبَديَّه.

²³ عَشان أُجرَة الخَطيَّه هي الموت، و لَكِن هَديَّة الله هي الحَياة الأبَديَّه بِالمَسيح يَسُوع رَبَّنا.