رُومِيَه 5 - كِتاب العَهد الجَّديد مِن الكِتاب المُقَدَّس

السَّلام و الفَرَح

¹ هَسَّع عَلَشان إتبَرَّرنا بِالإيمان، عِندَنا سَلام مَعَ الله بِرَبَّنا يَسُوع المَسيح.

² و بيهو قِبِلنا الدُّخول بِالإيمان لِلنِّعمَه دي، و نِحنا نَعيش بيهو. و نَفرَح في رَجاء مَجد الله.

³ و فوق دا، نَفرَح كَمان في أتعاب، عَشان بِنَعرِف التَّعب يَجيب الصَّبر.

⁴ و الصَّبر يَعمِلنا مَقبولين. و عَشان كِدا عِندَنا رَجاء.

⁵ و عَلَشان عِندَنا رَجاء، نِحنا ما خَجلانين، عَشان الله كَبَّ مَحَبَّتو في قُلوبنا بِالرّوح القُدُس الهو أدّانا.

⁶ عَشان لَمّا كُنّا لِسَّع ضَعيفين، المَسيح مات في الوَكِت المُختار فِشان الخاطيين.

⁷ عَشان دي حاجَه فوق العادَه، إذا واحِد يَموت عَشان راجِل بار. يِمكِن عَشان راجِل صالِح، واحِد يَكون عِندو شَجاعَه حَتّى يَموت.

⁸ و لَكِن الله وَرّا مَحَبَّتو لينا، عَشان لَمّا نِحنا لِسَّع كُنّا خاطيين، المَسيح مات فِشانّا.

⁹ عَشان إتبَرَّرنا هَسَّع بِدَمّو، كيف بِالأكتَر جِدّاً بِنَخلَص بيهو مِن الغَضَب!

¹⁰ و وَكِت ما نِحنا كُنّا عُدوان الله، هو عَمَل سَلام مَعانا بِموت إبنو. و هَسَّع عَلَشان بِقينا مُصالِحين، كيف بِالأكتَر جِدّاً نِحنا بِنَخلَص بِحَياتو.

¹¹ و ما دا بَس، لَكِن نَفرَح بِالله بِرَبَّنا يَسُوع المَسيح، و هَسَّع بيهو بِقينا مُصالِحين.

الموت جا بِآدَم و الحَياة بِالمَسيح

¹² بِزول واحِد الخَطيَّه دَخَلَت لِلدُّنيا، و الخَطيَّه جابَت الموت. و كِدا، الموت جا لِكُل النّاس، عَشان كُل النّاس عَمَلو خَطيَّه.

¹³ الخَطيَّه كانَت في الدُّنيا قُبّال ما القانون جا، لَكِن ما يَحسِبوهو خَطيَّه لَإنا ما في قانون.

¹⁴ و لَكِن الموت حَكَم مِن آدَم لِمُوسَى و داك عَلى ديل الما عَمَلو خَطيَّه زي ما آدَم عَمَل خَطيَّه، لَمّا كَسَّر أمر الله. آدَم كان عَلامَه ليهو الماشي يَجي.

¹⁵ و هَديَّة الله مَجّاناً و مُش زي خَطيّة آدَم. و ناس كُتار ماتو بِسَبَب خَطيّة الإنسان الواحِد، يَعني آدَم. لَكِن نِعمَة الله أكبَر بِكَتير، و النِّعمَه دي جات لِناس كُتار كَمان. و كِدا كَمان الهَدِيَّه المَجّاناً جات بِإنسان واحِد، يَعني يَسُوع المَسيح.

¹⁶ و في فارِق بين هَديَّة الله و خَطيّة إنسان واحِد. بَعَد الخَطيَّه الواحدَه، جا الحُكم: ”إنتَ مُذنِب،“ لَكِن بَعَد خَطايا كَتيرَه، جا الهَدِيَّه: ”إنتَ ما مُذنِب.“

¹⁷ بِالحَق، بِخَطيّة إنسان واحِد، الموت كان عِندو قُوَّه عَلى كُل النّاس. لَكِن في ناس البِقبَلو نِعمَتو الكَتير و هَديَّة البِر. و بِتكون عِندَهُم قُوَّه زي المُلوك في الحَياة بِالواحِد يَسُوع.

¹⁸ عَلَشان كِدا، بِخَطيَّه واحدَه الدّينونَه كانَت عَلى كُل النّاس. و كِدا بِبِر واحِد، كُل النّاس يَبقو بارين، و البِر دا يَجيب ليهُم الحَياة.

¹⁹ عَلَشان الإنسان الواحِد خالَف، الكَتيرين بِقو خاطيين. و كِدا عَلَشان الإنسان الواحِد طاع، الكَتيرين بِقو بارين.

²⁰ القانون دَخَل عَشان الخَطيَّه تَزيد. لَكِن لَمّا الخَطيَّه زادَت، نِعمَة الله زادَت كَتير جِدّاً.

²¹ و زي ما الخَطيَّه مَلَكَت لِلموت، كِدا النِّعمَه بِتَملِك بِالبِر لِلحَياة الأبَديَّه بِرَبَّنا يَسُوع المَسيح.