رُومِيَه 4 - كِتاب العَهد الجَّديد مِن الكِتاب المُقَدَّس

إِبْرَاهِيم إتبَرَّر بِالإيمان

¹ بَعدين نَقول شِنو عَن أبونا إِبْرَاهِيم؟ هو لِقى شِنو حَسَب الجِّسم؟

² عَشان إذا كان إِبْرَاهِيم إتبَرَّر بِالأعمال، كان عِندو كِبِر، و لَكِن ما قِدّام الله.

³ الكِتاب بِقول شِنو؟ ”إِبْرَاهِيم آمَن بِالله، و حَسبو ليهو بِر.“

⁴ و الزّول البِسَوّي، ما يَحسِبو ليهو أُجرَتو زي هَدِيَّه، لَكِن زي دين.

⁵ و الزّول الما بيَعمِل لَكِن بِآمِن بِالله اليَبَرِّر الخاطي، إيمانو إتحَسَب ليهو بِر.

⁶ و دَاوُد كَمان يَقول نَفس الحاجَه إنّو الإنسان الإتحَسَب ليهو بِر بِدون أعمال، هو مُبارَك. هو يَقول:

⁷ ”مُبارَكين هُم الخَطاياهم مَغفورَه ليهُم، و ذُنوبُم مُغَطّى.

⁸ مُبارَك الرّاجِل، الرَّب ما بِحسِب ليهو خَطِيَّتو.“

⁹ البَرَكَه دي لِلمُطَهَّر بَس، ولّا لِلما مُطَهَّر كَمان؟ إِبْرَاهِيم آمَن بِالله، و دا سَوَّاهو بار قِدّام الله.

¹⁰ الله سَوّا دا ليهو مِتين؟ دا كان قُبّال طَهورو ولّا بَعدو؟ ما كان بَعدو، لَكِن قُبّال طَهورو!

¹¹ و أخَد عَلامَة الطَّهور زي خِتِم لِلبِر الكان عِندو بِإيمان لَمّا هو لِسَّع ما كان مُطَهَّر. و بِدا بِقى أبو لِكُل البِآمِنو و هُم لِسَّع ما مُطَهَّرين، عَلَشان يَحسِبو ليهُم البِر كَمان.

¹² و هو كَمان أبو المُطَهَّرين، مُش بِسَبَب طَهورُم بَس، لَكِن عَلَشان هُم آمَنو زي ما أبونا إِبْرَاهِيم آمَن لَمّا هو ما كان مُطَهَّر.

¹³ الله وَعَد لِإِبْرَاهِيم و أولادو، إنّو يَكون وارِث الدُّنيا. و دا ما عَشان إِبْرَاهِيم طاع القانون، لَكِن عَشان آمَن بِالله.

¹⁴ عَشان إذا كان البِعيشو بِالقانون هُم وُرّاث، الإيمان بِدون فايدَه، و الوَعَد ما عِندو سُلطَه.

¹⁵ فِشان القانون يَجيب الغَضَب. و المَكان الما فيهو قانون، ما فيهو ذَنب.

¹⁶ عَلَشان كِدا، الوَعَد بِجي بِالإيمان، عَشان يَكون بِنِعمَه، و يَكون بِتأكيد، لِكُل الأولاد، مُش ليهُم البِطيعُو القانون بَس، لَكِن ليهُم المِن إيمان إِبْرَاهِيم كَمان. و هو أبو لِكُلُّنا.

¹⁷ زي ما مَكتوب: ”عَمَلتَك أبو لِأُمَم كَتيرَه.“ هو أبونا قِدّام الله الهو آمَن بيهو. و الله بِدّي حَياة لِلمَيِّتين، و هو يتكَلَّم و يَخلُق حاجَه مِن الما كانَت مَوجودَه.

¹⁸ و في الرَّجاء إِبْرَاهِيم آمَن، لَمَّن ما كان في رَجاء عَلَشان يَبقى أبو لِأُمَم كَتيرَه. زي ما الكِتاب يَقول: ”أولادَك بِكون أُمَم كَتيرَه.“

¹⁹ و هو ما كان ضَعيف في الإيمان لَمّا فَكَّر في جِسمو، الكان قَريب لِلموت. عَلَشان كان ليهو مِيَّة سَنَه تَقريباً. و إيمانو ما كان ضَعيف لَمّا فَكَّر في رَحِم سَارَه المَيِّت.

²⁰ و إِبْرَاهِيم لِسَّع ما شَكَّ بِوَعَد الله، لَكِن بِقى شَديد في الإيمان، و أدّا المَجد لِلَّه.

²¹ و إتأكَّد تَمام أن الله قادِر يَعمِل زي ما وَعَد بيهو.

²² عَلَشان كِدا، سَوَّاهو بار.

²³ الكِلمات: ”سَوَّاهو بار،“ ما كانَت مَكتوبَه فِشانو وَحدو،

²⁴ لَكِن فِشان نِحنا كَمان. عَشان الله يَسَوّينا بارين، نِحنا البِنآمِن بيهو القَوَّم رَبَّنا يَسُوع مِن بين المَيِّتين.

²⁵ هُم سَلَّموهو لِلموت عَشان خَطايانا. و الله قَوَّمو عَشان نِتبَرَّر.