رُومِيَه 2 - كِتاب العَهد الجَّديد مِن الكِتاب المُقَدَّس

حُكم الله حَسَب البِر

¹ عَلَشان كِدا، إنتَ بِدون عُذر، يا الزّول البِتَحكُم عَلى واحِد تاني. عَشان وَكِت ما تَحكُم عَلى التّاني، تَحكُم عَلى نَفسَك. عَلَشان إنتَ البِتَحكُم، بِتَعمِل الحاجات دي زاتا.

² و بِنَعرِف دينونَه الله عَلى ديل البيَعمِلو زي الحاجات دي. و دينونَتو حَسَب الحَق.

³ لَكِن إنتَ، يا زول، تَعمِل زات الحاجات، و تَحكُم عَلى البيَعمِل زَيَك! تَفتَكِر إنتَ بِتَقدَر تَجري مِن دينونَة الله؟

⁴ ولّا تَشتِم غِنى لُطفو و إحتِمالو و صَبرو الطَّويل؟ و ما بِتَعرِف الله يَوَرّي لُطفو عَشان يَقودَك لِلتّوبَه؟

⁵ لَكِن بِسَبَب قَلبَك القَوّي و الما بِتوب، بِتَخزِن لِنَفسَك غَضَب في يوم الغَضَب، لَمّا دينونَة الله العادِل بِظهَر.

⁶ و هو بِدّي لِكُلّو واحِد زي أعمالو.

⁷ و اليِستَمِرّو في العَمَل الطَّيب و يَطلُبو المَجد و الإحتِرام و الما بِموت، هو بِدّيهُم الحَياة الأبَديَّه.

⁸ و ليهُم البِحِبّو نُفوسُم، و ما بِطيعُو الحَق لَكِن بِطيعُو الشَّر، بِكون في زَعل و غَضَب.

⁹ التَّعب و الضّيق عَلى كُلّو إنسان بِعمِل الشَّر، عَلى اليَهودي في الأوَّل، و بَعدين عَلى الإغريقي.

¹⁰ و المَجد و الإحتِرام و السَّلام لِكُلّو واحِد بِسَوّي الخير، لِليَهودي في الأوَّل، و بَعدين لِلإغريقي.

¹¹ عَشان الله ما بِشوف الوشوش.

¹² عَشان كُل البيَعمِلو خَطيَّه بِدون القانون، بِدون القانون بِموتو. و كُل البيَعمِلو خَطيَّه بِالقانون، بِالقانون بِحكُموهُم.

¹³ عَشان مُش ديل البِسمَعو القانون هُم بارين قِدّام الله، لَكِن ديل البِعمِلو بِالقانون، هُم يَكونو بارين.

¹⁴ لَمّا الأُمَم الما عِندَهُم قانون يَعمِلو بِالطَّبيعَه الواجِب في القانون، هُم قانون لِنُفوسُم، و لَو ما عِندَهُم قانون.

¹⁵ و هُم بِوَرّو إنّو عَمَل القانون مَكتوب في قُلوبُم. و ضَميرُم كَمان يَشهَد، و أفكارُم يَشتَكو ولّا يِمكِن يَعمِلو عُذر لِنُفوسُم.

¹⁶ في اليوم داك، الله يَدين عَلى أسرار النّاس بِحَسَب إنجيلي بِيَسُوع المَسيح.

اليَهود و القانون

¹⁷ و شوف إنتَ بِتسَمّي نَفسَك يَهودي، و مِتَّكِل عَلى القانون و إنتَ بِقيت مِتكَبِّر و تَقول إنتَ تَعرِف الله.

¹⁸ و إنتَ بِتَعرِف إرَادَتو و تَفَرِّق الأحسَن، عَشانَك إتعَلَّمتَ القانون.

¹⁹ و إنتَ مِتأكِّد إنتَ تَقود العَميانين، و إنتَ نور لِلنّاس الفي الضَّلام،

²⁰ و مُدَرِّس الغُشام، و مُعَلِّم لِلصُّغار، عَشان عِندَك في القانون صورَة المَعرِفَه و الحَق.

²¹ بَعدين إنتَ البِتعَلِّم التّاني، ما بِتعَلِّم نَفسَك؟ إنتَ البِتعَلِّم النّاس عَشان ما يَسرِقو، إنتَ تَسرِق؟

²² إنتَ البِتقول واحِد ما لازِم يَعمِل زِنا، إنتَ تَعمِل زِنا؟ إنتَ البِتَكرَه الأصنام، تَسرِق مِن الهياكِل؟

²³ إنتَ البِتمَجِّد القانون، إنتَ تَشتِم الله لَمّا تَكسِّر القانون؟

²⁴ زي ما مَكتوب: ”بِجَدِّفو إسم الله بين الأُمَم بِسَبَبكُم.“

²⁵ الطَّهور عِندو فايدَه إذا حَفَظتو القانون. و لَكِن إن كَسَّرتَ القانون، طَهورَك بِقى ما طَهور.

²⁶ إذا كان الما مُطَهَّر بِحفَظ القانون، و لَو هو ما مُطَهَّر، ما يَحسِبو ليهو زي الطَّهور؟

²⁷ و الما مُطَهَّر دا بِطَبيعَه، لَمّا يَحفَظ القانون، بِيَحكُم عَليك. و إنتَ عِندَك القانون المَكتوب و الطَّهور، لَكِن تَكسِّر القانون.

²⁸ عَشان اليَهودي في الظّاهِر، مُش يَهودي بِالحَق، و لا الطَّهور الفي الظّاهِر في الجِّسم طَهور بِالحَق.

²⁹ لَكِن اليَهودي في جُوَّه، هو اليَهودي الحَقيقي. و طَهور القَلِب، هو الطَّهور الحَقيقي و دا بِالرّوح، مُش بِالكِتاب. و حَمدو ما مِن النّاس، لَكِن مِن الله.