رُومِيَه 16 - كِتاب العَهد الجَّديد مِن الكِتاب المُقَدَّس

سَلامات عَلى الأخوان

¹ بَحمَد ليكُم فيبي، أُخُتنا، خَدّامَة الكَنيسَه الفي كَنْخِرِيَا،

² عَلَشان تَقبَلوها في الرَّب زي ما يِستَحِق لِلقِدِّسين. و تَساعِدوها في أي شي تَحتاج ليهو مِنَّكُم. عَشان هي ساعَدَت كَتيرين و ساعَدَتني أنا كَمان.

³ سَلِّمو عَلى بِرِيسْكِلا و أَكِيلَا المِشتَغِلين مَعاي في المَسيح يَسُوع،

⁴ الخاطَرو بِحَياتُم عَشانّي. و مُش أنا وَحدي بَشكُرُم، لَكِن كُلّو كَنايس الأُمَم كَمان.

⁵ سَلِّمو كَمان عَلى الكَنيسَه الفي بيتُم. سَلِّمو عَلى أَبَيْنِتُوس حَبيبي الهُوَ أوَّل ثِمار آسيا لِلمَسيح.

⁶ سَلِّمو عَلى مَرْيَم التِّعِبَت كَتير فِشانكُم.

⁷ سَلِّمو عَلى أَنْدَرُونِيكُوس و وَيُونِيَاس مِن أهل بيتي، المَحبوسين مَعاي. هُم مَعروفين بين الرُّسُل، و هُم كانو في المَسيح قُبّالي.

⁸ سَلِّمو عَلى أَمْبِلْيَاس، حَبيبي في الرَّب.

⁹ سَلِّمو عَلى أُورْبَانُوس، المِشتَغِل مَعانا في المَسيح و عَلى إستاخيس، حَبيبي.

¹⁰ سَلِّمو عَلى أَبُلِّس، المَقبول في المَسيح. سَلِّمو عَليهُم المِن أهل أَرِسْتُوبُولُوس.

¹¹ سَلِّمو عَلى هِيرُودِيُون، واحِد مِن أهل بيتي. سَلِّمو عَليهُم المِن أهل نَرْكِيسُوس الهُم في الرَّب.

¹² سَلِّمو عَلى تَرِيفَيْنَا و وَتَرِيفُوسَا التِّعِبو في الرَّب. سَلِّمو عَلى بَرْسِيس المَحبوبَه التِّعِبَت كَتير في الرَّب.

¹³ سَلِّمو عَلى روفُس المُختار في الرَّب، و عَلى أُمّو و هي أُمّي كَمان.

¹⁴ سَلِّمو عَلى أَسِينْكِرِيتُس، وَفِلِيغُون، وَهَرْمِس، وَبَتْرُوبَاس و وَهَرْمَاس و عَلى الأخوان المَعاهُم.

¹⁵ سَلِّمو عَلى فِيلُولُوغُوس و وَجُولِيَا و وَنِيرِيُوس و أُختو و وَأُولُمْبَاس و عَلى كُل القِدِّسين المَعاهُم.

¹⁶ سَلِّمو بَعضَكُم عَلى بَعض بِسَلام مُقَدَّس. كُلّو كَنايس المَسيح يَسَلِّمو عَليكُم.

¹⁷ أطلُب ليكُم، يا أخوان، تَخُتّو بالكُم لِليَعمِلو إنقِسامات و البِخُتّو في سِكَّتكُم مُخالِف التَّعليم الإتعَلَّمتوهو. خَلّوهُم.

¹⁸ عَشان ناس زي ديل ما بِخدِمو رَبَّنا المَسيح لَكِن بُطونُم. و بِالكِلمات الحِلوَه و كَلام الحَمد يَغِشّو قُلوب المُخلِصين.

¹⁹ عَشان كُل النّاس سِمِعو بِطاعَتكُم. و عَلَشان كِدا أنا مَبسوط بيكُم. و لَكِنّي دَايِركُم تَكونو فاهمين لِلخير و بُسَطاء لِلشَّر.

²⁰ و إلَه السَّلام بِدُق الشّيطان تِحِت كِرعينكُم بَعَد شوَيَه. نِعمَة رَبَّنا يَسُوع المَسيح مَعاكُم.

²¹ يَسَلِّمو عَليكُم تِيمُوثَاوُس المِشتَغِل مَعاي، و لوكيوس و ياسون و سُسِبَترُس مِن أهل بيتي.

²² أنا تَرْتِيُوس، كاتِب الجَّواب دا، بَسَلِّم عَليكُم في الرَّب.

²³ يَسَلِّم عَليكُم غَايُوس، الفَتَح بيتو لَي و لِلكَنيسَه كُلُّها. يَسَلِّم عَليكُم أَرَاسْتُس، المَسؤول عَلى خَزنَة المَدينَه و كُوَارْتُس الأخو.

²⁴ نِعمَة رَبَّنا يَسُوع المَسيح مَعَ كُلُّكُم. آمين.

²⁵ و لِلقادِر يَثَبِّتكُم حَسَب إنجيلي الأنا أبَشِّر بِيَسُوع المَسيح، و حَسَب السِّر الكان مَدسوس في الزَّمَن الأبَديَّه.

²⁶ و لَكِن ظَهَر هَسَّع و خَبَّرو بيهو كُل الأُمَم بِالكُتُب النَّبَويَّه بِحَسَب الإلَه الأبَدي، عَشانُم يآمِنو و يَطيعوهو.

²⁷ لِلَّه الفَهيم وَحدو، ليهو المَجد بِيَسُوع المَسيح لِلأبَد. آمين.