رُومِيَه 15 - كِتاب العَهد الجَّديد مِن الكِتاب المُقَدَّس

¹ نِحنا، القَوّيين، لازِم نَشيل ضُعف الضَّعيفين، و ما نَبسِط نُفوسنا.

² خَلّي كُلّو واحِد مِنَّنا يَبسِط قَرِيبو لِخيرو عَشان يَشَدِّدو.

³ عَشان المَسيح ما عَجَب نَفسو، لَكِن زي ما هو مَكتوب: ”شَتِيمَة الشَّتَموك وَقَعَت عَلي.“

⁴ كُل الكان مَكتوب مِن قُبّال مَكتوب لِتَعليمنا، عَلَشان يَكون عِندَنا الرَّجاء بِالصَّبر و تَعزيات الكُتُب.

⁵ و إلَه الصَّبر و التَّعزيَه يَدّيكُم فِكرَه واحدَه بينكُم بِحَسَب المَسيح يَسُوع.

⁶ عَلَشان إنتو بِنَفس واحدَه و خَشم واحِد تَمَجِّدو الله أبو رَبَّنا يَسُوع المَسيح.

⁷ عَلَشان كِدا، أقبَلو بَعضَكُم بَعض، زي ما المَسيح قِبِلنا لِمَجد الله.

⁸ عَشان أقول ليكُم، المَسيح بِقى خَدّام الطَّهور فِشان حَق الله، حَتّى يَثَبِّت وُعود الله لِلأبَهات.

⁹ عَشان الأُمَم يَمَجِّدو الله فِشان رَحمَتو، زي ما هو مَكتوب: ”بِالسَّبَب دا بَمَجِّدَك في الأُمَم، و بَرَتِّل لِإسمَك.“

¹⁰ و يَقول كَمان: ”أفرَحو، يا أُمَم، مَعَ شَعبو.“

¹¹ و كَمان: ”أحمَدو الرَّب، يا كُل الأُمَم، و أحمَدوهو، يا كُل الشُّعوب.“

¹² و إِشَعْيَاء يَقول كَمان: ”عِرق يَسَّى بِجي، الواحِد البِقوم عَلَشان يَملِك عَلى الأُمَم. هو بِكون رَجاء الأُمَم.“

¹³ و إلَه الرَّجاء يَملاكُم كُلّو فَرَح و سَلام في الإيمان، عَلَشان تَزيدو في الرَّجاء بِقوَّة الرّوح القُدُس.

بُولُس خَدّام الأُمَم

¹⁴ أنا نَفسي، يا أخواني، مِتأكِّد إنتو نُفوسكُم مَليانين كُلّو حاجَه طَيبَه، كاملين في كُلّو مَعرِفَه، قادرين يَعَلِّم بَعضَكُم بَعض.

¹⁵ و لَكِن كَتَبتَ ليكُم بِأكتَر شَجاعَه في بَعض مِن الأسئلَه، عَشان أذَكِّركُم بيها بِسَبَب النِّعمَه الأدّاني ليها الله.

¹⁶ و عَشان أكون خَدّام لِلمَسيح يَسُوع فِشان الأُمَم. و أبَشِّر خِدمَة الإنجيل زي قَسّيس، عَلَشان الأُمَم تَبقى هَدِيَّه مَقبولَه، مُقَدَّسَه بِالرّوح القُدُس.

¹⁷ عَلَشان كِدا، عِندي فَخر في المَسيح يَسُوع بِخِدمَتي لِلَّه.

¹⁸ أنا بَخاف أتكَلَّم بِحاجَه إلّا العَمَلو المَسيح بي عَلَشان الأُمَم يَطيعو الله، بِالكِلمَه و العَمَل،

¹⁹ بِقوَّة العَلامات و العَجايِب، بِقوَّة الرّوح القُدُس. كِدا بَشَّرتَ بِالتَّمام بِإنجيل المَسيح مِن أُورُشَلِيم و الحَواليها لِإِلِّيرِيكُون.

²⁰ لَكِن تَرتيبي دايماً كان دا: عَشان أبَشِّر بِالإنجيل في المَحَل الفيهو إسِم المَسيح ما كان مَعروف. عَلَشان ما أبني عَلى أساس واحِد تاني.

²¹ لَكِن زي ما هو مَكتوب: ”الما خَبَّروهُم بيهو، بِشوفو، و الما سِمِعو، بِفهَمو.“

تَرتيب بُولُس عَشان يَزور رُومِيَه

²² و دا هو السَّبَب الوَقَّفني مَرّات كَتيرَه مِن الجّاي ليكُم.

²³ لَكِن هَسَّع ما عِندي مَكان بَعَد دا في البِلاد دي، و عِندي مَحَبَّه مِن سِنين كَتيرَه عَشان أشوفكُم.

²⁴ و لَمّا أمشي لِأسبانيا، عِندي رَجاء أشوفكُم وَكِت ما بَمُر في طَرِيقي. و تَساعِدوني في سَفَري لِهِناك، بَعَد ما فِرِحتَ بِزِيارَتكُم وَكِت قَليل.

²⁵ لَكِن هَسَّع أنا ماشي لِأُورُشَلِيم عَشان أخدِم القِدِّسين هِناك.

²⁶ عَشان كان كوَيس في عُيون ناس مَكِدونيَّه و أَخَائِيَه تَلِمّو هَدِيَّه لِلمَساكين القِدِّسين الفي أُورُشَلِيم.

²⁷ كان كوَيس في عُيونُم يَعمِلوهو. و بِالحَق كانو مَديونين ليهُم. الأُمَم إشتَرَكو في حاجاتُم الرّوحيَّه. عَلَشان كِدا، الأُمَم لازِم يَخدِموهُم بِالحاجات الجِّسميَّه.

²⁸ و بَعَد ما تَمَّمتَ داك و سَلَّمتَ ليهُم المُساعَدَه، بَمشي لِأسبانيا و بَزوركُم في السِّكَّه.

²⁹ أنا بَعرِف لَمّا أجي ليكُم، بَجي ليكُم بِبَرَكَه كاملَه مِن المَسيح.

³⁰ أطلُب ليكُم، يا أخوان، بِرَبَّنا يَسُوع المَسيح و بِمَحَبَّة الرّوح، أن تَتعَبو مَعاي في الصَّلَوات لِلَّه فِشانّي.

³¹ صَلّو عَشان أخلَص مِن الما مؤمِنين في اليَهُودِيَّه، و عَشان خِدمَتي لِأُورُشَلِيم تَكون مَقبولَه لِلقِدِّسين هِناك.

³² عَلَشان كِدا، بَجي ليكُم بِفَرَح بِإرادَة الله، و بِتكون لَي راحَه مَعاكُم.

³³ إلَه السَّلام مَعاكُم كُلُّكُم. آمين.