رُومِيَه 13 - كِتاب العَهد الجَّديد مِن الكِتاب المُقَدَّس

واجِب لِلسَّلاطين

¹ خَلّي كُلّو واحِد يَطيع السَّلاطين البِحكُمو، عَلَشان ما في سُلطَه، إلّا مِن الله. عَشان الله ثَبَّت السَّلاطين المَوجودين.

² عَلَشان كِدا، البِخالِف السُّلطان، يَخالِف تَرتيب الله. و النّاس البِعمِلو كِدا بِجيبو دينونَه لِنُفوسُم.

³ عَشان الخوف مِن السَّلاطين ما يَكون بِسَبَب العَمَل الكَويس، لَكِن بِالعَمَل البَطّال. إنتَ داير تَكون ما خايِف مِن السُّلطان؟ أعمِل الخير و هو بِشكُرَك.

⁴ عَشان هو خَدّام الله البيَعمِل الخير ليك. لَكِن إذا عَمَلتَ الشَّر، خاف، عَلَشانو ما يَشيل السّيف ساكِت. هو خَدّام الله، وَكيل العَدل، البِجيب غَضَب عَلى البيَعمِلو الشَّر.

⁵ عَلَشان كِدا، لازِم تَطيع السَّلاطين، مُش بِسَبَب الغَضَب، لَكِن كَمان بِسَبَب الضَّمير.

⁶ عَشان بِالسَّبَب دا، إنتو تَدفَعو الضَّرايب كَمان، فِشان هُم خَدّامين الله البِدّو وَكتُم كُلّو لِلشُّغل داك بِزاتو.

⁷ أدفَعو لِكُلُّهُم الإنتو مَديونين ليهُم. أدفَعو الضَّرايب، و المَحصول. و إحتَرِمو و شَرِّفو كُلُّهُم.

⁸ ما تَكونو مَديونين لِواحِد بِحاجَه إلّا يَحِب بَعضَكُم بَعض. عَشان البِحِب قَرِيبو، هو كَمَّل القانون.

⁹ الأوامِر: ”ما تَزني، ما تَكتُل، ما تَسرِق، ما تَطمَع،“ و إن كان في أمر تاني، هُم إتلَمّو في الكِلمَه دي: ”حِب قَريبَك زي نَفسَك.“

¹⁰ المَحَبَّه ما تَعمِل شَر لِلقَريب. عَشان كِدا، المَحَبَّه تَكَمِّل القانون.

¹¹ و أعمِلو دا، و أفهَمو الوَكِت الحاضِر. السّاعَه جات عَشان تَقومو مِن النّوم. فِشان خَلاصنا هَسَّع قَريب مِن ما كان لَمّا آمَنّا في الأوَّل.

¹² اللّيل قَرَّب يَفوت، و النَّهار قَرَّب يَجي. عَشان كِدا، خَلّونا نَسيب أعمال الضُّلُمَّه، و نَلبَس سِلاح النّور.

¹³ خَلّونا نَعيش بِالإحتِرام زي في النَّهار، ما بِالحَفلات البَطّالَه و السُّكر، ولّا بِالفَضيحَه و الخَراب، ولّا بِالمُشاكَلَه و الحَسَد.

¹⁴ لَكِن ألبَسو الرَّب يَسُوع المَسيح، و ما تَفَكِّرو في الجِّسِم عَشان تَكَمِّل شَهوَتو.