رُومِيَه 12 - كِتاب العَهد الجَّديد مِن الكِتاب المُقَدَّس

ضَبيحَه حَيَّه

¹ عَلَشان كِدا، أطلُب ليكُم، يا أخوان، بِمَراحِم الله، تَقَدِّمو أجسامكُم ضَبيحَه حَيَّه، مُقَدَّسَه، مَقبولَه قِدّام الله. و دي خِدمَتكُم المَعقولَه.

² و ما تَكونو زي الزَّمَن دا، لَكِن إتغَيَّرو مِن جُوَّه بِأفكار جَديدَه. فِشان تَمتَحِنو إرادَة الله، إرَادَتو الكوَيسَه، و المَقبولَه، و الكاملَه.

³ بِسَبَب النِّعمَه الأدّاها لَي الله، بَقول لِكُلّو واحِد فيكُم، ما يَفتَكِر عَن نَفسو فوق ما لازِم يَفتَكِر. لَكِن يَفتَكِر عَن نَفسو بِحُكم عَديل، بِحَسَب قِياس الإيمان الأدّاهو ليهو الله.

⁴ نِحنا عِندَنا في جِسِم واحِد أعضاء كَتيرَه، و كُل الأعضاء ما عِندَهُم شُغل واحِد.

⁵ كِدا كَمان نِحنا الكَتيرين جِسِم واحِد في المَسيح، و أعضاء بَعَضَنا لِبَعض، كُلّو واحِد لِلتاني.

⁶ لَكِن عِندَنا هَدايا مُختَلِفَه، بِحَسَب النِّعمَه الأدّاها لينا. العِندو هَديَّة النُّبوَّه، خَليهو يَشتَغِل بيهو بِحَسَب إيمانو.

⁷ إذا هَديَّاتو الخِدمَه، خَليهو يَخدِم، ولّا التَعليم، خَليهو يَعَلِّم.

⁸ إذا هَديَّاتو كَلام الشَّجاعَه، خَليهو يَشَجِّع. البِدّي، خَليهو يَدّي و يَكون كَريم. العِندو سُلطَه، خَليهو يَشتَغِل شَديد. العِندو رَحمَه، خَليهو يَرحَم بِفَرَح.

المَحَبَّه

⁹ خَلّي المَحَبَّه تَكون مُخلِصَه. أكرَهو البَطّال، أمسِكو بِالكوَيس.

¹⁰ حِبّو بَعضَكُم بَعض بِمَحَبَّه زي أخوان. إحتَرِمو بَعضَكُم بَعض.

¹¹ ما تَكونو كَسلانين في الشُّغل. كونو حارّين في الرّوح. أخدِمو الرَّب.

¹² كونو فَرحانين في الرَّجاء، أصبُرو في التَّعب، إستَمِرّو في الصَّلاه.

¹³ شارِكو مَعَ المُحتاجين بين القِدِّسين. أفتَحو بُيوتكُم لِلغَريبين.

¹⁴ بارِكو البِطرُدوكُم. بارِكو و ما تَلعَنو.

¹⁵ أفرَحو مَعَ الفَرحانين، و أبكو مَعَ الحَزنانين.

¹⁶ خَلّي تَكون عِندَكُم فِكرَه واحدَه بَعضَكُم بَعض. ما تَكونو مِتكَبِّرين، لَكِن أقبَلو النّاس المِتواضِعين. ما تَكونو شاطرين قِدّام نُفوسكُم.

¹⁷ ما تَدفَعو لِأي واحِد عَلى الشَّر بِالشَّر. فَكِّرو في الطَّيب قِدّام كُل النّاس.

¹⁸ إنتو نُفوسكُم أعمِلو كُل البِتَقدَرو عَلَشان تَعيشو بِسَلام مَعَ كُل النّاس.

¹⁹ ما تَنتَقِمو لِنُفوسكُم، يا أخوان، لَكِن أدّو مَكان لِزَعل الله، عَلَشان مَكتوب: ”الإنتِقام لَي. أنا بَدفَع، يَقول الرَّب.“

²⁰ لَكِن إذا عَدوَّك جَاع، أدّيهو أكل. و إذا عَطَش، أدّيهو مويَه. عَشان إذا كان عَمَلتَ كِدا، هو بِكون خَجلان مِن عَمَلو.

²¹ ما تَخَلّي الشَّر يَغلِبَك، لَكِن أغلِب الشَّر بِالخير.