رُومِيَه 10 - كِتاب العَهد الجَّديد مِن الكِتاب المُقَدَّس

¹ يا أخوان، مَحَبَّة قَلبي و صَلاتي لِلَّه فِشان ناس إِسْرَائِيل، هي عَلَشان هُم يَخلَصو.

² عَشانّي أشهَد ليهُم عِندَهُم غيرَه لِلَّه، لَكِن ما حَسَب المَعرِفَه.

³ و عَلَشانُم ما عِرفو بِر الله و طَلَبو أن يَثَبِّتو بِر نُفوسُم، هُم ما طاعو بِر الله.

⁴ عَشان المَسيح نِهايَة القانون، عَلَشان يَكون في بِر لِكُلّو واحِد البِآمِن.

الخَلاص لِلكُل

⁵ و مُوسَى يَكتِب عَن البِر المِن القانون: ”الزّول البيَعمِلو يَعيش بيهو.“

⁶ لَكِن البِر المِن الإيمان يَقول كِدا: ”ما تَقول في قَلبَك، مِنو يَطلَع لِلسَّما؟ يَعني عَلَشان يَنَزِّل المَسيح.“

⁷ ولّا: ”مِنو يَنَزِّل لِلهاويَه؟ يَعني عَلَشان يَطَلِّع المَسيح مِن بين المَيِّتين؟“

⁸ لَكِن يَقول شِنو؟ ”الكِلمَه قَريبَه مِنَّك، في خَشمَك و في قَلبَك.“ يَعني كِلمَة الإيمان النَّبَشِّر بيها.

⁹ عَلَشان إذا إعتَرَفتَ بِخَشمَك بِالرَّب يَسُوع و آمَنتَ بِقَلبَك أن الله قَوَّمو مِن بين المَيِّتين، إنتَ بِتَخلَص.

¹⁰ عَشان الإنسان بِآمِنو بِالقَلب لِلبِر، و بِعتَرِف بِالخَشم عَشان يَخلَص.

¹¹ زي ما الكِتاب يَقول: ”كُلّو واحِد بِآمِنو بيهو، ما بِكون خَجلان.“

¹² عَشان ما في فارِق بين اليَهودي و الإغريقي، عَشان في رَب واحِد لِلكُل، و هو غَني لِكُل البِنادو ليهو.

¹³ فِشان: ”كُلّو واحِد الِبِنادي لِإسم الرَّب بِخلَص.“

¹⁴ و لَكِن كيف بِنادو لِلما آمَنو بيهو؟ و كيف بِآمِنو بِالما سِمِعوهو؟ و كيف بِسمَعو بِدون مُبَشِّر؟

¹⁵ و كيف بِبَشِّرو إذا ما يَرَسِّلوهُم؟ زي ما مَكتوب: ”شوف كيف جَميل كِرعين المُبَشِّرين بِحاجات كوَيسَه!“

¹⁶ و لَكِن مُش كُلُّهُم قِبلو الإنجيل. عَشان إِشَعْيَاء يَقول: ”يا رَب، مِنو صَدَّق خَبَرنا؟“

¹⁷ عَلَشان كِدا، الإيمان يَجي مِن الخَبَر، و الخَبَر بِكِلمَة المَسيح.

¹⁸ لَكِن أقول: يِمكِن ما سِمِعو؟ طَبَعاً سِمِعو! ”صوتُم مَرَق في كُل الأرض، و كلماتُم لِآخِر الدُّنيا.“

¹⁹ و أقول مَرَّه تانيَه، يِمكِن إِسْرَائِيل ما فِهمو؟ في الأوَّل مُوسَى يَقول: ”بَحَرِّكُّم لِلحَسَد مِن النّاس الهُم مُش أُمَّه، و بَزَعِّلكُم مِن أُمَّه ما فاهمَه.“

²⁰ و كِدا إِشَعْيَاء يَقول بِدون خوف: ”الما طَلَبوني لِقوني، و وَرّيت نَفسي لِلنّاس الما سَألو عَنّي.“

²¹ لَكِن بِخُصوص إِسْرَائِيل، هو يَقول: ”النَّهار كُلّو مَدّيت إيديني لِشَعب مِخالِف و راسُم قَوّي.“