رُومِيَه 1 - كِتاب العَهد الجَّديد مِن الكِتاب المُقَدَّس

¹ الجَّواب دا مِن بُولُس. أنا خَدّام يَسُوع المَسيح، و الله إختارني عَشان أبَشِّر بِإنجيلو.

² و الله وَعَد بِالإنجيل مِن قُبّال بِواسطَة أنبياهو في الكُتُب المُقَدَّسَه.

³ و الإنجيل يَكَلِّمنا عَن إبنو، رَبَّنا يَسُوع المَسيح و هو كان مَولود مِن أهل بيت دَاوُد حَسَب الجِّسِم.

⁴ و الرّوح القُدُس خَبَّر بِقُوَّه إنّو يَسُوع المَسيح هو إبن الله لَمّا قَوَّمو مِن بين المَيِّتين.

⁵ و بِالمَسيح قِبِلنا نِعمَه و بِقينا رُسُل. و هَسَّع الله يَرَسِّلنا عَشان نَبَشِّر كُل الأُمَم فِشان هُم كَمان بِطيعوهو و بِآمِنو بيهو.

⁶ و إنتو كَمان المُختارين مِن بين الأُمَم عَشان تَكونو لِيَسُوع المَسيح.

⁷ أنا بَكتِب لِكُلُّكُم الفي مَدينَة رُومِيَه. الله بِحِبّكُم و إختاركُم عَشان تَكونو قِدِّيسين. نِعمَه ليكُم و سَلام مِن الله أبونا و مِن الرَّب يَسُوع المَسيح.

قُوَّة الإنجيل

⁸ في الأوَّل أشكُر إلَهي بِيَسُوع المَسيح فِشان كُلُّكُم، عَلَشان يَخَبِّرو بِإيمانكُم في كُل الدُّنيا.

⁹ عَشان الله، البَخدِمو بِروحي في إنجيل إبنو، بِشهَد لَي كيف أتذَكَّركُم في كُلّو وَكِت في صَلَواتي.

¹⁰ و بَصَلّي لِلَّه هَسَّع في الآخِر بِإرَادَتو إنّو يفتَح الطَّريق لَي عَشان أجيكُم.

¹¹ أنا داير أشوفكُم كَتير عَشان بَدّيكُم بَعض مِن الهَدايا البِكون مِن الرّوح عَشان تَبقو قَوّيين.

¹² يَعني بِتكون عِندَنا شَجاعَه مَعَ بَعض بِالإيمان الفي كُلُّنا، إيمانكُم و إيماني.

¹³ أنا ما عاوِزكُم تَكونو بِدون مَعرِفَه، يا أخوان، مَرّات كَتيرَه قَرَّرتَ أجي ليكُم فِشان ألقى ثِمار مِنَّكُم كَمان، زي في الأُمَم التّانيين. و لَكِن مَنَعوني لِغايَة هَسَّع.

¹⁴ أنا عِندي دين لِناس إغريقيين و الما إغريقيين، لِلفاهمين و الغُشام.

¹⁵ و بِالسَّبَب دا، أنا جاهِز بِكُلّو قَلبي، أبَشِّركُم بِالإنجيل، ليكُم كَمان، الفي رُومِيَه.

¹⁶ أنا ما خَجلان مِن الإنجيل، عَشان هو قُوَّة الله عَشان يَخَلِّص كُل البِآمِنو، لِليَهود في الأوَّل، و بَعدين لِناس إغريقيين.

¹⁷ الإنجيل يَكَلِّمنا إنّو الله عَمَلنا بارين قِدّامو بِإيمان فيهو. عَلَشان كِدا، بِالإيمان بِنعيش الحَياة الجَديدَه بِواسطَتو. و الكُتُب المُقَدَّسَه بِقولو: ”الإنسان البار بِعِيش بِالإيمان.“

كُل النّاس مُذنِبين

¹⁸ عَشان الله بِبَيِّن غَضَبو مِن السَّما ضِد كُلّو شَر النّاس، و ذَنبُم، النّاس اليَمنَعو الحَق بِالذَّنب.

¹⁹ عَلَشان اليَقدَرو يَعرِفو عَن الله باين ليهُم، عَلَشان الله وَرّاهو ليهُم.

²⁰ النّاس ما بِقدَرو يَقولو هُم ما عارِفين عَن الله. مِن خَليقَة الدُّنيا النّاس قِدرو يَشوفو الله مِثِل شِنو مِن الحاجات الهو خَلَقا. دا يَوَرّي قُدرَتو البِتِستَمِر لِلأبَد. و دا يَوَرّي هو الله.

²¹ و مَعَ إنَّهُم عِرفو الله، هُم ما مَجَّدوهو زي الله و ما شَكَروهو. لَكِن أفكارُم بِقو بِدون فايدَه، و قُلوبُم الغَشيمَه بِقو فيهُم ضُلُمَّه.

²² و وَكِت ما هُم يَفتَكِرو نُفوسُم فاهمين، بِقو غُشام.

²³ و غَيَّرو مَجد الله الأبَدي بِشَكل صورَة الإنسان البِموت، و طُيور، و حَيوانات، و دَبايب.

²⁴ عَلَشان كِدا، الله سَلَّمُم في شَهوات قُلوبُم لِلوَساخَه، لِشَتيمَة أجسامُم بين نُفوسُم.

²⁵ عَشانُم غَيَّرو حَق الله بِالكِضِب، و عَبَدو و خَدَمو المَخلوق بِدال الخالِق، الهو مُبارَك لِلأبَد.

²⁶ عَشان كِدا، الله سَلَّمُم لِشَهوات فيها عيب، حَتّى نَسوانُم غَيَّرو الفايدَه الطَّبيعيَه بِشي ضِد الطَّبيعَه.

²⁷ و كِدا كَمان، الرُّجال خَلّو الفايدَه الطَّبيعيَه مَعَ النِّسوان، و إنحَرَقو بِشَهوَتُم بَعضَهُم لِبَعض. رُجال بِرُجال عَمَلو الفَضيحَه، و قِبلو في نُفوسُم جِزا الحَق لِغَلَطُم.

²⁸ و عَشانُم ما إفتَكَرو في فايدَه مِن مَعرِفَة الله، الله سَلَّمُم لِخَراب الفَهم عَشان يَعمِلو المَمنوع.

²⁹ هُم بِقو مَليانين بِكُلّو ذَنب، و شَر، و طَمَع، و حاجَه بَطّالَه. هُم مَليانين حَسَد، و كَتَل، و شَكلَه، و غِش، و فِكر بَطّال. هُم يَوَسوِسو،

³⁰ و يَشتِمو، و يَكرَهو الله، و يَرفَعو مَناخيرُم، و يَشكُرو نُفوسُم. و هُم نَفّاخين، مِفَكِّرين في طُرُق جَديدَه عَشان يَعمِلو الشَّر، ما يَطيعو والِدينُم،

³¹ ما عِندَهُم فَهم، ما يَحفَظو إتِّفاق، بِدون قَلِب ولّا رَحمَه.

³² هُم يَعرِفو حُكم الله إنّو البِعمِلو الحاجات زي دي يِستَحِقّو الموت. لَكِن يِستَمِرّو يَعمِلوها و يَقبَلو النّاس اليَعمِلوها.