رؤيا 9 - كِتاب العَهد الجَّديد مِن الكِتاب المُقَدَّس

البوق الخامِس و السّادِس

¹ و المَلاك الخامِس ضَرَب بِالبوق، و شُفتَ نَجمَه كانَت وَقَعَت مِن السَّما لِلأرض. و أدّو ليها مُفتاح الحُفرَه الغَريقَه خَلاص.

² و هو فَتَح الحُفرَه الغَريقَه، و دُخان طَلَع مِن الحُفرَه زي دُخان مِن فُرن كَبير. و الشَّمِس و الهَوا بِقَت مَضَلِّمَه مِن دُخان الحُفرَه.

³ و مِن الدُّخان جا جَراد عَلى الأرض، و أدّو ليهُم قُوَّه زي قُوَّة عَقارِب الأرض.

⁴ و قالو ليهُم أن ما يَضُرّو قَش الأرض ولّا أي شي أخدَر ولّا أي شَجَرَه، إلّا النّاس الما عِندَهُم خِتِم الله عَلى جَبهاتُم.

⁵ و ما أدّوهُم قُوَّه عَشان يَكتُلوهُم، لَكِن يَعَذِّبوهُم خَمسَه شُهور بَس. و عَذابُم كان زي عَذاب عَقرَب لَمّا يَعُض زول.

⁶ و في الأيام ديلاك النّاس بِفَتِّشو عَلى الموت، لَكِن ما يَلقوهو. هُم بِدورو يَموتو، لَكِن الموت بِهرُب مِنَّهُم.

⁷ و شَكل الجَّراد كان زي حَصين جاهِزين لِلحَرب. و عَلى رُسينُم حاجَه زي تيجان مِن دَهَب، و وُشوشُم زي وشوش النّاس.

⁸ و كان عِندَهُم شَعر زي شَعر النِّسوان، و سِنونُم زي سِنون الأُسود.

⁹ و كانو عِندَهُم دُروع مِن حَديد، و صوت جِنحينُم زي صوت عَرَبيَات حَصين كَتيرَه يَجرو لِلحَرب.

¹⁰ و عِندَهُم أضناب زي عَقارِب و شوك، و في أضنابُم القُوَّه عَشان يَضُرّو النّاس مُدَّة خَمسَه شُهور.

¹¹ و عِندَهُم مَلِك فوقُم، و هو مَلاك الحُفرَه الغَريقَه. و إسمو بِّاللُغَه العِبرانيَّه، أبَدّون، و بِّاللُغَه الأغريقيَّه، أبولّيون.

¹² و المُصيبَه الفي الأوَّل فاتَت. و شوف، بِجو بَعَد دا مُصِيبَتين.

¹³ و بَعدين المَلاك السّادِس ضَرَب بِالبوق، و سِمِعتَ صوت جاي مِن الأربَعَه قُرون بِتوع المَضبَح الدَّهَبي القِدّام الله.

¹⁴ و هو قال لِلمَلاك السّادِس العِندو البوق: ”فِك الأربَعَه مَلائكَه المَربوطين عِند الفُرات، البَحَر الكَبير.“

¹⁵ و فَكّو الأربَعَه مَلائكَه. و هُم كانو مَجَهَّزين لِلسّاعَه و اليوم و الشَّهَر و السَّنَه عَلَشان يَكتُلو تِلت النّاس.

¹⁶ و عَدَد الجُّيوش الرّاكبين حَصين كان مِيَّتين مِليون. أنا سِمِعتَ عَدَدُم.

¹⁷ و كِدا في الرّؤيَه شُفتَ الحَصين و الرّاكبين فوقُم: ديل كانو عِندَهُم دُروع، و لون الدُّروع زي النّار و أزرَق غامِق و أصفَر زي الكِبريت. و روسين الحَصين كانو زي روسين الأُسود، و مَرَقو مِن خُشومُم نار و دُخان و كِبريت.

¹⁸ و تِلت النّاس كانو مَكتولين بِالتّلاتَه ضَرَبات دي، النّار و الدُّخان و الكِبريت الجّو مِن خُشومُم.

¹⁹ عَشان قُوَّة الحَصين في خُشومُم و في أضنابُم. عَشان أضنابُم زي الدَّبايب، و بِروسينُم بِضُرّو.

²⁰ و باقي النّاس الما كانو مَكتولين بِالضَّرَبات دي لِسَّع ما تابو مِن أعمال إيدينُم. و هُم إستَمَرّو يَعبُدو الشّياطين و الأصنام الدَّهَبي و الفِضَّه و النَّحاس الأصفَر و الحَجَر و الخَشَب. و الأصنام ديل ما بِقدَرو يَشوفو ولّا يَسمَعو ولّا يَمشو.

²¹ و هُم ما تابو عَشان كَتَلو النّاس ولّا مِن سِحِرُم ولّا مِن زِناهُم ولّا مِن سِرقَتُم.