رؤيا 8 - كِتاب العَهد الجَّديد مِن الكِتاب المُقَدَّس

الخِتِم السّابِع و الأبواق

¹ و لَمّا هو فَتَح الخِتِم السّابِع، كان في سُكوت في السَّما مُدَّة نُص السّاعَه تَقريباً.

² و شُفتَ السَّبعَه مَلائكَه البِقيفو قِدّام الله، و أدّو ليهُم سَبعَه أبواق.

³ بَعدين، تاني مَلاك جا و وَقَف عِند المَضبَح، و كان عِندو حَلَّه مِن دَهَب. و أدّو ليهو بَخور كَتير عَشان يَقَدِّمو مَعَ كُلّو صَلَوات القِدِّسين عَلى المَضبَح الدَّهَبي قِدّام الكُرسي.

⁴ و دُخان البَخور مَعَ صَلَوات القِدِّسين طَلَع قِدّام الله مِن إيد المَلاك.

⁵ و المَلاك أخَد الحَلَّه و مَلأ مِن نار المَضبَح و رَماها عَلى الأرض. و كانو في رُعود و أصوات و بُروق و زَلزَلَه.

⁶ بَعدين السَّبعَه مَلائكَه العِندَهُم السَّبعَه أبواق جَهَّزو عَشان يَضرُبو بيها.

⁷ و المَلاك الأوَّل ضَرَب بِالبوق، و جا بَرَد و نار مَلَخبَتَه بِدَم، و رَموهُم عَلى الأرض. و تِلت مِن الأرض كُلَّها إنحَرَق، و تِلت الشَّجَر إنحَرَق، و كُلّو قَش أخدَر إنحَرَق.

⁸ و المَلاك التّاني ضَرَب بِالبوق، و حاجَه زي جَبَل كَبير مَوَلَّع بِالنّار إترَمَت في البَحَر. و تِلت البَحَر بِقى دَم.

⁹ و تِلت المَخلوقات الفي البَحَر ماتو، و خَرَبو تِلت المَراكِب.

¹⁰ و المَلاك التّالِت ضَرَب بِالبوق، و نَجمَه كَبيرَه وَقَعَت مِن السَّما، مَوَلَّعَه زي فانوس. و وَقَعَت عَلى تِلت البِحار و عَلى عُيون المويَه.

¹¹ و إسم النَّجمَه مَرارَه. و تِلت المويَه كُلَّها بِقَت مُرَّه، و ناس كُتار ماتو مِن المويَه عَلَشان بِقَت مُرَّه.

¹² و المَلاك الرّابِع ضَرَب بِالبوق، و تِلت الشَّمِش إنضَرَب، و تِلت القَمَر، و تِلت النُّجوم كَمان. و عَلَشان كِدا، تِلت مِنَّهُم بِقى مَضَلِّم. و تِلت مِن النَّهار كان بِدون نور، و تِلت مِن اللّيل كَمان.

¹³ و بَعدين شُفتَ، و سِمِعتَ نَسر يَطير في وَسِط السَّما. و هو قال بِصوت عالي: ”مُصيبَه! مُصيبَه! مُصيبَه لِلسّاكِنين عَلى الأرض، بِسَبَب الأصوات التّانيَه مِن أبواق التّلاتَه مَلائكَه الهُم قَرَّبو يَضرُبوها.“