رؤيا 7 - كِتاب العَهد الجَّديد مِن الكِتاب المُقَدَّس

١٤٤٬٠٠٠ مَختومين

¹ و بَعَد دا، شُفتَ أربَعَه مَلائكَه واقفين عَلى الأربَعَه أركان بِتاعَت الأرض ماسكين الأربَعَه أرياح بِتاعَت الأرض. عَلَشان الريح ما تَهِب عَلى الأرض، ولّا عَلى البَحَر، ولّا عَلى أي شَجَرَه.

² و شُفتَ مَلاك تاني يَطلَع مِن طُلوع الشَّمِش، و مَعاهو خِتِم الله الحَي. و هو نادى بِصوت عالي لِلأربَعَه مَلائكَه. و الله أدّاهُم القُوَّه عَشان يَضُرّو الأرض و البَحَر.

³ و قالو: ”ما تَضُرّو الأرض ولّا البَحَر ولّا الشَّجَر، حَتّى نَخُت الخِتِم عَلى جَبهات خَدّامين إلَهنا.“

⁴ و سِمِعتَ عَدَد الخَتّو الخِتِم عَليهُم، مِيَّه و أربَعَه و أربَعين ألف مَختومين مِن كُلّو قَبايل بَني إِسْرَائِيل.

⁵ و مِن قَبيلَة يَهُوذَا إتناشَر ألف مَختوم، و مِن قَبيلَة رأوبين إتناشَر ألف، و مِن قَبيلَة جاد إتناشَر ألف،

⁶ و مِن قَبيلَة أَشِير إتناشَر ألف، و مِن قَبيلَة نَفتالي إتناشَر ألف، و مِن قَبيلَة مَنَسَّى إتناشَر ألف،

⁷ و مِن قَبيلَة شِمْعُون إتناشَر ألف، و مِن قَبيلَة لَاوِي إتناشَر ألف، و مِن قَبيلَة يَسَّكَر إتناشَر ألف،

⁸ و مِن قَبيلَة زَبولون إتناشَر ألف، و مِن قَبيلَة يُوسِف إتناشَر ألف، و مِن قَبيلَة بنْيَامِين إتناشَر ألف مَختوم.

حَمد ناس كُتار

⁹ و بَعَد دا عايَنتَ، و شوف! كانو في ناس كُتار، و واحِد ما يَقدَر يَحسِبُم. و هُم كانو مِن كُل الأُمَم و القَبايل و الشُّعوب و اللُّغات. و كانو واقفين قِدّام الكُرسي و قِدّام الحَمَل. و هُم لابسين تيبان بيضَة و في إيدينُم فُروع النَّخَل.

¹⁰ و هُم يَكورِكو بِصوت عالي و يَقولو: ”الخَلاص لِإلَهنا القاعِد عَلى الكُرسي، و لِلحَمَل!“

¹¹ و كُل المَلائكَه كانو واقفين حَول الكُرسي و حَول الشُّيوخ و الأربَعَه حَيوانات. و هُم وَقَعو عَلى وُشوشُم قِدّام الكُرسي، و عَبَدو الله.

¹² و قالو: ”آمين! الحَمد و المَجد و الحِكمَه و الشُّكر و الإحتِرام و القُدرَه و القُوَّه لِإلَهنا لِلأبَد! آمين.“

¹³ و واحِد مِن الشُّيوخ إتكَلَّم و قال لَي: ”مِنو ديل اللابسين التّيبان البيضَة، و هُم جو مِن وين؟“

¹⁴ و قُلتَ: ”إنتَ بِتَعرِف، يا سيدي.“ و هو قال لَي: ”ديل هُم الجّو مِن الضّيق الكَبير، و غَسَّلو تيبانُم و عَمَلوها بيضَة في دَم الحَمَل.

¹⁵ عَلَشان كِدا هُم قِدّام كُرسي الله و يَخدِموهو ليل و نَهار في هَيكَلو. و القاعِد عَلى الكُرسي بِفَرِّش خيمَتو فوقُم.

¹⁶ و هُم ما بِجوعو بَعَد دا، ولّا بِيَعطَشو بَعَد دا. و الشَّمِس و الحَر ما بِتَضرُبُم، أبَداً.

¹⁷ عَلَشان الحَمَل الفي وَسِط الكُرسي بِكون الرّاعي بِتاعُم. هو بِقودُم لِأبيار المويَه الحَيَّه. و الله بِيَمسَح كُلّو دَمعَه مِن عُيونُم.“